Ձեր վստահելի աղբյուրը

«Բարգավաճ Հայաստան» կուսակցության թեկնածուներն այսօր Երևանում էին։ Մարզահամերգային համալիրի լեփ լեցուն դահլիճում կուսակցության համամասնական ցուցակը գլխավորող Գագիկ Ծառուկյանը կրկնեց մարզերում ասածը. առկա խնդիրները լուծումներ ունեն։

«Օդ ու ջրի պես անհրաժեշտություն է բնակելի շենքերի կառուցումը։ Չեմ ասում ձրի։ Բայց պետք է երկու սիրող, իրար համար տանջվող, իրար մասին մտածող երիտասարդներին ամուսնանալու հնարավորություն տալ։  Եթե յուրաքանչյուրը 120, 150, 180 հազար դրամ աշխատավարձ  է ստանում, ապա 65 հազարը մեծ ուրախությամբ վճարեն տան գումար, երջանիկ ապրեն»,-ասաց Ծառուկյանը։

ԲՀԿ առաջնորդը նկատեց, որ բնակարանաշինության արդյունքում Երևանն էլ կընդլայնվի, կզարգանա։

«Օդի մեջ չեմ ասում։ Աբովյանում 80 հազար քմ կառուցվում է։ Երևանում էլ կարող ենք, միայն քաղաքապետը տարածք հատկացնի»,-նշեց նա՝ ներկաներին խնդրելով իր պատրաստակամության մասին տեղյակ պահել քաղաքապետին։

Հաջորդը բարձրագույն կրթություն ունեցող, բայց աշխատանք չգտնող մարդկանց խնդիրն է։ Ասաց, դա ոչ կուսակցական հարց է, ոչ էլ քաղաքական։

«Ո՞նց կարելի է, մարդը ոսկե մեդալով դպրոցն ավարտի, կարմիր դիպլոմով համալսարանն ավարտի, գնա ուրիշ երկրի համար աշխատի, գնա տաքսի քշի կամ էլ շինարարություն անի»,-հարցեր հնչեցրեց կուսակցության առաջնորդը։

Անդրադարձավ նաև առողջապահության ոլորտին,  այս անգամ էլ հիշեցրեց իր առաջարկը՝ անվճար հիվանդանոցներ պետք է լինեն մարզերում ու Երևանում։

«Մարդը գումար չունենալու պատճառով տանը տանջվում է, բժշկի չի գնում»,-իրավիճակը ներկայացրեց նա։

Ծառուկյանն ասաց, խնդիրները պետք է լուծվեն, պայմաններ ու հնարավորություններ ստեղծվեն, որ մարդիկ չգնան, ավելին՝ ներգաղթ լինի։

«Դրսից գալիս են, ասում են, պարոն Ծառուկյան չենք ուզում գնանք, ուզում ենք մնանք, մեր երեխաները ըստեղ դաստիարակություն ստանան, մեր հարազատների հետ շփվենք»,-հանդիպումների ընթացքում լսածի մասին բարձրաձայնեց նա։

Ինչ վերաբերում է ներդրումներին, ապա գործարար պատգամավորի խոսքով, Հայաստանում պետք է բարենպաստ պայմաններ առաջարկեն, հետո հարկերը բարձրացնեն։ Նա որպես հաջող օրինակ մատնանշեց Արաբական Միացյալ Էմիրությունները։

Այս անգամ էլ քվե չխնդրեց, ասաց, թող ամեն մարդ քվեարկի իր խղճով, իսկ ինքն անկախ ամեն ինչից «արել է, անում է ու անելու է», շարունակելու է իր ծրագրի ներկայացումը, ուրիշին վիրավորելու հաշվին միավոր չի շահելու, քանի որ դա թույլ մարդու կեցվածք է։

«Որևիցե մեկից ձայն չենք խնդրելու։ Եթե լավ բան ենք անելու, ինչի խնդրենք։ Ամեն մարդ ինքն է որոշում, թե ինչպես ապրել»,-ասաց Ծառուկյանը։