Ձեր վստահելի աղբյուրը

«Կարծում եմ, որ Արտաքին հարաբերությունների հանձանժողովը խնդիրների վերհանման և դրանց համար լուծումներ առաջարկելու գործում առաջին հերթին պետք է պրոակտիվ լինի, ինչպես նաև վերահսկող»,- այս մասին այսօր ԱԺ-ում պատասխանելով «Լուսավոր Հայաստան» կուսակցության պատգամավոր Գևորգ Գորգիսյանի հարցին՝ ասաց հանձնաժողովի նախագահի թեկնածու Ռուբեն Ռուբինյանը։

Ինչ վերաբերում է հարցին՝ արդյոք նախկին հանձնաժողովը դրական կողմեր ուներ, նա պատասխանեց. «Իհարկե, ինչպես և ցանկացած մարմին, այն ուներ և դրական,  և բացասական կողմեր, բայց կարծում եմ՝ հիմա մենք պետք է խոսենք ապագայի և ոչ անցյալի մասին»։

Գորգիսյանն արձագանքեց. «Իհարկե,  պետք է խոսենք ապագայի մասին, բայց դրա համար պետք է նաև իմանալ անցյալը։ Հենց դրան է  ուղղված հարցս՝ կա՞ն ինչ-որ դրական ավանդույթներ, որոնք ձեր համար ընդունելի են, որպես շարունակական»։

Ռուբինյանն ասաց, որ առնվազն մեկ դրական ավանդույթ ինքը նշել է, որը պետք է շարունակվի և էլ ավելի խորանա՝ դիվանագիտական ներկայացուցիչների հետ շփումն է արտաքին հարաբերությունների հանձնաժողովում. «Դա շատ կարևոր է՝ դեսպանների նշանակման հարցը հասկանալի և տրամաբանական լինելու համար»։

Նույն խմբակցության պատգամավոր Արման Բաբաջանյանն էլ հետաքրքրվեց Արցախյան հարցի կարգավորումից՝ հիշեցնելով. «Նիկոլ Փաշինյանը դեռևս անցյալ տարի մայիսին իր ընտրության հաջորդ օրն Արցախում հայտարարեց, որ լիազորված չէ Արցախի անունից բանակցել Ադրբեջանի հետ։ Ֆորմալ առումով Փաշինյանը պահում է իր խոսքը, ցայսօր ոչ մի պաշտոնական հանդիպում չի եղել Ադրբեջանի նախագահի հետ, սակայն մյուս կողմից Հայաստանը շարունակում է արտաքին գործերի նախարարի մակարդակով բանակցել Արցախի անունից։ Այսօր էլ նախատեսվում է նման հանդիպում։ Ի՞նչ եք կարծում՝ Վիեննայում և Պետերբուրգում ձեռք բերված պայմանավորվածությունների կենսագործման մասին»։

Ռուբինյանը պատասխանեց. «Փաշինյանը պահել է իր ասածի տրամաբանությունը։ Իսկ Վիեննայի ու Պետերբուրգի պայմանավորվածությունների հետ կապված հարցադրումը բազմիցս հնչել է նաև նախկին իշխանությունների ներկայացուցիչների կողմից, ուզում եմ ասել, որ այն տպավորությունը, թե Երևանը հրաժարվել է դրանց անդրադարձից, թյուր է, դրանք շարունակում են մնալ օրակարգում։ Մենք առաջնորդվելու ենք ՀՀ շահերով, ժողովրդի որոշումներով»։

Ինչ վերաբերում է արտգործնախարարությունների բանակցային ֆորմատին, նշեց, որ առաջին խնդիրը բուն բանակցությունների շարունակությունը կամ «ռեստարտը» ապահովելն էր։