Եթե իշխանության հետ չես, ընդդիմություն ես ինքնըստինքյան. Գագիկ Ծառուկյան
«Բարգավաճ Հայաստան» կուսակցության առաջնորդ Գագիկ Ծառուկյանից այսօր լրագրողները հետաքրքրվեցին, թե իր կարծիքով ինչո՞ւ օրերս խորհրդարանում ԼՀԿ-ական և ԲՀԿ-ական պատգամավորների միջև վեճաբանություն տեղի ունեցավ։
«Բանավեճ ա, խոսակցություն ա, նորմալ ա, բոլոր ընտանիքներում խոսակցություն լինում ա։ Դուք տեսնում եք, որ օր օրի կարգավորվում ա, իրար հասկանում են, փոխադարձ հարգանքը կա։ Նոր կազմավորված խորհրդարան ա, ամեն ինչ լավ կլինի։ Այսօր մենք երկուսով ընդդիմություն ենք, պետք է լիարժեք հարցերը քննարկենք, որ միասնական հարցեր բարձրացնենք։ Հիմնականը պետք է լինի մեր խոստումները իրականացնել։ Ժողովուրդն 9 ամիս հույսով սպասում է, որ լավ է լինելու»,- ասաց նա։
Դիտարկմանը, որ Վատիկանում ՀՀ նախկին դեսպան Միքայել Մինասյանն ասել է՝ ԲՀԿ-ն ընդդիմություն չէ, Գագիկ Ծառուկյանը նշեց. «Անվանական որևիցե մեկն այդպիսի բան չի ասել, ամեն մեկն իր տեսակետը կարող է ասել։ ԲՀԿ-ն հեղափոխության աջակից է եղել, պաշտպանել Նիկոլ Փաշինյանին, հետևողականորեն աջակցելու ենք։ Բայց եթե այսօր ներկայացվել է ծրագիր, որ 100 հազար աշխատատեղ կրճատվելու է, պետք է մեզ պատասխանեն՝ 100 հազար մարդու խնդիրը ո՞նց են կարգավորելու։ Մենք ժողովրդի կողմնակիցն ենք, նոր Հայաստանում ոչ թե գործազրկություն ու արտագաղթ պետք է լինի, այլ ներգաղթ, պետք է աշխատատեղեր բացվեն, աշխատավարձ ու թոշակ բարձրանա»։
Նկատառմանը, թե Միքայել Մինասյանն ասում է՝ ԲՀԿ-ն կից է «Իմ քայլին», նա պատասխանեց. «Ով ինչ ասում ա, իրա համար ա ասում։ Ծառուկյանին հունից չեք կարող հանել։ Մենք կենտրոնամետ ուժ ենք, մենք հազար խնդիր ունենք լուծելու»։
Հարցին՝ խուսափո՞ւմ է «ընդդիմություն բառից», Ծառուկյանը պատասխանեց. «Բայց ինչի՞ եմ խուսափում։ Եթե իշխանության հետ չես, ընդդիմություն ես ինքնըստինքյան»։
Իսկ ի՞նչն իրեն դրդեց երկու օր առաջ առաջին անգամ մոտենալ ԱԺ ամբիոնին, հետաքրրքվեցին լրագրողները։
«Որևէ մեկը չի կասկածել Ծառուկյանի մտքի կամ ելույթի տեսակետից։ Մենք քննարկել ենք խմբակցությունում՝ ով պետք է ելույթ ունենա, ասել են՝ Դուք ելույթ ունեցեք։ Մեր կլասիկ պատգամավոր Էդմոն Մարուքյանին ուզեցի ասել, որ մենք ընդհանրապես մեզ շատ ծանր ենք պահել, հարգալից ենք պահել, բանավեճից հետո իր ձեռք սեղմել եմ, ընտրություններից հետո շնորհավորել եմ։ Մենք կռիվ չունենք, առաջ ենք տանելու մեր ծրագիրը։ Մենք որևէ մեկի վրա ցեխ չենք շպրտում, բայց ով փորձի մեզ վիրավորել, պատասխանը ստանալու է»,- ասաց նա։
Անդրադառնալով ՀՅԴ բյուրոյի ղեկավար Հրանտ Մարգարյանի այն դիտարկմանը, որ հինգ տարի հետո իրենք տուն են ուղարկելու ՔՊ-ին և գալու են իշխանության, Ծառուկյանը նշեց՝ դա նման է Կիկոսի մահին, ով գիտի՝ 5 տարի հետո ինչ է լինելու։
Իսկ ինչո՞ւ ուղղակի վայր չի դնում մանդատը և զբաղվում բիզնեսով, չէ՞ որ ինքը հաջողակ բիզնեսմեն է, հարցին էլ Ծառուկյանը պատասխանեց. «Բայց հաջողակ քաղաքական գործիչ չե՞մ։ Պետք է նայել կատարածին, իմ գործունեությանը, Ծառուկյանը հաջողակ է»։
Հարցին՝ ինչպե՞ս է վերաբերում Ուկրաինայում ՀՀ նախկին դեսպան Անդրանիկ Մանուկյանի մասին պատգամավոր Արման Բաբաջանյանի հայտարարություններին, ԲՀԿ առաջնորդը պատասխանեց՝ ոչ մի կերպ չի վերաբերում։
«Դա քաղաքական հարց չի, որ կուսակցությանը վերաբերի։ Դուք տեսաք, որ կուսակցությունը որևիցե պատասխան չտվեց, միայն Արման Աբովյանը. ինքը Մանուկյանի հետ 3 տարի աշխատել է, եղել է իր օգնականը։ Ոչ մեկը չի փորձել նրան պաշտպանել, երկկողմանի անհասկանալի բան է եղել, կարգավորվել է»,- ասաց Գագիկ Ծառուկյանը։
Անդրադառնալով այն հանգամանքին, որ Անդրանիկ Մանուկյանը պատրաստվում է դատի տալ ԼՀԿ պատգամավոր Արման Բաբաջանյանին՝ նա նշեց, որ մանրամասների չի տիրապետում, դա Մանուկյանի անձնական հարցն է։
Գագիկ Ծառուկյանը նաև տեղեկացրեց, որ արդեն 6 ամիս է՝ իտալական կողմի հետ բանակցություններ են ընթանում. «Իտալիայից պատվիրակություն էր եկել, նրանք ուզում են ներդրում անել Հայաստանում կամ Վրաստանում։ Ինձ համար շատ կարևոր է, որ մեզ մոտ անեն՝ անունի, տնտեսության, աշխատատեղերի համար։ Ապրիլին իրենց կառավարությունն էլ այստեղ կլինի և բացումը կանենք։ Տնտեսական հեղափոխության քայլերը կատարվում են։ Նրանք ցանկացան այլ ներդրումներ էլ կատարել, և առաջին երեք տարվա գումարները չեն տանելու, բոլորը դնելու են ՀՀ տնտեսության մեջ»։
Երբ լրագրողներից մեկը փորձեց ճշգրտող հարցեր տալ՝ որ ոլորտում է ներդրում կատարվելու, ԲՀԿ առաջնորդը կատակով նշեց. ««Կենտրոն»-ի լուրերը չե՞ք նայում։ Հիմնականում սա կերամիկայի արտադրության համար է։ Արդեն պայմանավորվածություն ունեն՝ նախնական 4 միլիոնի, որ պետք է արտահանեն ԱՄՆ։ Հենց գործարանը պատրաստ լինի, բոլոր պատվիրատուները կգան Հայաստան՝ տեսնելու որակը, տեսքը»։
Հարակից հրապարակումներ`
- Միքայել Մինասյան. Եթե վարկաբեկումից ենք որոշել սկսել, վախենամ` շատ հեռու չգնանք
- Համոզված եմ, որ ԼՀԿ ողջ խմբակցությունը նույնիսկ կեսը չունի արած այս երկրի համար. Արման Աբովյան
- Դե կարելի էր «Իմ քայլին» էլ ասել՝ ինքը չմասնակցեր, մենք առաջինը կլինեինք. Ծառուկյանը՝ Մարուքյանին
- Ծառուկյանի հետ հարաբերություններն այնպիսին են, ինչպիսին որ եղել են միշտ. Մարուքյան
Լրահոս
Տեսանյութեր
Մի կողմում հայ ժողովուրդն է, մյուս կողմում թշնամին և մեր իշխանությունը միասին. Դավիթ Անանյան