Ձեր վստահելի աղբյուրը

Այս անգամ Դաշնակցությունը որոշեց իր ընդհանուր ժողովն անցկացնել Արցախում, ինչը լուրջ խորհուրդ և իմաստ ունի։ Այսօր լրագրողների հետ հանդիպմանը նշեց Հ.Յ.Դ. Բյուրոյի նախագահ Արմեն Ռուստամյանը՝ անդրադառնալով Հ.Յ.Դ. 33-րդ Ընդհանուր ժողովի ժամանակ քննարկված հարցերին, հիմնական որոշումներին և կուսակցության առաջիկա գործունեությանը:

Նրա խոսքով՝ այսօր ազգային հիմնական օրակարգային հարցը Արցախի հիմնախնդրի հայանպաստ լուծումն է. «Դաշնակցության հանձնառությունն այդ հարցում եղել է միշտ հետևողական։ Մեր ընդհանուր ժողովի ամբողջ ընթացքը փաստեց նաև այն, որ Դաշնակցությունը համաշխարհային իր կառույցով ներկա է Արցախում, կանգնած է նրա կողքին»։

Ռուստամյանը նշեց նաև, որ ընդհանուր ժողովի արդյունքները եկան փարատելու բոլոր այն մտայնությունները, կասկածները, թե իբր Դաշնակցությունը տարբեր շերտեր ունի, թե իբր ղեկավարության ու շարքերի մեջ կան տարաձայնություններ։

«Մեր ընդհանուր ժողովն անցավ մեկ ընդհանուր նպատակի ու գաղափարախոսության շուրջ։ Դաշնակցական ընտանիքը միակամ է և պատրաստ է ստանձնել այս փուլում Հայաստանի և հայության առջև կանգնած մարտահրավերները»,- նշեց նա։

Անդրադառնալով Արցախի հետ ռազմաքաղաքական դաշինքին՝ Հ.Յ.Դ. Բյուրոյի նախագահն ասաց, որ այն կարձանագրի Հայաստանի և Արցախի կապը:

«Սրա հետ կապված մենք կոնկրետ քայլեր ենք արել: Այդ աշխատանքների մեջ ներգրավված ենք եղել, ունենք մեր պատկերացումները՝ ինչպիսին պետք է լինի այդ դաշինքը: Մենք այսօր պետք է հստակ արձանագրենք, որ հարձակումը Արցախի վրա հարձակում է Հայաստանի վրա: Մենք այս մասին խոսել ենք թե ՀՀ վարչապետի, թե Արցախի նախագահի հետ: Գտնում ենք, որ դաշինքի անհրաժեշտությունն այսօր կա, պետք է հստակ ճանապարհային քարտեզ մշակենք և գնանք դաշինքի կնքմանը։ Սա պետք է դառնա մեր համաժողովրդական պահանջը», - նշեց Ռուստամյանը։

Հանդիպմանը ներկա ՀՅԴ Բյուրոյի նորընտիր ներկայացուցիչ Հակոբ Տեր-Խաչատուրյանն էլ հավելեց. «Համաժողովն անհրաժեշտ գտավ, որ ապրիլյան քառօրյայից հետո և ներկա իրավիճակից ելնելով` մենք պետք է պատրաստ լինենք պատերազմական գործողությունների` որևէ ժամանակ սկսվելուն: Ռազմաքաղաքական դաշինքն իրավական հարթության վրա է բերում Արցախի անվտանգության հարցում Հայաստանի դերակատարությունը»։

Լրագրողները Ռուստամյանից հետաքրքրվեցին, թե արտախորհրդարանական իրենց գործունեությունն ինչպե՞ս են իրականացնելու, և առաջիկայում ՀՀԿ-ի հետ համագործակցություն նախատեսու՞մ են։

«Երբ ՀՅԴ-ն մասնակցում էր վերջին ընտրություններին, կուսակցությունը հայտարարեց, որ կլինի ԱԺ-ում, թե ոչ, շարունակելու է իր գործունեությունը։ Մենք ամենակայացած կուսակցությունն ենք, չկա մեկ այլ կուսակցություն, որ ներկա լինի բոլոր այն վայրերում, ուր հայությունն իր ներկայությունն ամրապնդել է: Մեր ուժի աղբյուրը համասփյուռ հայությունն է, և դրա վրա են հիմնված մեր գաղափարները: Մենք բոլոր էտապներն անցել ենք, և եթե մեր ասելիքը հստակ է, ՀՅԴ-ն դեռ անելիք ունի», -  ասաց նա:

Ինչ վերաբերում է համագործակցություններին, Ռուստամյանը նշեց, ՀՅԴ-ն չի լինելու մի կոալիցիայում, ուր իրենց կարծիքը հաշվի չեն առնելու:

«Հայաստանը պետք է զարգանա: Մենք պետք է իմանանք, որ Արցախում և հայ-թուրքական հարաբերություններում չպետք է զիջենք մեր սերունդների շահերը: Ով սա ընդունի, նրա հետ պատրաստ ենք սերտ համագործակցության, ով չի ընդունի, նրա հետ պատրաստ ենք առճակատման: Մենք պետք է ունենանք այնպիսի մոտեցում, որ ազատագրված Արցախը զարգացման ռեսուրս լինի, ոչ թե բեռ։ Բանակը պետք  է լոկոմոտիվ դառնա, բանակը պետք  է դառնա ոչ միայն սպառող: Մենք չեք լինի մի կոալիցիայում, ուր առանց մեզ որոշումներ կկայացվեն», - նշեց Արմեն Ռուստամյանը:

Անդրադառնալով դեկտեմբերին կայացած խորհրդարանական ընտրություններին, ՀՅԴ գործիչն ասաց. «Այս ընտրությունները լիարժեք պատկերը չէին կարող տալ ըստ քաղաքական ուժերի իրական գործունեության, քանի որ կար պաթոսի և էյֆորիայի վիճակ։ Այս խորհրդարանը պետք է ամեն ճիգ գործադրի, որ այդ հսկայական վստահությունը վերածվի կոնկրետ գործերի։ Հեղափոխություն ասվածը պետք է ամեն մեկն իր կենցաղում զգա»։

Ինչ վերաբերում է վարչապետ Նիկոլ Փաշինյանի հետ հարաբերություններին, Արմեն Ռուստամյանն ասաց. «Մենք, պարոն Փաշինյանի հետ, որևէ խոչընդուտ ու պրոբլեմ չենք տեսնում մեր առջև դրված կարևորագույն ազգային պետական խնդիրները լուծելու առումով»։