Ձեր վստահելի աղբյուրը

«Մենք չէինք սպասում, որ ընդդիմադիր խոսքը կարող է վերածվել տռոլինգի, ձեռ առնելու, մուննաթի, որոշ դեպքերում նաև սպառնալիքների»,- այսօր խորհրդարանական ճեպազրույցների ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը։

Նրա խոսքով՝  նիստից հետո կրկին կուսակցությունը լուրջ ատելության խոսքի հարձակման տակ է. «Որոշակի մեդիա մանիպուլյացիաների և կեղծ լուրերի տարածման հարձակման տակ է, ցավով պետք է նշեմ, որ այստեղ նաև իշխանական լրատվամիջոցները մեծ դերակատարում ունեն։ Մեզ նախկինում որևէ բան չի կանգնացրել և չի կանգնացնելու հիմա, մենք զուսպ, հանգսիտ, հանդարտ, հետևողական, հավատալով մեր գաղափարներին, սկզբունքներին շարունակելու ենք աշխատել»։

Մարուքյանը հայտնեց, որ մոտ օրերս իրենց խմբակցությունը շրջանառության մեջ կդնի սահմանադրական բարփոխումների մի փաթեթ, որը հնարավոր է անել պառլամենտական մակարդակում։

«Անկեղծ պետք է լինեմ և ասեմ, որ փաթեթը պատրաստվել է դեռևս «Ելք» դաշինքի ժամանակ՝ իմ կողմից, բայց ժամանակ չեղավ ներկայացնելու։ Խոսքը խորհրդարանում խմբակցությունների դերի բարձրացման մասին է»,- նշեց Մարուքյանը։

Ինչ վերաբերում է ՀԱԿ՝  կիսանախագահական կառավարման համակարգի վերադառնալուն, պատգամավորն ասաց. «Խորհրդարանական կառավարումը չհամտեսած նորից հետ գանք կիսանախագահականի, կարծում եմ՝ հետընթաց է: Մենք պետք է առաջ գնանք: Այն խեղաթյուրված համակարգը, որ դրել են՝ սուպերվարչապետականը, դրանից պետք է ազատվել ու առաջ գնալ դեպի խորհրդարանական երկիր»։

Էդմոն Մարուքյանն նշեց. «Կառավարության ծրագրին դեմ քվերակելուց հետո «Հայկական ժամանակ» օրաթերթը անանուն խմբագրական է հրապարակել՝ գրելով, որ ընդդիմությունը պատռել է իր դիմակը, իսկ «Ժողովուրդ» օրաթերթն էլ պնդում է, թե ԼՀԿ-ն հանդիպում է նախագահ Սարգսյանի հետ՝ խնդրելով հովանավորել իրենց: Եթե «Հայկական ժամանակը» տենց բան է գրում, հետո ֆեյսբուքյան օգտատերերից ինչի՞ են նեղանամ, որ քրֆում են: Այսինքն, ինչ նախագիծ բերեն, պետք է վախից կո՞ղմ քվեարկենք, որ չասեն Ռոբերտ Քոչարյանն ու Սերժ Սարգսյանն են մեր հետևում: Սա՞ է նոր Հայաստանը, տեղ են հասել, իջեք: Ցավում եմ, որ երբեմնի իմ ընթերցած թերթը մի հատ առաջին կառավարություն-ընդդիմություն բախումից հետո նման խմբագրական է հրապարակում»:

Անդրադառնալով «Իմ քայլը» խմբակցության պատգամավոր Լենա Նազարյանի հնչեցրած այն տեսակետին, թե ընդդիմությունը հնարավորություն է ունեցել հանգիստ հարցեր տալ, և թերևս առաջին անգամ էր, որ քվեարկության հարցում անկաշկանդ էին՝ Մարուքյանը նկատեց. «Ինչո՞ ւ նախկինում չեն կարողացել հարցեր տալ: Ինչ է, եկել են, ծեծե՞լ են, եթե դա պրոգրես է, ապշած եմ։ Սրանից առաջ «Ժառանագությունը» չէ՞ր կարողացել դեմ քվեարկել, կամ ՀԱԿ-ը, կամ Արդարություն դաշինքը, կամ ԱԻՄ-ը»։

Ի պատասխան լրագրողի այն հարցին, թե Ագրարային համալսարանի ռեկտորն ասել է, որ եթե Մարուքյանը չհերքի իր հայտարարությունները, ինքը պատրաստվում է դատի տալ նրան, Մարուքյանն ասաց. «Ես լսել եմ դրա մասին։ Իմ մեջ այդպիսի հին ադվակատական մի բան կա, եթե մեկը պատրաստվում է ինձ դատի տալ, ես սպասում են նամակին։ Ինձ հետ չի կարելի խոսել այդ լեզվով՝ «եթե էս չանեք, էս կլինի»։ Դե դատի տվեք։ Կրկնում եմ, որ ռեկտորը չի հերքել իմ ասածները, որ ռեկտորը նշանակվել է կանոնակարգի փոփոխության արդյունքում»։