Լայչակ. Ադրբեջանում հայտնված Սլովակիայի սպառազինության վերջնական ստացողը եղել է Իսրայելը
«ՀՀ դիվանագիտական առաքելության կողմից մենք տեղեկացվել ենք իրավիճակի վերաբերյալ։ Սլովակիայի ԱԳ և Էկոնոմիկայի նախարարությունը բավական մանրամասն ուսումնասիրել են տվյալ գործը նախորդ տարվա օգոստոսին, որի արդյունքում Սլովակիայի կողմից որևէ սխալ չի գտնվել։ Իսրայելի ու Սլովակիայի միջև առանձին համաձայնագիր է եղել, առանձին փաստաթղթեր, որոնցում ամրագրված է եղել, որ վերջնական ստացող Իսրայելն է»,-այս մասին ասաց Հայաստանում գտնվող Սլովակիայի ԱԳ նախարար, ԵԱՀԿ գործող նախագահ Միրոսլավ Լայչակը՝ պատասխանելով հարցին, որ Սլովակիայի սպառազինությունը հայտնվում է Ադրբեջանում, որը նպաստում է սպառազինությունների մրցավազքին տարածաշրջանում։
ՀՀ ԱԳ նախարար Զոհրաբ Մնացականյանը ևս նշեց, որ այս հարցը երկկողմ օրակարգում եղել է, նաև մեծ ուշադրություն է պահանջում բոլորիս կողմից այն առումով, որ «մենք չենք ողջունում սպառազինությունների մրցավազքը տարածաշրջանում և բավական զգայուն ենք նման հարցերի նկատմամբ»։ ԱԳ նախարարը կարևորեց նաև սպառազնությունների մրցավազքի կանխարգելման հարցում մեր ներդրումը։
Լայչակին ուղղված հարցին, թե ով պետք է ներկայացնի ԼՂ ժողովրդին բանակցություններում, Միրոսլավ Լայչակը նշեց, որ, ամեն դեպքում, ՀՀ կառավարությունը պետք է որոշի ձևաչափերը, բայց որևէ հնարավոր փոփոխություն բանակցությունների ձևաչափում պետք է ընդունելի լինի բոլոր կողմերի համար։
«Մենք բավական ժամանակ հատկացրել ենք այս խնդիրների քննարկմանը և վստահ եմ, որ ՀՀ կառավարությունը ճիշտ բանաձևը ունի բանակցությունների շարունակության վերաբերյալ՝ համապատասխան ձևաչափում»,-ասաց Լայչակը։
Վարչապետ Նիկոլ փաշինյանի կողմից հնչեցվող Մադրիդյան սկզբունքների վերանայման մասին հարցին, թե արդյոք այն չի հանգեցնի բանակցային գործընթացի փակուղի, ՀՀ ԱԳ նախարար Զոհրաբ Մնացականյանը պատասխանեց, որ վարչապետը խոսել է 3 սկզբունքների ու տարրերի տարբերվող մեկնաբանության մասին և որ անհրաժեշտ է հստակեցնել երկու կողմերի մոտեցումները՝ մեկնաբանությունների ընկալումների առումով։
Մնացականյանը նշեց, որ վարչապետը որևէ կերպ ազդակ չի տվել, որ սա Մադրիդյան սկզբունքների վերանայում է, այլ հակառակը, տվել է ազդակ, որ անհրաժեշտ է աշխատել՝ բացառելու այնպիսի մենաբանությունները, որոնք միակողմանի են դարձնում փաթեթը և խնդիր են առաջացնում ընկալումների առումով, թե ինչ է սա նշանակում։
Լայչակին ուղղված հարցը, որ ԵԱՀԿ գործող նախագահը նշում է, որ քաղաքականության կենտրոնում պետք է լինի մարդը, արդյոք կցանկանար ուղղակի գնալ Ղարաբաղ ու ուղղակի տեսնել, թե ինչ են մտածում մարդիկ, ինչպես են ապրում, Սլովակիայի ԱԳ նախարարն ասաց, որ պատրաստ է անել ամեն ինչ, որ օգտակար լինի ու օգնի այս հակամարտությանը լուծում գտնելու հարցում։
«Ինչ վերաբերում է կոնկրետ քայլին, ես ամբողջովին վստահում եմ ԵԱՀԿ Մինսկի խմբի համանախագահներին ու դեսպան Կասպրչիկին, այնպես որ ես ամեն ինչ անում եմ նրանց հետ սերտորեն կորդինացնելով»,-ասաց Լայչակը։
Հարակից հրապարակումներ`
- Լայչակ. ԼՂ կարգավորման գործընթացին դրական լիցքեր հաղորդելու հիմքերը կան
- Զոհրաբ Մնացականյան. ԵԱՀԿ տարածաշրջանում չեն կարող լինել գորշ գոտիներ
- Բալայան. Սլովակիայի կողմից Ադրբեջանին ապօրինի զենք փոխանցելու խնդիրը բարձրացվել է ԵԱՀԿ-ում