Ձեր վստահելի աղբյուրը

«Դետալներով չգիտեմ, թե Ալեքսանդր Ազարյանը ինչ ճնշումների է ենթարկվել, միայն գիտեմ այն, ինչ հրապարակային է»,- այս մասին այսօր լրագրողների հետ հանդիպման ժամանակ ասաց ՀՀ երկրորդ նախագահ Ռոբերտ Քոչարյանի փաստաբանական խմբի անդամ Հայկ Ալումյանն՝ անդրադառնալով հարցին, թե կոնկրետ ինչ ճնշումների է ենթարկվել Ռոբերտ Քոչարյանին նախորդ տարվա օգոստոսին ազատ արձակած Վերաքննիչ քրեական դատարանի դատավոր Ալեքսանդր Ազարյանը։

«Ռոբերտ Քոչարյանի ազատ արձակվելուց  չորս օր հետո այդ դատավորի նկատմամբ հրապարակում ատելության խոսք է ասվում մի անձի կողմից, որն այդ ժամանակ մեծ վտսհություն ուներ ժողովրդի շրջանում։ Համոզված եմ, որ այդ ատելության խոսքը որքան ուղղված էր դատավոր Ազարյանի դեմ, նույնչափ հանդիսանում էր մեսիջ Վճռաբեկ դատարանի դատավորներին, որոնք հետագայում պետք է քննեին դատախազի բողոքն Ազարյանի որոշման դեմ։ Այդ ամենը պարզապես չէր կարող չազդել Ազարյանի վրա»,- նշեց Հայկ Ալումյանը։

Ըստ նրա՝ ատելության խոսք եղել է նաև սոցիալական ցանցերում, և դրանից ավելի մեծ ճնշում հնարավոր չէ պատկերացնել։ Նա նաև նշեց, որ այդ  ամենը տեսնելուց հետո իշխանությունները որևէ քայլ չեն ձեռնարկել։

«Բարձրագույն դատական խորհուրդը ոչինչ չձեռնարկեց, ոչինչ չարեցին նաև գործադիր մարմնի ներկայացուցիչները, սա մեսիջ էր Վճռաբեկ դատարանի դատավորներին, այսինքն՝ նույն սպառնալիքները կլինեն նաև նրանց հանդեպ, եթե նրանք անեն նույնը, ինչ արեց դատավոր Ազարյանը»,- նշեց Հայկ Ալումյանը՝ հավելելով, թե դա էր պատճառը, որ մի շարք դատավորներ ինքնաբացարկով «գործը գցեցին» իրենց վրայից:

Ինչ վերաբերում է նախորդ իշխանություններից կախում ունեցած դատավորներին, փաստաբանը նշեց, որ ոչ բոլոր դատավորներն են ենթարկվողի կարգավիճակում, կան դատավորներ, որոնք պատրաստ են անգամ ենթարկվել հետապնդումների, բայց իրենց մասնագիտական պարտականություններին հակասող որոշումներ չընդունել։ «Ցավոք, դրանք քիչ են»,- ընդգծեց նա։

«Խոսենք այն դատավորների մասին, որոնք «ճկուն ողնաշար» ունեն և պատրաստ են հարմարվել պատվերներին։ Նրանք կախում ունեն ոչ թե այն իշխանություններից, որոնք իրենց ժամանակին նշանակել են, այլ նրանցից, որոնք տվյալ պահին ունեն իշխանություն և կարող են փորփրել ինչ-որ դատավորի անցյալը և նրա նկատմամբ հարուցել քրեական գործ։ Այդ «ճկուն ողնաշար» ունեցող դատավորներն ամեն պահի պատրաստ են կատարելու տվյալ պահի իշխանության պատվերը։ Հարմարվող, պատվեր կատարող ու կոռումպացված դատավորներն իրականում նույնն են, և նրանք միշտ կախված են տվյալ պահի իշխանություններից»,- ասաց  Հայկ Ալումյանը։

Անդրադառնալով վարչապետ Նիկոլ Փաշինյանի հայտարարությանը, թե Մարտի 1-ի գործը  բացահայտված է, փաստաբանը նշեց՝ ինքը չի կարծում, որ այդ գործը ողջ ծավալով բացահայտվել է։

«Անգամ չեմ համարում, որ դա բացահայտված է։ Ո՞նց կարելի է խոսել, որ Մարտի 1-ի գործը բացահայտվել է, երբ գոնե մի հոգու սպանողը դեռ բացահայատված չէ, և սպանողին հրաման տվողը և այդ հրաման տվողի հրաման տվողը բացահայտված չէ: Հավանաբար, պարոն Փաշինյանը ելնում է այն կանխավարկածից, որ բոլոր սպանվածները սպանվել են իշխանությունների անունից գործող ուժերի կողմից, բայց դա ինձ համար շատ մեծ  հարց է։ Մեծ հարց է՝  արդյոք  ցուցարաների մեջ եղած զոհերն իշխանական ուժերի կողմից են սպանվել։ Մինչև 10 հոգու սպանողները չեն հայտնաբերվել, պետք չէ ասել, որ Մարտի 1-ը բացահայտված է։ Միգուցե արժե ընդունել, որ դա լեզվի սայթաքում է եղե՞լ»,- ասաց փաստաբանը։

Դիտարկմանը, թե վարչապետն օրեր առաջ հայտարարել է, որ Մարտի 1-ի պարկուճները փոխվել են, Հայկ Ալումյանը պատասխանեց. «Փաշինյանն այդ մասին ասել է 2018 թ-ի օգոստոսին, այսինքն՝ այդ ժամանակ պարկուճները փոխված լինելու վարկածը գոյություն չուներ և այդ մասին ոչ մեկ չգիտեր։ Պարկուճները փոխվել են, թե ոչ, կպարզվի քննության արդյունքում։ Իսկ եթե Փաշինյանը նկատի ունի, որ պարկուճները փոխելու արդյունքում հնարավոր չէ գործը բացահայտել, էլի չպետք է ասի, որ Մարտի 1-ի գործն ամբողջությամբ բացահայտված է, պետք է ասի՝ հնարավոր չեղավ բացահայտել։ Բացի այդ, մեր իրավապահ մարմինները հսկայական փորձ ունեն սպանություն բացահայտելու՝ անգամ այն դեպքում, երբ պարկուճ , ընդհանրապես ոչ մի ապացույց տեղում չի հայտնաբերվել։ Շատ սպանություններ բացահայտվում են առանց պարկուճի, հրազենի, տեսանյութերի: Իսկ այստեղ կա փաստ, որ այդ ամենը տեղի է ունեցել հարյուրավոր մարդկանց աչքի առաջ»։