Թինք-թանքը կարող է լինել հաջողված, եթե պահպանում է անկախության և ազատության սկզբունքը. Արմեն Սարգսյան
Հանրապետության նախագահ Արմեն Սարգսյանը վարչապետ Նիկոլ Փաշինյանի հետ նախօրեին Երևանում մասնակցել է «Օրբելի» վերլուծական-հետազոտական կենտրոնի բացման հանդիսավոր արարողությանը։
ՀՀ նախագահի աշխատակազմի հասարակայնության հետ կապերի վարչությունից հայտնում են, որ Արմեն Սարգսյանը պատրաստակամություն է հայտնել կիսվել այս ոլորտում իր երկար տարիների և փորձառությամբ, և կապերով:
Նախագահն ասել է, որ նմանատիպ, ինչպես ընդունված է կոչել միջազգային հարթակներում, թինք-թանք կենտրոններն իրենց մեջ ներառում են բազմաթիվ որակներ, վերլուծական, խորհրդատվական, հանրային կարծիք ձևավորելու, գիտահետազոտական, կրթական աշխատանք և այլն:
«Թինք-թանքերը պատմական շատ հին արմատներ ունեն։ Նրանք նաև իրենց ադմինիստրատիվ կառույցերով կարող են լինել շատ տարբեր: Դրանք կարող են կապված լինել կառավարության, պետության, կուսակցությունների հետ, ունենալ պետական աջակցություն, կարող են լինել անկախ, կարող են կապված լինել զանազան համալսարանների, գիտական կենտրոնների, անկախ կենտրոնների հետ և այլն:
Սա նոր երևույթ չէ, քանի որ խորհրդատվությունը պատմականորեն եղել է միշտ՝ սկսած փարավոններից, Տիգրան Մեծից, սակայն լավագույն օրինակներից մեկն անտիկ աշխարհում, իհարկե, հունական թինք-թանքերն են: Խոսքը փիլիսոփայական դպրոցների մասին է: Այդ դպրոցներն ունեին հսկայական ազդեցություն և՛ Աթենքի, և՛ հին հունական քաղաքների հանրության վրա: Ոչ միայն ազդեցություն ունեին, այլև հիմնարար էին, ձևավորում էին այն փիլիսոփայությունը, այն մտածելակերպն ու մշակույթը, որ հիմք էին դառնում հին Հունաստանի պետության համար:
Երբ խոսում ենք առաջին թինք-թանքի ղեկավարների մասին, իմ կարծիքով, այդ անունների շարքը հսկայական է, գուցե սկսենք նույն Արիստոտելից, Պլատոնից և մյուսներից: Չմոռանանք, որ նույնիսկ Ալեքսանդր Մեծը նմանատիպ թինք-թանքի փիլիսոփայական դպրոց է անցել:
21-րդ դարում ունենք թինք-թանքերի հսկայական սպեկտր, հսկայական քանակ: ԱՄՆ-ում դրանց թիվը 2000-ից ավել է, տարբեր ոլորտների: Հնդկաստանը և Չինաստանն ունեն մոտ 500, նրանց հաջորդում են Մեծ Բրիտանիան, Ֆրանսիան, Գերմանիան և այլն՝ սկսած պետական թինք-թանքերից, վերջացրած համալսարանների, անկախ կենտրոնների, ոչ պետական կառույցների հետ կապվածներից:
Մի բան հստակ է՝ բոլոր այսպիսի կառույցները հաջող և ազդեցիկ են լինում, եթե մի քանի սկզբունք են պահում: Դրանցից մեկը նվիրվածությունն է ժողովրդավարությանը: Հունականը դրա շատ պարզ օրինակ է:
Երկրորդը և երրորդը մտքի անկախությունն ու ազատությունն են: Անկախ նրանից, թե ով է հիմնադիրը, թինք-թանքը կարող է լինել հաջողված, եթե պահպանում է անկախության և ազատության սկզբունքը»,- ,-ասել է նախագահ Սարգսյանը:
Կառավարության հասարակայնության հետ կապերի վարչության փոխանցմամբ էլ, բացմանը ներկա ՀՀ վարչապետ Նիկոլ Փաշինյանն էլ նշել է. «Մեզ համար կարևոր առաջնահերթություն է համագործակցությունը Հայաստանի փորձագիտական ներուժի հետ: Մեզ համար շատ կարևոր է, որպեսզի համագործակցության կամուրջներ ստեղծենք նմանատիպ այլ հանրային, մասնավոր կառույցների հետ: Մենք ամենևին էլ այս կենտրոնը, որը վարչապետի աշխատակազմում է, չենք համարում ինտելեկտուալ արտադրանքի միակ աղբյուրը»:
Վարչապետն ընդգծել է, որ կենտրոնը պետք է համագործակցության կամուրջներ և մեխանիզմներ ունենա վերլուծական այլ կենտրոնների հետ, այդ թվում՝ մասնավոր:
«Երկրի իշխանությունը պետք է առկա խնդիրների շուրջ համախմբի մտավոր ներուժը: Սա մեր առաջին քայլն է այդ ճանապարհին: Հաջորդ քայլերով պետք է փորձենք հստակեցնել մեր համագործակցության մեխանիզմներն այլ վերլուծական կենտրոնների հետ, որոնք գոյություն ունեն կամ որոնք նոր կստեղծվեն: Այն մեծ մտավոր աշխատանքը, որի պահանջը և օրակարգը կա այսօր բոլորիս ընդհանուր սեղանին՝ պետք է միասին կատարենք»,- ասել է Նիկոլ Փաշինյանը:
Վարչապետը շնորհավորել է «Օրբելի» կենտրոնի բացման առթիվ և վերջինիս վերլուծաբաններին ու փորձագետներին մտավոր գործունեության մեջ մաղթել հաջողություններ: «Այն ամենը, ինչ իրականում տեղի է ունենում մեր շուրջը, նախ տեղի է ունենում մեր մտքում և հետևաբար մեր միտքը պետք է լինի կառուցողական, ճկուն, հզոր ու կարողանա հաղթահարել բոլոր արգելքները: Ես որևէ կասկած չունեմ, որ այդպես էլ կլինի»,- ասել է Նիկոլ Փաշինյանը:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց