Ձեր վստահելի աղբյուրը

Քաղաքապետ Հայկ Մարությանի մամուլի խոսնակ Հակոբ Կարապետյանի՝ ֆեյսբուքում հրապարակած տեղեկատվությունից  հետո Երևանի ավագանու անդամներն այսօր առավոտյան բողոքի ակցիա են նախաձեռնել կառավարության շենքի դիմաց։ Հիշեցնենք, քիչ առաջ շենքի ներսում մեկնարկել է գործադիր մարմնի նիստը։

Կարապետյանը հայտարարել էր, որ ապրիլի 18-ի նիստում կքննարկվի «մեկ անձից» գնման ընթացակարգով Երևան համայնքին աղբատար մեքենաների ձեռքբերումը կազմակերպելու հնարավորություն տալու հարցը։

«Լույս» խմբակցության անդամ Դավիթ Խաժակյանը պնդում է, այդ մեքենաների ձեռքբերումը տեղի է ունեցել հակամրցակցային պայմաններում։

«Ինչպես դասականն էր ասում, կոռուպցիոն հո պոզով պոչով չի՞ լինում, թող քննեն պատկան մարմինները։ Հեմոդիալեզի այն դեպքը, որ քննվում է ու ներկայացվում է մամուլում, հենց այս դեպքի նման է։ Գրել են մեկ կազմակերպության համար տեխնիկական բնութագրեր և այդպիսի գնում էլ ցանկանում են իրականացնել։ Պարզապես այն դեպքում եղավ ԱԱԾ միջամտությունը և պրոցեսը կանգնեցվեց, այս դեպքում եղավ կառավարության միջամտությունը և պրոցեսին ընթացք տրվեց»,-ասաց նա։

Ավագանու անդամը  կոչ է անում իրավապահներին հակամարցակցային պայմանների մասին իր հայտարարությունն ընդունեն բաց հաղորդում, պատրաստ է իր ձեռքի տակ եղած բոլոր նյութերը, իր վերլուծություններն ու դիտարկումները տրամադրել նրանց։

«Ես կարծում էի, որ եթե գնման գործընթացը կանգնած է ու եթե նույնիսկ եղել է համաձայնություն, ապա այն չեղարկված է, և ներողություն բառիս համար, քաղաքապետարանը զոռբայությամբ չի ցանկանում հենց այդ մակնիշը ձեռք բերել, բայց տեսնում ենք, որ մղումը հստակ է»,-նշեց նա։

Հարցին, թե կապ տեսնում եք «ԿամԱԶ » մեքենաներ վաճառած ընկերության ու քաղաքապետարանի միջև, Խաժակյանն ասաց, տարբեր բաներ են խոսում, բայց ինքը չի ցանկանում նման խոսակցություններով առաջնորդվել։

«Հակամրցակցային համաձայնություններն իրենց բնույթով դժվար բացահայտվող են, դրանք պարզ են ակնհայտ են դառնում արդեն կայացված որոշումներից ու պայմանավորվածություններից։ Գիտեք, ընթացքում պարզ կլինի, թե որը ումն է, ով երբ է ում հետ խոսել։ Ես շարունակում եմ ասել, որ «ԿամԱԶ » գնելը որոշակի առումով քմահաճույք է, հակամրցակցային հնարավոր համաձայնության արդյունք է»,-հայտարարեց ավագանու ընդդիմադիր անդամն ու հիշեցրեց, այդպես ձեռք բերվեցին նաև ձնամաքրման մեքենաները։

Քաղաքապետարանից մանրամասնել էին, որ  այսօրվա նիստում որոշման նախագծի ընդունման անհրաժեշտությունը պայմանավորված է նրանով, որ Երևանի քաղաքապետարանի՝ այս տարվա փետրվարին կազմակերպած աղբատար ավտոմեքենաների գնման գործընթացը բողոքարկվել է, արդյունքում հարցը քաղաքապետարանի հայցով գտնվում է դատական վարույթում, և հստակ չեն դատարանի կողմից կայացվող վճռի ժամկետները:

«Երևան համայնքում էապես վատթարացել է սանիտարական վիճակը` աղբահանությունը ոչ պատշաճ իրականացնելու հետևանքով, և դրանով պայմանավորված՝ առաջացել է Երևանի քաղաքապետարանի ուղիղ միջամտության կարիքը, ուստի աղբատար ավտոմեքենաների ձեռքբերումը գնման մրցակցային ընթացակարգով ժամկետների առումով կառաջացնի համայնքի սանիտարական կոլապս: Հաշվի առնելով, որ ժամկետների սղության պատճառով հնարավոր չէ կազմակերպել մրցութային կարգով նոր գնման գործընթացներ, առաջարկվում է աղբատար ավտոմեքենաների ձեռքբերման շրջանակում Երևան համայնքի կողմից ապրանքների ձեռքբերումը կազմակերպել մեկ անձից գնման ձևով»,-հիմնավորել էին քաղաքապետարանից։

Դրան արձագանքեց «Սանիթեք» ընկերությունը։ Կառավարության դիմաց ակցիայն մասնակցող ավագանու «Լույս» խմբակցության անդամներից Անի Խաչատրյանը լրագրողների հետ զրույցում ասաց, իրենց համար նոր բաներ կային ընկերության ասածի մեջ։

«Ընկերությունը քաղաքապետարանին ասաց, ձեր պարտականությունների մի մասը դուք չեք կատարում ընկերներ, դուք այն կատարեք, նոր ինձանից պահանջեք։ Մենք ինքներս տեղյակ չէինք։ Ինչպես տեսնում ենք, քաղաքային իշխանությունը փակված է միայն «Իմ քայլը» խմբակցության մեջ, շատ բանից մենք ու հասարակությունը տեղյակ չենք, բաներ ենք իմանում ավագանու անդամների ստատուսներից»,-ասաց Անի Խաչատրյանը։