Ձեր վստահելի աղբյուրը

Արցախի հերոս,  «Ոսկե արծիվ» շքանշանակիր, գեներալ-լեյտենանտ Արշավիր Ղարամյանը գրում է, որ դաշտ են նետվել դավադրության տեսությանը բնորոշ մտքեր ու դավաճանական թեզեր։

«Մայիսի 7-ից սկսած, երբ հայտնի դարձավ, որ Արցախի նախագահ Բակո Սահկյանը և Արցախի երկրորդ նախագահ Արկադի Ղուկասյանը խնդրանքով դիմել են ՀՀ գլխավոր դատախազ Արթուր Դավթյանին` Արցախի առաջին նախագահ և ՀՀ երկրորդ նախագահ Ռոբերտ Քոչարյանի խափանման միջոցը՝ կալանավորումը փոխելու այլ խափանման միջոցով, որոշ ուժերի կողմից լրատվական դաշտ նետվեցին Արցախի և արցախցիների դեմ դավադրություների տեսությանը բնորոշ մտքեր և լևոն տեր-պետրոսյանական, հախվերդյանական ու ղուշչյանական ոճով «թեզեր»:

Կրքերը ավելի բորբոքելու համար որոշ անուղեղների կողմից նորից դաշտ նետվեցին դավաճանական թեզեր` «ղարաբաղցիները թուրք են, իսկ արցախցիները հայ», «ինչու են մեր երեխաները ծառայում արցախում», «2016 թ.-ի ապրիլին ընդամենը մեկ արցախցի է զոհվել» և այլ աբսուրդի հասնող մտքի «գոհարներ»:

Շատ դեպքերում խայծը կուլ են տալիս նաև պետական պաշտոն զբաղեցնող որոշ անձինք, ինչպես նաև իրենց փորձագետ համարողներ, որոնց արտահայտած անձնական կարծիքները մեդիա դաշտում ու սոցիալական ցանցերում մանիպուլյացիաների ենթարկվելով հանգեցնում են խառնաշփոթության («Яблоко раздора»):

Կոչ եմ անում բոլորին ականջալուր լինել կրտսեր ընկերոջս՝ Տիգրան Մկրտչյանին /Տիգրան Մկրտչյան և վերջ դնել այս ազգակործան ու պետականակործան գործընթացներին` ամբողջ ներուժը Հայաստանին(ՀՀ և ԱՀ) սպասվող մարտահրավերներին դիմակայելուն ուղղելով:
«Հայաստանն ու Արցախը եղբայրական երկրներ չեն, հայաստանցիներն ու արցախցիները եղբայրներ չեն:

Հայաստան ու Արցախ երկու եղբայրական երկրներ չեն, որովհետև կա մեկ երկիր հայկական` ՀԱՅԱՍՏԱՆ, երբ ենք վերջապես սովորելու երկիրն ու պետությունը տարբերել: Հայաստան երկրի մեծ մասը զավթված, օկուպացված է օտար, ոչ հայկական պետությունների կողմից, իսկ Հայաստան երկրի հայահպատակ հատվածում կա ՀՀ և ԱՀ, ԱՀ-ի հետ կապված տարբեր կարծիքներ կան, բայց խոսքը դրա մասին չէ: Այս համատեքստում անընդունելի է, երբ ՀՀ ն անվանում են Մայր Հայրենիք. հայրենիքը մեկն է և հայր, մայր, դուստր չկա:

Հայաստանցին ու արցախցին էլ եղբայրական ժողովուրդներ չեն, որովհետև մենք մեկ միասնական մարմին, սիրտ, հոգի ու արյուն ենք, մենք ՀԱՅ ենք»,-գրել է Ղարամյանը։