Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը լրագրողների հետ հանդիպմանը հիշեցրեց՝ Դատական օրենսգրքի 51-րդ հոդվածը սահմանում է, որ դատավորի նկատմամբ  քրեական հետապնդում կարելի է իրականացնել միայն Բարձրագույն դատական խորհուրդի համաձայնությամբ։

Մինչդեռ ընդհանուր իրավասության դատարանի դատավոր Դավիթ Գրիգորյանի աշխատասենյակի խուզարկության ժամանակ դատախազությունը չի ունեցել ԲԴԽ համաձայնությունը։

«Ես դա ասում եմ դատախազության հաղորդագրությունից, որովհետև ասվում է՝ մենք իրազեկեցինք Բարձագույն դատախան խորհրդին, այնինչ դատախազությունը պարտավոր էր ունենալ ԲԴԽ համաձայնությունը նախապես»,-ասաց փաստաբանը։

Ալումյանը մանրամասնեց, իրենց թիմին հուզում է դատավոր Դավիթ Գրիգորյանի նկատմամբ հետապնդումները մի քանի պատճառով։

«Նախ հենց էս պահին Դավիթ Գրիգորյանի վարույթում է գտնվում պարոն Քոչարյանի ու մյուսների գործով քրեական գործը։ Երկրորդ, մենք չենք կարող պարզ չգիտակցել, որ Դավիթ Գրիգորյանի հետ կատարվածն ուղերձ է բոլոր դատավորներին։ Բոլոր դատավորներին համարյա թե բաց ըեքստով ասվում է, չհամարձակվեք այդ գործով որևէ որոշում կայացնել  պարոն Քոչարյանի օգտին, այլապես կհայտնվեք դատավոր Դավիթ Գրիգորյանի իրավիճակում։ Սրանից ավելի պարզ մեսիջ հնարավոր չէ հղել»,-ասաց նա։

Փաստաբանը հիշեցրեց, Քոչարյանի պաշտպանները հունիսի 27-ին միջնորդություն են ներկայացրել ընդհանուր իրավասության դատարան՝ կալանքը գրավով փոխարինելու վերաբերյալ։

«Հիմա հուլիսի 20-ն է, անցել է 24 օր, դեռ մեր միջնորդությունը չի քննվել։ Այնինչ, Քրեական դատավարության օրենսգրքի 102 հոդվածի 2-րդ մասում ասված է, որ միջնորդությունը և պահանջները պետք է քննվեն անմիջապես դրանք ներկայացվելուց հետո։ Այսինքն, օրենքն ասում է մի բան, պարոն Քոչարյանի նկատմամբ կատարվում է բոլորովին ուրիշ բան»,-ասաց Ալումյանը։

Նա հիշեցրեց, միջնորդության քննումը հնարավոր դարձնելու համար փաստաբանները դատավոր Դավիթ Գրիգորյանին ներկայացրել են Քոչարյանի գործի նյութերի կրկնօրինակը, ինչին հետևել է խուզարկությունը, ու դատավորի աշխատասենյակից տարել են Ռոբերտ Քոչարյանի գործին առնչվող ամեն ինչ։

«Այսքանից հետո ինչ-որ մեկը մեզ պե՞տք է ասի, որ Դավիթ Գրիգորյանի հետ կատավածը կապ չունի՞ պարոն Քոչարյանի գործի հետ։ Ոչ միայն կապ ունի, այլև ուղղակիորեն բխում է պարոն Քոչարյանի գործից»,-նշեց Ալումյանը։