Բուլղարիայի ԱԳՆ․ Ինձանից պահանջվեց 10 ժամ այստեղ հասնելու համար, այնինչ կարող էր լինել 2,5 ժամ
«Բուլղարիան ու Հայաստանը շատ ընդհանրություններ ունեն, ոչ միայն աշխարհագրական, այլ նաև կրոնը և այն փաստը, որ Բուլղարիայում ապրում են մոտ 11 հազար ծագումով հայեր, մեզ մոտեցնում է։ Նրանք շատ լավ դեսպաններ են Բուլղարիում»,-այսօր մամուլի ասուլիսին հայտարարեց Երևանում պաշտոնական այցով գտնվող Բուլղարիայի Հանրապետության փոխվարչապետ, ԱԳ նախարար Եկատերինա Զախարիևան։
Զախարիևան նշեց, որ Բուլղարիայի համալսարանում կարելի է սովորել հայերեն, ինչպես նաև կա 8 դպրոց, որտեղ ևս սովորում են հայերեն։
Զախարիևան նշեց, որ այսօր Հայաստանի հետ ստորագրել են 2 կարևոր համաձայնագրեր՝ ՀՀ-ԵՄ ռեադմիսիայի արձանագրությունը, որը նախատեսում է ԵՄ-ում անօրինական գտնվող անձանց հետընդունում, և տրանսպորտային միջազգային համաձայնագիր, որը փոխարինելու է 1995թ․-ի պայմանագրին, որը պետք է բարելավի տրանսպորտային հնարավորությունները։
«Ինձանից պահանջվեց 10 ժամ այստեղ հասնելու համար, այնինչ, մենք այնքան մոտ ենք։ Եթե մենք ունենանք ուղիղ թռիչք, ապա կարելի էր այստեղ հասնել 2,5 ժամում։ Կարծում եմ, մենք իրոք պետք է աշխատենք սա իրականություն դարձնելու ուղղությամբ»,-ասաց Բուլղարիայի նախարարը, հավելելով, որ կա միայն չարտերային թռիչքներ ամռանը դեպի Բուրգաս և Վառնա, սակայն չկա թռիչք դեպի Սոֆիա։
Նախարարի խոսքերով, դժվար է պատկերացնել գործարար, որը պատրաստ է 10 ժամ ծախսել՝ հանդիպելու գործընկերներին։ Նախարարը նշեց, որ ՀՀ իր գործընկերոջ հետ քննարկել են նաև առևտրային կապերի բարելավման հարցերը, անհրաժեշտ է զարգացնել բժշկության և տեղեկատվական տեխնոլոգիաների սեկտորները։
Բուլղարիայի ԱԳ նախարարը նշեց, որ իր երկիրը 3-ն էր, որ վավերացրեց ՀՀ-ԵՄ Համապարփակ և ընդլայնված գործընկերության համաձայնագիրը, քանի որ կարևորում են Հայաստանի կապերը ԵՄ-ի հետ։ Նախարարի խոսքերով, իրենք քննարկում են, թե ինչպես երկկողմ մակարդակով աջակցություն ցուցաբերեն ՀՀ կառավարությանը՝ արդարադատության, տնտեսական համակարգի բարեփոխումների ծրագրերին։
Պատասխանելով Հայաստանի հետ ԵՄ վիզաների ազատականացման հարցում Բուլղարիայի դիրքորոշման հարցին, Զախարիևան ասաց, որ այս հարցում Բուլղարիան Հայաստանի ուժող աջակիցներից մեկն է, որի ուղղությամբ այսօր ստորագրված ռեադմիսիայի արձանագրությունը ևս մեկ քայլ առաջ էր։
«Մենք կողմ ենք, որ Հայաստանի հետ վիզաների ազատականացման երկխոսությունը սկսվի»,-ասաց Զախարիևան։