Ձեր վստահելի աղբյուրը

Մենք նախաձեռնություն ենք սկսում ԱԱԾ շենքից, որպեսզի ցույց տանք, որ չենք վախենում ԱԱԾ-ից։ Մենք չենք վախենում այն մարդկանցից, որոնց կապն այս կառույցի հետ կասկածելի է։ Մենք չենք վախենում այն ատելության մթնոլորտից, որ սերմանվում է ֆեյսբուքում։  Այս մասին այսօր լրագրողների հետ զրույցում ասաց «Ռեստարտ» ուսանողական, քաղաքացիական նախաձեռնության անդամ Դավիթ Պետրոսյանը՝ հայտարարելով նոր նախաձեռնության մեկնարկի մասին։

Պետրոսյանի խոսքով, շարունակում են գոյություն ունենալ ուժային կառույցներ, որոնցից մարդիկ վախենում են, և որոնց անգործության պատճառով ատելության մթնոլորտ է տարածվում սոցիալական ցանցերում։

«Մենք շարունակում ենք ունենալ ուժային կառույցներ, որոնցից ժողովրդի վախը շատ է։ Սա արդյոք ճիշտ է, արդյոք քաղաքացիները պետք է վախենան ԱԱԾ-ից, ոստիկանությունից, դատախազությունից և դատարաններից, այն պարագայում, երբ իրենք ցանկանում են, որ իրենց ազատություններն ու իրավունքները այդ կառույցների կողմից պաշտպանված լինեն: Այն վայրահաչոցներն ու վիրավորանքները, մեր ծնողների հասցեին վիրավորանքներն ու սեռական հայհոյանքները տեղի են ունենում նաև այս մարմնի անգործության պատճառով»,-ասաց նա։

Ըստ Դավիթ Պետրոսյանի, շարունակում են արդիական մնալ այն խոսակցությունները, որ քաղաքացիների հեռախոսները գաղտնալսվում են. «Բոլորի մոտ կա մտավախություն՝ սկսած քաղաքացիներից, վերջացրած պետական պաշտոնյաներով։ Ինչ-որ մեկը կարող է պատասխանել իմ այս հարցին՝ ինչ իրավունքով, ինչ նպատակով ինչ-որ մեկը կարող է լսել իմ հեռախոսը։ Կամ, վերջիվերջո, եթե լսում են, գոնե թող հրապարակեն՝ ինչի մասին ենք մենք խոսում»:

Որպես պետական կառույցների «անգործության» հետևանք` Պետրոսյանը դիտարկում է նաև այն, որ մինչև հիմա բացահայտված չեն մարդիկ, ովքեր մարտի 4-ին նկարահանել են իրենց գործողությունները՝ կապված Նարեկ Մալյանին աղբաման նետելու փորձի հետ։

«Մինչև հիմա չբացահայտված են մնում այն 2 անձինք, ովքեր մեր հայտնի քրեական գործով նկարում էին։ Ինչպես գիտեք՝ մարտի 4-ին մենք ցանկացանք աղբարկղ նետել մի վիդեոբլոգերի, ով հրապարակային ասել էր, որ մենք անբարոյականի զավակներ ենք և հրապարակայնորեն ասել էր, որ ցանկանում է իմ մայրիկին: Դրանից հետո ոչ մի արձագանք չի եղել այս ատելության խոսքի սերմանման վարքագծի հետ կապված։ Ու շատ զարմանալի է, բայց արդեն ոչ կասկածելի, որ այդ ժամանակ իրավապահ մարմինները սպասում էին, որ մենք ինչ-որ գործողություն իրականացնենք, նոր իրենք արձագանքեն։ Զարմանալի է՝ ինչու իրավապահ մարմինների կողմից նկարահանված տեսանյութերը կցված չեն քրեական գործերին, զարմանալի է, թե ինչու մինչև այժմ բացահայտված չեն այն 2 անձինք, ովքեր մեր գործողությունը դեռ չսկսված, արդեն քաղաքացիական հագուստով նկարահանում էին. այդ մարդկանց ինքնությունը պարզված չէ։
Մենք ուրախ ենք, որ այդ գործի մեջ ընկանք, և այդ պատիվը ունենալու ենք, որպեսզի բացահայտենք՝ ինչով են զբաղված այս կառույցները»,-հավելեց Պետրոսյանը։

Նրա խոսքով, անընդունելի է ֆեյքերի կողմից հայհոյախառն մեկնաբանությունների անտեսումը. «Ֆեյքեր չեն նրանք, մարդիկ են, որ փորձում են երկրում ստեղծել անպատժելիության մթնոլորտ, փորձում են սերմանել ատելություն։ ԱԱԾ-ն պարտավոր է քայլեր ձեռնարկել և իմանալ՝ ովքեր են կանգնած այդ ֆեյքերի հետևում. Հայաստանում ծնողական հայհոյանքից ավելի մեծ բռնություն լինել չի կարող, ուրեմն ԱԱԾ-ն իրականացնում է անգործություն։ Պարզ ճշմարտություն է՝ եթե պետական ինստիտուտները չեն իրականացնում իրենց պարտավորվածությունը՝ պաշտպանելու սեփական քաղաքացիների անվտանգությունը, ապա իրենց անգործությամբ մասնակից են դառնում այդ հանցագործություններին, որոնք տեղի են ունենում»: