Բյուջեի վերաբերյալ ԲՀԿ-ի 46 առաջարկությունից ոչ մեկը դրական պատասխան չի ստացել. Սերգեյ Բագրատյան
2020 թվականի պետական բյուջեի նախագծի վերաբերյալ «Բարգավաճ Հայաստան» խմբակցությունը ներկայացրել է 46 առաջարկություն, սակայն դրանցից որևէ մեկը դրական պատասխան չի ստացել։ Այս մասին այսօր խորհրդարանում հայտարարեց խմբակցության անդամ Սերգեյ Բագրատյանը։
Մասնավորապես, ըստ նրա, առաջարկել է ֆինանսավորել երեք ծրագիր, որոնցից մեկը վերաբերում է Եղեգնաձոր քաղաքի Նորավան համայնքի կոյուղագծի կառուցմանը։
«Քաղաքացիները դիմեցին վարչապետին՝ խնդրելով, որ կոյուղագծի համար ֆինանսական միջոցներ հատկացնեն, քանի որ 700 բնակիչ ունեցող թաղամասը կոյուղագիծ չունի։ Վարչապետը խոստացավ ուսումնասիրել հարցը և պատասխանել քաղաքացիներին։ Ես դա որպես առաջարկ ներկայացրել եմ, որպեսզի ներառվի բյուջեի նախագծի մեջ և 2020 թ-ին գումար հատկացվի»,-նշեց պատգամավորը։
Երկորդ առաջարկն, ըստ նրա, վերաբերում է Արտաբույնք համայնքի դպրոցի հիմնանորոգմանը, երրորդը՝ Վայք-Արին ճանապարհի վերանորոգմանը։
Սերգեյ Բագրատյանի խոսքով՝ պատասխաններից չի կարողանում կողմնորոշվել, թե ինչ ընթացք է ստացել իր դիմումը։
«Կարծում եմ՝ նման խնդիր կունենան նաև այլ պատգամավորներ, քանի որ ի պատասխան դիմումի նշվում է՝ Ձեր բարձրացրած խնդիրը տեղ կգտնի 2021-2023 թթ-ի բյուջեի կարգավորումների մեջ։ Հիմա չգիտեմ՝ դա ինչ պատասխան է։ Այսինքն՝ կընդգրկվի, թե կքննարկվի, կամ նշվում է՝ 2020 թ-ի բյուջեում կարող է ներառվել, եթե կան նախահաշվային հաշվարկներ»,- ասաց պատգամավորը՝ հավելելով, որ երկու առաջարկի մասով ունի այդ հաշվարկները և կարող է տրամադրել կառավարությանը։
Պատգավորը նշեց նաև, որ այս հարցերում քաղաքական դրսևորում չպետք է լինի, եթե իշխող խմբակցության պատգամավորը ևս դպրոց վերանորոգելու առաջարկ է անում, ապա պետք է նժարի վրա դնեն, թե որն ավելի հրատապ վերանորոգման կարիք ունի և, ըստ այդմ էլ առաջնորդվեն։
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ