Դև... «Շատ քիչ է ասել՝ Փառք իրեն»
«Շնորհակալություն բոլորին, որոնք գնահատում են Դավիթի գործը, ով նվիրաբերեց ամենաթանկը՝ իր երիտասարդ կյանքը մեր հայրենիքին»,- նախօրեին ազգային-արցախյան պատերազմի ազատամարտիկ, ազատագրական շարժման գործիչ, գրող Դավիթ Սարապյանի՝ Դևի, կյանքն ու պայքարը ամփոփող «Մեր օրերի Դավիթը» փաստավավերագրության (հեղինակ՝ Էվելինա Մելքումյան), ինչպես նաև Դավիթ Սարապյանի գրական ստեղծագործությունների հայերեն հրատարակության՝ «Երեք հարյուր վայրկյան (վիպակ, պատմվածքներ)» գրքի շնորհանդեսին ասաց «Հայ Ձմեռ Պապ» բարեգործական հիմնադրամի տնօրեն Արմինե Պետրոսյանը:
Նրա խոսքով, Դևն ընդամենը 25 տարի է ապրել, սակայն այնպիսի կենսագրություն, հզոր կամք է ունեցել, որ անհավատալի մի բան է. «Ինչքան կարդում ես Դավիթի մասին, նայումս ես իր մասին, լսում ժամանակակիցների հուշերը, այդքան ավելի ու ավելի չես հավատում, որ հնարավոր է այդպես կատարյալ լինել»:
ԱԺ նախկին պատգամավոր Անահիտ Բախշյանի խոսքով, մարդն ապրել է ընդամենը 25 տարի ու այսօր իր մասին խոսում են որպես գոյություն ունեցող, ապրող, մեզ հետո ճանապարհ անցող մեկը, որն իր անտեսանելի հետագծով մեզ իր հետևից է տանում:
«Շատ քիչ է ասել՝ Փառք իրեն: Կուզենայի, որ մենք արժանի լինենք Դավիթի և նրա նման կերպար ունեցող բոլոր նահատակներին»,- ասաց Ա. Բախշյանը:
Գեներալ Արկադի Տեր-Թադևոսյանը՝ Կոմանդոսը հիշեց, թե ինչպես են Դավիթի հետ միասին ազատագրել Հադրութի շրջանի Տող գյուղը:
«Ես զինվորական եմ, նա զինվորական չէր, բայց զինվորականի մեծ դաս տվեց ինձ: Առանց նման մարդկանց, առանց միասնության և մեր մարդկանց մարտական ոգու, հնարավոր չէր լինի հասնել հաջողության»,- ասաց Կոմանդոսը:
Արմինե Պետրոսյանը շնորհանդեսից հետո ֆեյսբուքյան իր էջում հայտնել է, որ «Դավիթ Սարապյան / Դև» շնորհանդեսի նվիրատվությունների գումարը 161 000 դրամ է կազմել:
Հիշեցնենք, որ նախօրեին Դավիթ Սարապյանի հիշատակի օրն էր. զոհվել է Շահումյանի շրջանի Թոդան գյուղի համար մղվող մարտում 1991 թվականի դեկտեմբերի 10-ին։ Դևի աճյունն ամփոփված է Երևանի Եռաբլուր զինվորական պանթեոնում։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին