Ձեր վստահելի աղբյուրը

«Քննարկել ենք 2020 թվականին կուսակցության անելիքները»,- լրագրողների հետ զրույցում ասաց ԱԺ «Իմ քայլը» խմբակցության պատգամավոր Ալեն Սիմոնայնը՝ անդրադառնալով «Իմ քայլը» խմբակցության նիստին։

Սիմոնյանը նշեց, որ քննարկվել են 2019 թվականին արված աշխատանքները և նպատակադրվել  2020-ին այն կրկնապատկել։

Հարցին, թե արդյոք խմբակցությունը վարչապետի հետ քննարկել է գազի գնի բարձրացման մասին շրջանառվող լուրերը, Սիմոնյանը նշեց. «Կա այն ինֆորմացիան, որը դուք ունեք։ Ինչպես փոխվարչապետ Մհեր Գրիգորյանն արդեն ասել է՝ տվյալ պահին նման տեղեկություն չկա և  բանակցություններ են ընթանում»։

Սիմոնյանը նշեց, որ վարչապետը գոհ է խորհրդարանի աշխատանքներից։

Հարցին՝ արդյոք նիստի ընթացքում անդրադարձ եղել է «պետական հեղաշրջման փորձին», Սիմոնյանը նշեց, որ այդպիսի հարց չի եղել, ուստի և խմբակցությունը չի անդրադարձել։ Սիմոնյանը նշեց, որ սխալ է համարում նման հարցերը օրակարգ բերելը. «Ուրիշ բան չկա, դրանից են խոսում»։

Սահմանադրական բարեփոխումների հետ կապված հարց ևս խմբակցությունը չի քննարկել։

«Փոփոխություններ, որոնք կվերաբերեն Սահմանադրությանը, հնարավոր է լինեն, բայց այս պահի դրությամբ կտրուկ փոփոխությունների մասին խոսք չի եղել»,- նշեց Սիմոնյանը։

«Իմ քայլը» խմբակցության պատգամավոր Լիլիթ Մակունցը, անդրադառնալով խմբակցության նիստին, նշեց, որ քննարկվել և նշանավորվել է արտաքին հարաբերությունների քաղաքականությունը։

Պատգամավորի խոսքով, անդրադարձ է եղել նաև ներքաղաքական հարցերին. «Տարբեր ոլորտների զարգացմանն ենք անդրադարձել՝ մեր պատկերացմամբ»։