Ձեր վստահելի աղբյուրը

«Լավ եք անում, որ պայքարում եք, մեկի դեմ պայքարեք, 100-ի դեմ պայքարեք, 1000-ի դեմ պայքարեք, այ մարդ, բայց օրենքով պայքարեք»,-Այս մասին այսօր ԱԺ արտահերթ նիստի ընթացքում ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ անդրադառնալով «ՀՀ սահմանադրությունում փոփոխություն կատարելու մասին» օրենքի նախագծին։

Սիմոնյանն իշխանությանը հորդորեց օրենքի խախտումներ չկուտակել իր վրա, որ հետագայում այդ խախտումներով այլ գործընթաց չսկսվի, որի տուժողը իշխանությունը չի, Պողոսը չի, Պետրոսը չի, այլ ՀՀ-ն է։

«Ես 20 րոպե լսում էի տվյալ օրինագծի հեղինակ Վահագն Հովակիմյանի ելույթը, սակայն, ցավոք, որևէ իրավական հիմք չտեսա: Դա զուտ լրագրողական ելույթ էր, հնարավոր է՝ նույնիսկ պատմական: Սակայն արդյո՞ք նման ելույթներով կարող ենք հիմնավորել սահմանադրական բարեփոխումների անհրաժեշտությունը: Պայքարը, նպատակը հասկանալի են, բայց արդյո՞ք այն միջոցները, որոնք ձեր կողմից օգտագործվում են, մակերեսային չեն: Իմ խորին համոզմամբ՝ մակերեսային են»,- նշեց Սիմոնյանը։

Վերջինիս խոսքով, իշխանությունը շատ իրավական դրույթներ անտեսում է, խախտում է և հետագայում ամբողջ պրոցեսն իր վրա պետք է կրի այդ խախտումները, և իշխանությունը չի կարողանալու դրա տակից դուրս գալ։

«Առաջին խախտումն այսօր ցերեկ մենք տեսանք, երբ նկատեցինք ընթացակարգային խախտում։ Բարձրաձայնեցինք, բացատրեցինք, առաջին կուրսի իրավաբանի մակարդակով բացատրեցինք։ Չե՞ք ուզում ընկալել։

Մի՞թե կարելի է նման մակերեսային վերաբերմունք դրսևորել սահմանադրական բարեփոխումների հետ կապված։ Վարչապետի, կառավարության նախաձեռնությամբ ձևավորվում է սահմանադրական բարեփոխումների հանձնաժողով, որտեղ գերակայելու են ձեր իշխանության ներկայացուցիչները։ Սահմանադրական փոփոխությունների նորմալ ընթացակարգով ձեր ասած ՍԴ խնդիրը պետք է լուծվի, և ամբողջ դատական համակարգի խնդիրը»,- նշեց Սիմոնյանը։

Սիմոնյանը հիշեցրեց, որ իշխանությունը միշտ նշում է՝ բոլորը մեղավոր են, սակայն պատգամավորն առաջարկեց նաև ներս նայել, գուցե իր ընտրած միջոցներն են սխալ. «Ինչո՞ւ հարցականի տակ չեք դնում ձեր ընտրած միջոցները։ Բոլորը մեղավոր են բացի ձեզնի՞ց»։

Ըստ Սիմոնյանի, իշխանության առաջարկած նախագիծը միանգամից հակասահմանադրական իրավիճակ է ենթադրում։ Պատգամավորը նշեց, որ Վենետիկի հանձնաժողովն, անդրադառնալով ՍԴ դատավորների՝ վաղ կենսաթոշակի անցնելու առաջարկին, նշել է, թե չպետք է ստեղծվի իրավիճակ, որ դատավորների մեծ մասը դուրս գա աշխատանքից, քանի որ դա հակասահմանադրական է:

«Ձեր այս նախագիծը միանգամից հակասահմանադրական իրավիճակ է ենթադրում, որ միանգամից 7 դատավոր դուրս գա: Դուք Սահմանադրության փոփոխություն եք կատարում, բայց Սահմանադրությունում կան դրույթներ, որոնք անփոխարինելի են, որոնք բխում են նաև մեր պետականության հիմքերից և ավելի՝ անձի բնական իրավունքներից։ Չի կարելի անձի բնական իրավունքները ոտնահարվել։ Արդյո՞ք սա է լավ ճանապարհը, իհարկե ոչ»,- նշեց Սիմոնյանը։

Անդրադառնալով Սահմանադրական փոփոխությունների նախագիծն առաջին ընթերցմամբ տապալելու, այնուհետև՝ հանրաքվեի դնելու հարցին՝ Տարոն Սիմոնյանն ասաց. «Հարգելիներս, ձեր ցավը տանեմ, ախր կարելի է, չէ՞, Սահմանադրության 202-րդ հոդվածի 3-րդ մասը կարդալ, հետո մի հատ էլ բացել ԱԺ կանոնակարգ օրենքի 86-րդ հոդվածի 4-րդ մասի 2-րդ մասը կարդալ՝ հասկանալու համար, որ առաջին ընթերցման տապալումից հետո դուք չեք կարող հանրաքվեի դնել այս հարցը»: