Ձեր վստահելի աղբյուրը

Վենետիկի հանձնաժողով կամ որևէ միջազգային կազմակերպություն այս կամ այն նախագիծը միջազգային փորձաքննության ուղարկելու խնդիրը լրացուցիչ ուսումնասիրության կարիք ունի, քանի որ պետությունը գործ չունի լայնամասշտաբ փոփոխության հետ։ Այսօր լրագրողների հետ զրույցում ասաց ԱԺ «Իմ քայլը» խմբակցության պատգամավոր Վլադիմիր Վարդանյանն՝ անդրադառնալով ԵԽԽՎ 2 համազեկուցողների պահանջին՝ հրատապության կարգով «Սահմանադրական փոփոխությունների» նախագիծը Վենետիկ ուղարկելուն։

Նա նշեց, որ նախկինում իշխանությունն օգտվել է միջազգային կառույցների խորհրդատվությունից։ Նա միաժամանակ ասաց, որ այլ հարցերում իշխանությունը համագործակցելու է ԵԽԽՎ հանձնաժողովի հետ։

Ըստ պատգամավորի՝ չի կարելի միջազգային կազմակերպությունների դիրքորոշումերը ներկայացնել որպես պարտադրանք։

«Ես ասել եմ, որ օրեր առաջ հանդիպել եմ նաև Վենետիկի հանձնաժողովի նախագահի և քարտուղարության ներկայացուցչի հետ, քննարկել ենք հետագա համագործակցության հնարավորությունները, բայց այս հարցի հետ կապված որևէ բան չեմ կարող ասել»,- նշեց Վարդանյանը։

Հարցին, թե ինչն է խանգարում իշխանությանը՝ օրենքի նախագիծը Վենետիկի հանձնաժողով ուղարկելու հարցում, Վարդանյանը պատասխանեց՝ չի բացառում, որ այդպես կլինի. «Այս հարցի քննարկումը լրացուցիչ ուսումնասիրության կարիք ունի։ Այս պահին մենք ունենք մի շարք հարցեր»։

Պատգամավորը վստահեցրեց, որ Վենետիկի հանձնաժողովի ուշադրության կենտրոնում են գտնվում բոլոր այն հարցերը, որոնք վերաբերում են ԵԽԽՎ անդամ հանդիսացող այս կամ այն երկրում ընթացող իրավական գործընթացներին.

«Սա ոչ առաջին դեպքն է, ոչ վերջին դեպքը, որ Վենետիկի հանձնաժողովը նման հայտարարությամբ է հանդես գալիս։ Այդ հայտարարություններն անպայման չէ, որ ընկալվեն որպես քննադատություն։ Սա մոտեցում է, և Վենետիկի հանձնաժողովը այն մարմինն է, որը գործում է դիմումների հիման վրա։ Եթե կլինի դիմում, նա կտա համապատասխան եզրակացություն»։

Ըստ Վարդանյանի, ցանկացած միջազգային կառույց, որը հրապարակում է իր մոտեցումներն ու դիրքորոշումները, չի կարող պարտադրանք ուղղել այս կամ այն պետությանը։

Նա նաև նշեց, որ այժմ խորհրդարանն ընդունել է որոշում, որի հիման վրա հանրապետության նախագահը պետք է նշանակի հանրաքվե։ Դրանից հետո միայն իշխանությունը կարող է քննարկել նախագիծը ԵԽԽՎ ուղարկելու հարցը։

«Քանի որ հանրաքվե դեռևս նշանակված չէ, մենք չենք կարող խոսել ընթացքի մասին։ Հենց կլինի նախագահի հրամանագիրը, դրանից հետո միայն մենք կարող ենք խոսել ընթացքի մասին։ Իրավական տեսանկյունից մենք պետք է սպասենք նախագահի հրամանագրին, դրա ստորագրումից և հանրաքվե նշանակելուց հետո նոր հնարավորություն կլինի անդրադառնալ բովանդակային հարցերին»,- նշեց Վարդանյանը։

Հարցին՝ արդյոք ՍԴ ուղարկվելու է նախագիծը եզրակացության համար, պատգամավորը պատասխանեց, որ նախագահի կողմից հանրաքվեի մասին որոշումը ստորագրելուց հետո որևէ իմպերատիվ պահանջ չկա ՍԴ դիմելու։

«Այստեղ հարց է առաջանում, արդյոք շահերի բախում չի առաջանա և ՍԴ-ն կարող է դիտարկվել անաչառ և անկողմնակալ դատարան։ Սա էլ այլ խնդիր է։ 168-րդ հոդվածը սահմանում է ՍԴ լիազորությունը, և այդ լիազորության իմաստն այն է, որ մինչև սահմանադրական փոփոխությունները պետք է լինի ՍԴ եզրակացությունը, բայց ՍԴ-ն գործում է այսպես կոչված դիմումի հիման վրա։ Առկա է դիմում, ՍԴ-ն իրականացնում է իր գործառույթները։ Դիմումի բացակայության պարագայում ՍԴ-ն իրավունք չունի իր նախաձեռնությամբ որևէ գործ քննարկի»,- ասաց Վլադիմիր Վարդանյանը։