Ձեր վստահելի աղբյուրը

Ռոբերտ Քոչարյանի ու մյուսների գործով դատական նիստից հետո, Քոչարյանի գործով դատախազներից Գևորգ Բաղդասարյանը լրագրողների հետ զրույցում անդրադարձավ  Ռ.Քոչարյանի այն մտահոգությանը, որ նախաքննության փուլում գտնվող գործով ապացույցներ կան, որոնք վերաբերում են սպանությունը կատարողներին, սակայն դրանք դիտմամբ չեն հրապարակվում: Նրա կարծիքով, դա խելամիտ հայտարարություն չէ:

«Նրանք գործի շրջանակներում չէին կարող հարցաքննվել,որովհետև քննվող քրեական գործը այլ դեպքի արթիվ է: Ինչ վերաբերում է,թե ինչու այդ դեպքում իրավական հետևանքներ չեն առաջացել, ապա մենք գործ ունենք իրավական նորմի տարբեր մեկնաբանությունների հետ: Ընդ որում մեկնաբանությունների, որոնցից մեկը պնդում ենք մենք, մյուսը ՝պաշտպանության կողմը: Եվ դատարանը պետք է դրան գնահատական տա: Նախկինում մեղադրանքի հիմքում դրվել է մոտեցում, որ քրեական օրենսգրքի 301 հոդվածով նախատեսվել է նոր հանցագործություն: Մենք գտնում ենք, որ դա նոր հանցագործություն չի, նույն հանցագործությունը նախատեսված է եղել նաև նախկինում»,- ասաց նա: 

Անդրադառնալով նաև այն փաստարկին, որ  գլխավոր դատախազն այն ժամանակ ինչու չի բողոքարկել,Բաղդասարյանը պատասխանեց. «Իրավակարգավորումներն է պետք նայել և տեսնել, որ մեղադրանքից հետո  այլ իրավական հետևանքներ չեն կարող առաջանալ, բողոքարկում, վիճարկում չի կարող լինել, որովհետև մեղադրանքից հրաժարվելը միանշանակ հանգեցնում է արդարացման դատավճիռ կայացնելուն: Բայց, երբ անընդհատ խոսում ենք նախկինում մեղադրանքից հրաժարվելու հիմքում դրված պատճառների հետ համաձայն չլինելու մասին, տպավորություն է, թե մենք հայտարարում ենք նախկինում դատախազներն ապօրինություն են արել: Նախկինում դատախազները հրաժարվել են անձանց մեղադրանքից, որոնց արարքի նկարագրությունն այլ է եղել: Մարդիկ մեղադրվել են մի արարքի համար, հիմա անձիք մեղադրվում են այլ արարքի համար»: 

Երևան քաղաքի դատախազը խոսեց նաև ԵԽԽՎ-ի հնչեցրած գնահատականներից, նշելով, որ դրանք վերաբերում էին ոչ բռնությամբ կատարված հանցագործություններին:

«ԵԽԽՎ գնահատականները հետևյալն են՝ կարճել այդ իրադարձությունների վերաբերյալ գործերը, բացառությամբ այն անձանց վերաբերյալ գործերի, ովքեր մեղադրվում են բռնությամբ հանցանք կատարելու մեջ կամ օժանդակում են և այլն: Կանոնը հետևյալն է, եթե նորմը անորոշ է, ինքը չի կարող կիրառվել: Հիմա հարց ենք տալիս, եթե ԵԽԽՎ-ն գտնում է,որ նորմը անորոշ է, ինչու էր ասում էտ անորոշ նորմը մի կիրառեք  բռնությամբ հանցանք չկատարածների վրա, իսկ բռնությամբ հանցանք կատարածների նկատմամբ կիրառեք: Այսինքն` ակնհայտ է,որ ԵԽԽՎ-ն այդպիսի գնահատական չի տվել, ավելին ասեմ՝ հենց ԱԺ-ում, օրենսդրական փոփոխությունների  քննարկման ժամանակ, պաշտոնապես է հայտարարվել զեկուցողի կողմից, որ օրենքը փոխելու պայման չի դրվել»,- ասաց նա: