Ձեր վստահելի աղբյուրը

«Հայտնի իկռայի գործով էին կանչել»,- ՀՔԾ շենքից դուրս գալուց հետո ասաց «Քաղաքացիական գիտակցություն» ՀԿ նախագահ Նարեկ Սամսոնյանը։

Նա նշեց, որ ըստ էության, սուտ մատնություն է համարվել ոչ թե իկռայի գնման փաստը, այլ Նիկոլ Փաշինյանի՝ ՊԵԿ-ին հրահանգ տալու փաստը։

«Փաստացի ՀՔԾ-ն ընդունում է, որ 3000 դոլարով իկռայի գնումը կա, բայց չկա տեղեկատվության մյուս մասը։ Բացի այդ, ամենամեծ աբսուրդն այն է, որ նախորդ անգամ ՀՔԾ-ում տվածս ցուցմունքը քննիչը աղավաղել է։ Ես ցուցմունքի տակ գրել եմ, որ հրաժարվում են դրանից, որովհետր այն չի արտահայտում է բովանդակությունը, ինչ ես ասել եմ։ Հակառակը՝ գրված չէ իմ բառերից, այլ քննիչի կողմից խմբագրված է»,- ասաց Սամսոնյանը։

Մինչ Սամսոնյանը նշում է, որ ինքը հրաժարվել է այդ ցուցմունքից, ՀՔԾ-ն դրա հիման վրա հարուցել է այս քրեական գործը.«Չեղած բանի վրա նրանք քրեական գործ են հարուցել։ Նույն օրը ՀՔԾ-ն տարածել է հայտարարություն, որտեղ ասվում է՝ ես հրաժարվել եմ ցուցմունք տալուց։ Այսինքն՝ իրենք ֆիքսում են, որ ես ցուցմունք չեմ տվել, հետո երեկ որոշել են իմ էդ ցուցմունքի հիման վրա հարուցեն քրեական գործ։ Սա իրավական խուլիգանություն է ու դրա գլխին կանգնած է Նիկոլ Փաշինյանը։ Հիմա կարող են ցանկացած մարդու իր ֆեյսբուքյան գրառման համար հրավիրել ՀՔԾ»։

Սամսոնյանը վստահեցրեց, իրեն ՀՔԾ հրավիրելը քաղաքական հետապնդում է։

«Սա աբսուրդի թատրոն է ու ես զարմացած եմ։ Եվ անկեղծ, շատ հիասթափված եմ մի բանից, որ խափանման միջոցը կալանավորումը չէր ընտրված։ Ես հորդորեցի քննիչին գտնել ավելի լուրջ գործ, որով կկարողանա կալանավորման սանկցիա տալ։ Որովհետև էն, ինչ այսօր տեղի է ունենում ազատ մամուլի նկատմամբ, պետք է ամփոփվի որևէ մեկի կալանավորմամբ։ Ես պատրաստ եմ կալանավորվել՝ ցույց տալու, որ Հայաստանում բռնաբարվում է խոսքի ազատությունը»,- ասաց Նարեկ Սամսոնյանը։

Սամսոնյանը մանրամասնեց՝ հարուցվել է քրեական գործ՝ իրենց կողմից արձանագրված չեղած ցուցմունքի հիման վրա։

«Իհարկե, ինձ էլի կանչելու են ՀՔԾ։ Այսօր մենք հրաժարվել ենք, որ իրենք ներկայացրել են՝ ես մեղադրյալ եմ։ Իմ փաստաբանները պնդեցին, որ իրավական առումով ինձ մեղադրանք առաջադրելու համապատասխան հիմքեր չկան։ Մենք ներկայացրել ենք ինքնաբացարկի միջնորդություն, նաև ներկայացրել ենք իմ՝ մեղադրյալ չլինելը փաստող համապատասխան հոդվածները, և դուրս ենք եկել այնտեղից։ ՀՔԾ-ն իմ նկատմամբ կիրառել է ստորագրությամբ չհեռանալու մասին խափանման միջոցը։ Ես անգամ դա չեմ ստորագրել»,- եզրափակեց խոսքը Նարեկ Սամսոնյանը։

Նշենք, որ Ն.Սամսոնյանը հունվարի 26-ին ֆեյսբուքյան էջում «3000$ 1կգ սև իկռա առնող Վարչապետը» վերնագրով գրառում էր արել: