Ալումյանը՝ դատավորին. «Ի հայտ է եկել հանգամանք, որը բացառում է Ձեր մասնակցությունը այդ քրեական գործին»
Ընթացող դատական նիստի ընացքում ՀՀ երկրորդ նախագահ Ռոբերտ Քոչարյանի փաստաբանական թիմի անդամ Հայկ Ալումյանը ինքնաբացարկի միջնորդություն ներկայացրեց, հիշեցրեց, որ այն դատարան մուտք է եղել այս տարվա հունվարի 9-ին։
«Մեր կողմից Ձեզ ներկայացրած ինքնաբացարկի միջնորդությունից հետո ի հայտ է եկել այնպիսի հանգամանք, որը բացառում է Ձեր՝ որպես դատավոր մասնակցությունը սույն քրեական գործին»,-ասաց փաստաբանը։
Նա վկայակոչեց «Փաստինֆո» լրատվամիջոցին ԲԴԽ նախագահ Ռուբեն Վարդազարյանի՝ 2019-ի դեկտեմբերի 12-ի հարցազրույցը, որտեղ Վարդազարյանը մասնավորապես նշել է.
«Իշխանությունը ցանկանում է, որ մեր բոլոր դատավորները լինեն Արմեն Դանիելյանի և Աննա Դանիբեկյանի նման»։
Ալումյանն ասաց՝ իշխանությունները, որոնց համար Աննա Դանիելյանը ցանկալի դատավոր է համարվում, բազմից հրապարակային հայտարարել են, թե ինչպես են ցանկանում այս գործի ընթացքն ու ելքը։
Նա բերեց մի քանի օրինակներ, երբ իշխանության ներկայացուցիչները, այդ թվում վարչապետի խորհրդականները ու օգնականները խախտել են Ռոբերտ Քոչարյանի անմեղության կանխավարկածը, տեղադրել նրա լուսանկարներն ու մեղադրել հանցագործությունների համար, ցանկացել, որ «նա բանտում փտի»։
Փաստաբանը նշեց, որ Նիկոլ Փաշինյանն իր բազմաթիվ հայտարարություններում մարտի մեկի իրադարձությունների համար մեղադրել է Ռոբերտ Քոչարյանին ու նրա նախագահության օրոք ուժային կառույցների ղեկավարներին։
Միջնորդությունը ներկայացնելիս՝ Հայկ Ալումյանը մեջբերեց ԱԱԾ նախկին ղեկավար Արթուր Վանեցյանի և ՀՔԾ պետ Սասուն Խաչատրյանի, նաև Արթուր Վանեցյանի ու վարչապետ Նիկոլ Փաշինյանի հայտնի գաղտնալսումների սղագրությունը, որտեղ քննարկվում է Ռոբերտ Քոչարյանի ու Յուրի Խաչատուրովի կալանքի հարցը։
Նրա խոսքով, ակնհայտ է, որ նման պարագաներում Դանիբեկյանը իշխանությունների տեսանկյունից հենց այն դատավորն է, որն իշխանությունների իղձերը անվերապահորեն պիտի իրականություն դարձնի։
«Այսօրվա քաղաքական իշխանությունները չեն թաքցնում, որ ուզում են Ռոբերտ Քոչարյանին պահել կալանքի տակ», - ասաց Ալումյանը, ընդգծելով, որ այսքանից հետո Աննա Դանիբեկյանը չի կարող շարունակել լսել սույն գործը և պետք է ինքնաբացարկ հայտնի։
Դատավորին բացարկի առանձին միջնորդություն ներկայացրեց նաև պաշտպան Արամ Վարդևանյանը։ Միջնորդությանը միացան պաշտպան Հովհաննես Խուդոյանն ու մյուս ամբաստանյալների պաշտպանները։