«Իմ քայլը» խմբակցությունը դեմ է քվեարկելու, քանի որ չի ընդունվել երկու ամսով նախագիծը հետաձգելու իր առաջարկը
«Լլուսավոր Հայաստան» խմբակցության կողմից ներկայացված «Տեղական ինքնակառավարման մասին» օրենքում լրացում կատարելու մասին նախագիծը երկրորդ ընթերցմամբ ներկայացնելու ժամանակ Անի Սամսոնյանը հայտարարեց, որ քննարկել են պատգամավորներից ստացած առաջարկները և «Բարգավաճ Հայաստան» խմբակցության պատգամավոր Սերգեյ Բագրատյանի առաջարկի հիման վրա այն խմբագրվել է:
Նկատենք, որ օրենքի նախագծի անհրաժեշտությունը բխել է կամազների հայտնի դեպքից:
Պատգամավորն ընթերցեց որոշման նախագիծը. «Համայնքի ավագանին իր որոշմամբ հավանություն է տալիս այն դեպքում, երբ համայնքը նվիրառու է, իսկ նվիրատվության արժեքը գերազանցում է նվազագույն աշխատավարձի հազարապատիկը, ինչից հետո միայն համայնքի ղեկավարն իրավասու է կնքել նվիրատվության պայմանագիրը՝ բացառությամբ սահմանամերձ բնակավայրերում պաշտպանական բնույթի նվիրատվության, որը ձևակերպվում է գաղտնի գրիֆով»:
Սամսոնյանը տեղեկացրեց, որ օրենքի հեղինակները չեն ընդունել նախագիծը երկու ամսով հետաձգելու վերաբերյալ հանձնաժողովում հնչած առաջարկը:
Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի անունից ելույթ ունենալով՝ «Իմ քայլը» խմբակցության անդամ Վահե Ղալումյանը հայտնեց, որ առաջին ընթերցման ժամանակ հանձնաժողովը դրական է քվեարկել նախագծին:
«Երկրորդ քննարկման ժամանակ բացասական եզրակացություն է տրվել, քանի որ չի ընդունվել նախագիծը երկու ամսով հետաձգելու և այլ առաջարկներ»,- ասաց Ղալումյանը:
«Բարգաված Հայաստան» խմբակցության պատգամավոր Սերգեյ Բագրատյանը նշելով, որ երկիրը գտնվում է կիսապատերազմական վիճակում՝ շեշտեց. «Սահմանապահ համայնքները հաճախ ստանում են նվիրատվություններ, և նվիրատուն չի ցանկանում, որ իր անունը հրապարակվի: Նվիրատուն գտնում է, որ այս իրավիճակում կոնֆլիկտի կողմ չի ցանկանում լինել: Այն երկիրը, որտեղից այդ նվիրատվությունը կազմակերպում է տվյալ ընկերության սեփականատերը, չի ցանկանում, որ այդ տեղեկատվությունը հրապարակվի, քանի որ տվյալ երկիրը կոնֆլիկտի հետ կապված չեզոքություն է պահպանում: Հետևաբար, տվյալ երկրներից որոշակի նվիրատվությունները, որոնք պաշտպանական նպատականերով են իրականացվում, պետք է պաշտպանվի մեր օրենսդրությամբ, այն է՝ պետք է գաղտնի գրիֆ կիրառվի»։
«Իմ քայլը» խմբակցության անդամ Բաբկեն Թունյանը կարծիք հայտնեց, որ առաջարկվող նախագծի դրույթները չեն գործի:
Անի Սամսոնյանը իր ելույթում պատասխանեց վերջինիս. «Պարոն Թունյան, դուք ասում եք, որ այս նախագիծը չի գործելու: Ես թե՛ առաջին, թե´ երկրորդ ընթերցման ժամանակ ասացի, որ այդ նախագիծը իրավաբանորեն սահմանված չի եղել, բայց պրակտիկայում գործել է: Ես որպես Երևանի ավագանու անդամ, եղել եմ այդ դահլիճում նստած և երկու տարի այս նորմը չի եղել, բայց մենք հավանություն ենք տվել, հետո համայնքը ընդունել է գույքը: Հիմա ես ասում եմ, որ համայնքի ղեկավարի կողմից չարաշահվում է այն: Ձեր գործընկերներից շատերն ասում էին՝ ցույց տվեք այն դրույթը, որն ասում է, որ պարտադիր է համայնքի ավագանու համաձայնություն տալը: Դուք տապալեցիք նաև հարցի վերաբերյալ քննիչ հանձնաժողովը և առաջարկում էիք ավելի ինստիտուցիոնալ լուծումներ գտնել: Հիմա մենք անսալով նաև ձեր հորդորներին, փորձում ենք գտնել և օրենքով սահմանել այն: Ես զարմանում եմ, թե ինչու եք դուք ուզում դեմ քվեարկել այս նախագծին»:
Պատգամավորը կրկին կոչ արեց ընդունել օրենքի նախագիծը:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց