Ձեր վստահելի աղբյուրը

Այսօր Եվրոպայի խորհուրդը հրապարակել է նոր վիճակագրություն Եվրոպական երկրների բանտերի, այդ թվում՝ Հայաստանի վերաբերյալ, որն ընդգրկում է 2018-ի հունվարից մինչև 2019թ․-ի հունվարի վերջի ստատիստիկան։

Հայաստանում այս ժամանակահատվածում, նախորդ ժամանակահատվածի համեմատ (մինչև 2018-ի հունվարի վերջը), նկատվել է ազատազրկման մակարդակի ամենամեծ անկումը (100,000 բնակչին ընկնող բանտարկյալների թվով)՝ ուսումնասիրված բոլոր երկրների միջև։ Զգալիորեն նվազել է նաև բանտերի բնակչության խտությունը:

Բանտի բնակչության չափը

2019 թվականի հունվարի 31-ի դրությամբ ԵԽ անդամ 45 երկրների քրեակատարողական հիմնարկներում եղել է 1.540.484 դատապարտյալ։

2019-ի հունվարի դրությամբ Հայաստանում բանտարկյալների ընդհանուր թիվը 2.266  է՝ 2,965,269 բնակիչների ցուցանիշով, ինչը ցույց է տվել էական անկում (35.9%)՝ 2018-ի հետ (3536) համեմատած։

Ամբողջ Եվրոպայում, ընդհանուր առմամբ, յուրաքանչյուր 100,000 բնակչին բաժին է ընկնում 106.1 բանտարկյալ, կամ  յուրաքանչյուր 943 բնակչին մեկ բանտարկյալ:

Բանտում բնակչության ամենաբարձր ցուցանիշը գրանցվել է Ռուսաստանում (386,1 բանտարկյալ),  Թուրքիայում (329.0) և Վրաստանում (269.7), որին հաջորդում են Լիտվան (232.1), Ադրբեջանը (218.2) և Չեխիան (202.6): Բանտարկյալների ամենացածր ցուցանիշը դիտարկվել է Սան Մարինոյում (2.9), Լիխտենշտեյնում (31.3), Իսլանդիայում (40.3), Ֆինլանդիայում (49.8), Մոնակոյում (54.8), Նիդեռլանդներ (56.4) և Շվեդիա (59,7):

Հայաստանում բանտում բնակչության մակարդակը կազմում է 76,4՝ 100,000 բնակչի համար։ Ներկայումս Հայաստանը անազատության մեջ գտնվողների թվով դասվում է ամենացածր ցուցանիշ ունեցող երկրների շարքում և համեմատելի է Գերմանիայի (77), Դանիայի (69) և Սլովենիայի (67) հետ:

Գերբնակեցում

Եվրոպայում բանտերի միջին խտությունը 2019 թվականին կազմել է 89,5 բանտարկյալ՝ հասանելի 100 տեղերի համար, ինչը մի փոքր անկում է 2018 թվականի 91.4-ի համեմատ։

15 բանտային վարչակազմեր 2019-ին գերբնակեցվածած են եղել, այդ թվում Թուրքիայում (100-ի համար 122,5 բանտարկյալ), Բելգիայում (120.6), Իտալիայում (118.9), Ֆրանսիայում։
Հայաստանի ՔԿՀ-ների ընդհանուր կարողությունը 5346 է, ինչը հանգեցնում է բանտերի 42.4 խտության։ Սա գրեթե երկու անգամ ցածր է եվրոպական միջիից  (89,5) և Եվրոպայում ամենացածրներից մեկը: Ավելին, երկրում բանտային խտությունը 2018 թ.-ի 66.1-ից նվազել է մինչև 42.4։

Բանտարկյալների սեռը, տարիքը

2019-ին ամբողջ Եվրոպայում կին բանտարկյալների միջին մասնաբաժինը կազմել է 5.1%։  Եվրոպայում բանտարկյալների միջին տարիքը 35-ն է։

Հայաստանում կին բանտարկյալների թիվը կազմում է 3.2% ընդհանուր համամասնությունից, որը ցածր է եվրոպական միջինից։

Ծախսվող գումարը

Եվրոպական բանտերի 43 վարչություններ ծախսել են ավելի քան 26 միլիարդ եվրո։

2018-ին մեկ օրվա ընթացքում յուրաքանչյուր դատապարտյալի վրա ծախսված միջին գումարը կազմել է 68.3 եվրո, ինչը համեմատելի է 2017-ի 66,5 եվրոյի հետ։

Այս ցուցանիշը տատանվում է 2.4 եվրոյից մեկ օրվա համար Ռուսաստանի Դաշնությունում,  մինչև 335 եվրո Նորվեգիայում ու Շվեդիայում, մոտ 400 եվրո Սան Մարինոյում և 1,154,1 եվրո մեկ դատապարտյալի համար մեկ օրվա համար Լյուքսեմբուրգում (այս ցուցանիշը հաշվի չի առնված միջին գումարային հաշվարկի մեջ):

2018-ին բանտերի վարչակազմի կողմից ծախսված ամենաբարձր ընդհանուր բյուջե ունեցող երկրներն են Ռուսաստանը (3,5 միլիարդ եվրո), Գերմանիան (3,2 միլիարդ եվրո), Իտալիան (2.8 միլիարդ եվրո), Ֆրանսիան (2,7 միլիարդ եվրո), Իսպանիան (1,5 մլրդ եվրո), Թուրքիան (1,1 մլրդ եվրո):

Հայաստանում ՔԿՀ-ների կողմից 2018 թվականին ծախսված ընդհանուր բյուջեն կազմել է 15,16 միլիոն եվրո, մոտավորապես նույնը, ինչ 2017-ին (15.02 միլիոն եվրո): Յուրաքանչյուր դատապարտյալի միջին օրական ծախսը կազմել է 13,5 եվրո, ինչը զգալիորեն ցածր է եվրոպական միջինից`68.3 եվրո։

Պատիժներ

Բանտարկյալների մեծ մասը պատիժ է կրում թմրանյութերի (18.1%), գողությունների (14%), սպանության (13%) իրավախախտումների համար:

Պատժի ամենատարածված տևողությունը (27.4%) 1-3 տարի է։

Ամբողջ Եվրոպայում 1.3%-ը կազմում է ցմահ բանտարկությունը, իսկ 2%-ը՝ 20 տարի և ավելի:

Հայաստանում դատապարտյալների մեծ մասը (38,2%)  դատապարտված է 5-ից 10 տարվա միջակայքում:

Հայաստանում ամենաշատ տարածված հանցագործություններն են  սեփականությանն ուղղված հանցանքներն (551 դատապարտյալ) ու կյանքի և առողջության դեմ ուղղված հանցանքները (398 բանտարկյալ)։ Մինչդեռ ընտանիքի և երեխայի նկատմամբ կատարված հանցագործությունները ներկայացնում են ամենացածր թիվը (3 դատապարտյալ)։

Հայաստանում 2018թ․-ին ազատ է արձակվել 2638 անձ, ինչը բարձր է 2017-ի 1817-ի համեմատ։