ԱԺ-ն մերժեց փաստաբաններին զրպարտելն ու վիրավորելը քրեականացնելու առաջարկը
Մեկնարկել է ԱԺ հերթական քառօրյա նստաշրջանը։
Նիստի մեկնարկին քննարկվեցին այն նախագծերը, որոնք գլխադասային հանձնաժողովի կողմից բացասական եզրակացություն էին ստացել և պետք է պատգամավորները որոշեին՝ օրակարգ բերե՞լ դրանք, թե՞՝ ոչ։
ԱԺ «Լուսավոր Հայաստան» խմբակցության պատգամավոր Անի Սամսոնյանը ներկայացրեց իրենց շրջանառած «ՀՀ քրեական օրենսգրքում փոփոխություններ ու լրացումներ կատարելու մասին» օրենքի նախագիծը, որով առաջարկվում է փաստաբաններին զրպարտելն ու վիրավորելը քրեականացնել։
«Հաշվի առնելով վերջին շրջանում փաստաբանների և նրանց մասնագիտական գործունեության նկատմամբ կատարվող ոտնձգությունները, և այն, որ խնդիրը մնում է չլուծված, մենք հանդես ենք եկել ՀՀ քրեական օրենսգրքում փոփոխություններ և լրացումներ կատարելու մասին նախագծով»,- ասաց Ա. Սամսոնյանը։
Նա տեղեկացրեց՝ իրենք առաջարկում էին, որ օրենքը սահմաներ բավարար երաշխիքներ՝ փաստաբանների գործունեության պաշտպանության համար։ Այդ թվում նաև նախատեսվում էր փաստաբաններին վիրավորելը և զրպարտելը քրեականացնել.
«Ըստ մեր առաջարկի՝ փաստաբանների լիազորությունների իրականացմանը խոչընդոտելը, կամ նրանց վիրավորելն ու սպառնալը՝ գործի բազմակողմանի կամ օբյեկտիվ քննությանը խոչընդոտելու նպատակով, պատժվում է տուգանքով՝ նվազագույն աշխատվարձի 200-300-ապատիկի չափով, կամ ազատազրկմամբ՝ 1-3 տարի ժամկետով։ Իսկ փաստաբանի ընտանիքին սպառնալը, առողջությանն ու գույքին վնաս հասցնելը պատժվում է տուգանքով` նվազագույն աշխատավարձի 200-400-ապատիկի չափով, կամ ազատազրկմամբ՝ 1-3 տարի ժամկետով»։
Պատգամավորը շեշտեց, որ նախագիծը մշակելիս իրենք համագործակցել են փաստաբանների պալատի հետ և ունեցել են քննարկումներ խորհրդարանական մյուս երկու խմբակցությունների հետ.
«Մեր գործընկերների անհամաձայնությունը եղել է փաստաբաններին զրպարտելը քրեականացնելու հետ կապված։ Մենք այս դրույթը նախատեսել էինք, քանի որ դատախազին, քննիչին զրպարտելու կամ վիրավորելու համար ևս կան քրեաիրավական ներգործության միջոցներ։ Մեր գործընկերներն առաջարկեցին, որ մենք քրեական օրենսգրքի 344-րդ հոդվածը ուժը կորցրած ճանաչենք, իսկ փաստաբանների նկատմամբ վիրավորանքն ու զրպարտանքը ապաքրեականացնենք։ Մենք պատրաստ ենք այդ առաջարկն ընդունել»։
Գլխադասային հանձնաժողովի անդամ Շաքե Իսայանը տեղեկացրեց, որ հանձնաժողովում մանրամասն քննարկում է տեղի ունեցել, որի արդյունքում հանձնաժողովում նախագիծը հավանության չի արժանացել՝ 4 դեմ և 2 ձեռնպահ ձայներով։
«Բայց քանի որ տիկին Սամսոնյանն ասաց, որ պատրաստ են նախագիծը լրամշակել, ապա մենք կողմ կքվեարկենք, որպեսզի լիագումար նիստերի օրակարգ մտնի և քննարկվի այս նախագիծը»,- ասաց Շ. Իսայանը։
ԱԺ «Իմ քայլը» խմբակցության պատգամավոր Մարիա Կարապետյանն էլ նշեց, որ այդ դեպքում ներկայացվող նախագծի ամբողջ փիլիսոփայությունը փոխվում է։
«Մենք հանձնաժողովի նիստում առաջարկել էինք, որ զրպարտությունը ապաքրեականացվի։ Դուք այդ առաջարկը մերժեցիք, և կարծում եմ՝ նոր նախագիծ պետք է շրջանառության մեջ դնեք։ Մինչև 2-րդ ընթերցում նման հիմնարար փոփոխություն կատարելը հակասում է Ձեր իսկ բերած նախագծի հիմնավորումներին»,- ասաց Մ. Կարապետյանը։
Ա. Սամսոնյանն էլ արձագանքեց, որ նախագիծը պարունակում է մի քանի դրույթ, որից միայն մեկն է վերաբերում փաստաբանների մասնագիտական գործունեության հետ կապված՝ նրան զրպարտելն ու վիրավորելը քրեականացնելուն, և մենք առաջարկում ենք այդ մի դրույթը հանել՝ հաշվի առնելով ձեր մտահոգությունները. «Այս մեկ դրույթը հանելը չի փոխում նախագծի ողջ փիլիսոփայությունը։ Գործող օրենքով պատասխանատվության են կանչվում միայն փաստաբանի գործունեությանը խոչընդոտած պաշտոնյաները, իսկ մենք այս նախագծով առաջարկում ենք օրենքը տարածել բոլորի վրա»։
Այսպիսով, ձայների 37 կողմ, 74 դեմ և 1 ձեռնպահ հարաբերակցությամբ որոշումը չընդունվեց և նախագիծը օրակարգ չմտավ։
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց