Ձեր վստահելի աղբյուրը

«2019 թվականի պետական բյուջեի կատարումը ընթացել է հարկաբյուջետային կանոնների սկզբունքի ներքո՝ նպաստել պետական պարտքի կայունության ապահովման նպատակին»,- խորհրդարանում ասաց կենտրոնական բանկի (ԿԲ) նախագահ Արթուր Ջավադյանը՝ անդրադառնալով 2019 թվականի պետական բյուջեի կատարողականին։

Նրա խոսքով, պարտք-ՀՆԱ ցուցանիշի նվազմանը նպաստել է պետական բյուջեի պակասուրդի՝ տարվա համար նախատեսված մակարդակից ավելի մեծ չափով կրճատումը։

«Այն տեղի է ունեցել պետական ծախսերի կատարման բարելավվման և արդյունավետության բարձրացման նպատակով ՀՀ կառավարության կողմից պետական ծախսերի կրճատման ուղղությամբ շարունակական վերանայումների շնորհիվ։ Արդյունքում համախառն պահանջարկի վրա հարկաբյուջետային հատվածի ազդեցությունը զսպող է եղել»,- շեշտեց նա։

Ըստ Ա. Ջավադյանի, տավա ընթացքում երկու անգամ ԿԲ-ն իջեցրել է վերաֆինանսավորման տոկոսադրույքը՝ արձագանքելով գնաճային զարգացումներին։ Նրա խոսքով, տոկոսադրույքների ցածր մակարդակի պահպանումը, ուղեկցելով տնտեսության վարկավորման ծավալների աճին, նպաստել է համախառն պահանջարի աճին.

«Արդյունքում՝ 2019 թվականի տնտեսական աճի ձևավորմանը մեծամասամբ նպաստել է ներքին ծախսերի, հատկապես՝ մասնավոր սպառման զգալի աճը՝ 12.8%: Հարկաբյուջետային զսպող քաղաքականության շարունակական իրականացմանը զուգահեռ 1.3% կետով նվազել է 2019 թվականի ՀՀ կառավարության պարտք-ՀՆԱ ցուցանիշը և կազմել 50%: Ընդ որում, պետական պարտքի կառուցվածքում ներքին աղբյուրների տեսակարար կշռի աճի վերջին տարիներին արձանագրված միտումները պահպանվել են նաև 2019 թվականին»։

Ա. Ջավադյանի խոսքով, ՀՀ 2019 թվականին տնտեսական բարձր աճի և հարկային բարեփոխումների իրականացման պայմաններում կառավարությունը տարվա ընթացքում վերանայել է ՀՀ պետական բյուջեի եկամուտների ծրագիրը՝ աճի ուղղությամբ։ Տարվա ընթացքում պետբյուջեի եկամուտների աճը կազմել է 16.7%, իսկ հարկեր և տուրքերի գծով աճը՝ 16.4%:

«Միևնույն ժամանակ էական բարելավում է արձանագրվել հարկեր-ՀՆԱ ցուցանիշի գծով՝ նախորդ տարվա նկատմամբ 1.3% աճելով այն կազմել է 22.3%: Առաջնորդվելով պետական ծախսերի արդյունավետության բարձրացման նպատակի իրագործմամբ՝ 2019 թվականի ՀՀ պետական բյուջեի ծախսերի կատարման գործընթացում շարունակվել է ծախսերի արդյունավետության բարձրացման քաղաքականությունը։ Պետբյուջեի ծախսերի աճը նախորդ տարվա նկատմամբ կազմել է 12.6%, կամ ՀՆԱ-ի մեջ 0.8%` կազմելով ՀՆԱ-ի 24.9%-ը»,-տեղեկացրեց Ա. Ջավադյանը։