Ձեր վստահելի աղբյուրը

5-րդ ալիք հեռուստաընկերության լրատվական ծառայության ղեկավար Արտակ Հերիքյանը գրում է.

«Ինչ-որ բան, իրոք, սարքին չէ, ինչպես մեր արցախցի հեռուստադիտողներն են ասում՝ մարդկանց «կլխնեն խարաբ ա»։ 

Արցախում «5-րդ ալիքի» հեռարձակումը դադարեցնելու պատճառը սկզբում «զուտ տեխնիկական» էր. Ֆրանսիայից սարք էր պատվիրվել, սարքը եկավ, անսարքությունը վերացվեց:

Հետո, պարզվեց խնդիրը «զուտ իրավական է». Արցախում հարկատուների հաշվին պետք է հեռարձակվեն կառավարության սահմանած ցանկում ընդգրկված հեռուստաալիքները, որոնց մեջ չկա «5 TV»-ն, բայց եղել է «Արարատը», որը ռեբրենդինգից հետո դարձել է «5-րդ ալիք»:

Սկզբում, երբ խնդիրը «զուտ տեխնիկական» էր, Արցախից հորդորում էին ձեռնպահ մնալ «քաղաքական շահարկումներից»:

Հետո, երբ խնդիրը զգուշորեն վերածվեց «զուտ իրավականի», Արցախից ասացին, որ «հանրապետությունում հեռարձակվող հեռուստաալիքների ցանկի վերանայումը քաղաքական շահարկումների հետևանք է» (Մեջբերումը՝ hraparak.am-ից):

Ֆրանսիացի գրող Ժան Ժիոնոն ասում էր, թե «լավ խաբելու համար էլ շատ ազնվություն է պետք»:

Նշենք, որ aparaj.am-ի փոխանցմամբ, հունիսի 1-ից Արցախում դադարեցվել էր 5 ալիքի հեռարձակումը, որոնց թվում են «5-րդ ալիքը», «Շողակաթը», «Ա ԹԻ ՎԻ» հեռուստաընկերությունը և «Футбол 1», «MTV Dance» հեռուստաալիքները: Ինչպես պնդում էին «Արցախկապ» ՓԲԸ գործադիր տնօրեն Ալեքսեյ Ալեքսանյանը և Արցախի Հանրապետության նախագահի աշխատակազմի տեղեկատվության գլխավոր վարչության պետ Վահրամ Պողոսյանը,  հեռուստաալիքների խափանման պատճառը տեխնիկական էր:

Հունիսի 10-ին Վահրամ Պողոսյանը ֆեյսբուքյան էջում տեղեկացրել է, որ սարքը վերջապես տեղ է հասել, իսկ ԱՀ կառավարության 2020 թվականի փետրվարի 10-ի որոշմամբ ԱՀ հարկատուների հաշվին կհեռարձակվեն միայն ցանկով հաստատված հեռուստաալիքները, որտեղ, ի դեպ, ներառված չեն «5-րդ ալիք»-ը և «Շողակաթ»-ը:

Հունիսի 4-ին «Ապառաժ»-ի հետ զրույցում «Արցախկապ» ՓԲԸ գործադիր տնօրենը նշել էր, որ սարքը ստանալուց հետո խնդիրը կլուծվի: Սակայն, ինչպես պարզվում է, հայկական երկու հեռուստաալիքների հեռարձակման դադարեցումը կապված է այլ խնդրի հետ:

Արցախի Հանրապետության Ազգային Ժողովի 2019թ. բյուջեի կատարողականի հանձնաժողովային քննարկման ժամանակ այսօր «5-րդ ալիք»-ի հեռարձակման հարցը բարձրաձայնել էր ԱՀ ԱԺ «Արդարություն» խմբակցության ղեկավար Դավիթ Գալստյանը: ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանը չի անդրադարձել հարցին՝ պատճառաբանելով օրակարգային հարցի քննարկումից դուրս լինելը:

Մանրամասները՝ սկզբնաղյուր կայքում։