Ձեր վստահելի աղբյուրը

«Հայաստանի՝ որպես պետությույն կայացման փուլից սկսած մեծ զգուշավորություն է դրսևորվել Սահամանադրությանն առնչվող խնդիրների նկատմամբ»,- այսօր լրագրողների հետ զրույցում ասաց ԱԻՄ առաջնորդ Պարույր Հայրիկյանը՝ անդրադառնալով ՀՀ ներքաղաքական կյանքին։

Նրա խոսքով, Սահմանադրությունը, լինելով մյուս օրենքների հիմքը, պետք է նման անփույթ և շտապողական վերաբերմունքի չարժանանար, և այն, ինչ եղավ, ոչ միայն անհասկանալի է, այլ նաև՝ վտանգավոր։

Հիշեցնենք, որ երեկ խորհրդարանը 89 կողմ ձայնով ընդունեց «Սահմանադրական փոփոխությունների» նախագիծը, համաձայն որի՝ ՍԴ կազմը պետք է փոխվի։

Պարույր Հայրիկյանի խոսքով, գործող իշխանությունները հասարակությանը վարժեցրին՝ իրենցից անառողջ դրսևորումներ սպասելուն։

«Երբ մի քանի օր առաջ ես Նիկոլ Փաշինյանից լսեցի առողջ գնահատականներ՝ ընտրակաշառքը երկրից վերացնելու վերաբերյալ, գիտե՞ք լսում էի և ականջներիս չէի հավատում, որովհետև և՛ իշխանության չարաշահմամբ սեփական նպատակներին հասնելու խնդիրը, և՛ այլընտրանքը մերժելու դիրքորոշումը շատ բնորոշ են իշխանություններին։ Բայց հետո մտածեցի՝ ինչո՞ւ են միան ԲՀԿ-ի հետ կապված նման քայլեր անում, նման մտասևեռմամբ, և հասկացա, որ սրանցից, ցավոք սրտի, առողջ գործելակերպ սպասելը՝ գնալով ավելի դժվար է դառնում։ Եվ ակամա վերադառնում ես ռազմավարական ընկալումներին։ Տարբեր իշխանություններ իրականացնում են պայքար տարբեր բաների դեմ՝ ռասաների, դասակարգերի, կրոնների... բայց ինձ համար շատ վաղուց ակնհայտ է, որ հիմնական պայքարն ընթանում է նյութապաշտների և գաղափարապաշտների միջև »,- նշեց նա։

Ըստ ԱԻՄ առաջնորդի՝ Վենետիկի հանձնաժողովը շատ նրբանկատ է արձագանքում գժերին, երբ գիտի, որ դիմացինը կարող է խանգարումներ թույլ տալ։

«Իրենց վերջին ուղերձում, օրինակ, ասում են, որ ՍԴ անդամները երևույթը քննադատելիս պետք է իրենց անհատական դիրքորոշումներից վեր կանգնեն։ Բայց ինչո՞ւ նույն բանը չի ասվում վարչապետին, ինչո՞ւ նույն բանը չի ասվում ԱԺ անդամներին, որ իրենց անձնականից վեր կանգնեն հարցեր քննարկելիս։ Միջազգային կառույցների արձագանքը մեզ չի զրկում իրավիճակը անաչառ գնահատելու իրավունքից։

Ժողովրդավարության հարցում ես չլսեցի, որ որևէ եվրոպական կառույց ասեր՝ գիտե՞ք, հայեր, կիսանախագահական համակարգից անցում եք կատարում խորհրդարանական համակարգի, որտեղ քաղաքացիների իրավունքները կրճատվում են։ Այսպիսի գնահատական չի հնչել, նշանակում է՝ իրենք քաղաքացու իրավունքի վերաբերյալ արժանի մակարդակ չունեն։ Հիմա ասել, որ ես Արմեն Սարգսյանի անէացմանը՝ որպես ազգային գործիչ, դեմ եմ, չէ։ Նա դասական դավաճան է։ Իրեն ընտրեց մի թիմ, որն ասպարեզից հեռացավ, և Արմեն Սարգսյանը, փոխարեն նրանց հետ հեռանար, կառչեց այդ աթոռին ու մնաց... որ ի՞նչ»,- շեշտեց Պարույր Հայրիկյանը։

Նրա խոսքով, իշխանափոխությունից հետո նոր կառավարությունը պետք է հայտարարեր՝ նախորդ ռեժիմին ծառայած բոլոր պաշտոնյաները պետք է հեռանան. «Բայց ոչ, Նիկոլ Փաշինյանը որոշեց օգտագործել նախորդ ռեժիմին ծառայած և իրենից վախեցող մարդկանց»։