«Նիկոլի ցույցերին օրումեջ տանում էին մեզ, փակում էին, հիմա ասում են՝ չէ, պետք է հին գյուղապետը գա»
ՀՀ Արմավիրի մարզի Եղեգնուտ համայնքի բնակիչներն այսօր շարունակում են իրենց բողոքի ակցիան։ Նրանք պահանջում են, որ նախկին համայնքապետը չվերականգնվի իր պաշտոնում։
Գյուղացիները նշում են, որ իրենք գոհ են ներկայիս պաշտոնակատար Ռազմիկ Մկրտչյանից, պահանջում են, որ նա էլ շարունակաի Եղեգնուտի ղեկավարումը։ Բնակիչները փակել են գյուղապետարան տանող ճանապարհը, նշում են՝ թույլ չեն տալու աշխատել, ցանկանում են հանդիպել Արմավիրի մարզպետին։
«Ուզում ենք հասկանալ՝ ով է նախկին գյուղապետի հովանավորը, հասկանանք, թե ինչու է ՀՀԿ անդամն ուզում նորից վերադառնալ գյուղ։ Հեղափոխություն ենք արել։ Այդ հեղափոխությունն առաջինն այս գյուղն է զգացել։ Այսօր կոտրում են մարդկանց հոգին։ Նման բան չի կարող լինել»,- ասաց գյուղացիներից մեկը։
Պաշտոնակատար Ռազմիկ Մկրտչյանն ասաց, որ իր համար անակնկալ է, որ այս հեղափոխական ժողովրդին փորձում են կոտրել ՀՀԿ-ի միջամտությամբ ու որոշ անդամների աջակցությամբ։
«Ինձ համար անհասկանալի է, թե ինչու են ուզում նախկին գյուղապետին բերել, ինձ ազատեն»,- նշեց նա՝ հավելելով, որ իր լիազորություններն արդեն դադարեցված են։
Ռ.Մկրտչյանն ասաց, որ երեկ մարզպետարանի աշխատակիցները եկել էին ընդունում- հանձնում անելու ու նախկին գյուղապետին հանձնելու համար. «Ամեն ինչ արվում է նրան հետ բերելու համար»։
Ըստ նրա, գյուղի բնակիչները չեն ուզում հինը վերադառնա, թող նոր ընտրություն լինի։
Գյուղացիներն ուզում են մարզպետից անձամբ տեղեկանալ, թե ինչու պետք է նոր գյուղապետին հանեն, «նախկին թալանչի գյուղապետին բերեն», մարզպետարանից ասում են՝ կա դատարանի որոշում։
«Նիկոլի ցույցերին օրումեջ տանում էին մեզ, փակում էին, հիմա ասում են՝ չէ, պետք է հին գյուղապետը գա»,- ասաց գյուղացիներից մեկը։
Նրանք նշում են, որ այս երկու տարում գյուղում ահագին գործ է արվեն։ Իրենք չեն թողնելու, որ նախկին գյուղապետը վերադառնա։
Վերաքննիչ դատարանի որոշմամբ, համայնքապետի ներկայիս պաշտոնակատար Ռազմիկ Մկրտչյանը պետք է լքի իր պաշտոնը, իսկ նրա փոխարեն այդ պաշտոնում վերականգնվի նախկին համայնքապետ Ռազմիկ Մարգարյանը։
Բողոքի ակցիաների միջոցով եղեգնուտցիները ստիպել էին Ռազմիկ Մարգարյանին 2018-ի հուլիսի 2-ին հրաժարական տալ։ Նա էլ դիմել էր վարչական դատարան՝ համայնքապետի պաշտոնակատարի պաշտոնավարումը դադարեցնելու եւ իրեն նախկին պաշտոնում վերականգնվելու հայցով։
Լրահոս
Տեսանյութեր
Արման Թաթոյանը միացավ Բագրատ Սրբազանի առաջնորդած քայլերթին
