Վանեցյանի փաստաբան. ՀԺ-ն, չունենալով որևէ պատասխան մեր հայցին, փորձում է ուղղակի ձգձգել գործընթացը
ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանն ընդդեմ ՀԺ-ի գործով դատական նիստը հետաձգվեց, քանի որ պատասխանող կողմը նիստին չէր ներկայացել։ «Փաստինֆո»-ն գրում է, որ հաջորդ նիստը տեղի կունենա հոկտեմբերի 14-ին՝ ժամը՝ 14-ին։
Արթուր Վանեցյանի փաստաբան Լուսինե Սահակյանը լրագրողների հետ զրույցում ասել է, որ դատարանը նիստին ներկայանալու ծանուցումն ուղարկել էր, սակայն այն հետ էր ստացվել։
«Այսինքն իբրև թե կողմը չէր ստացել, բայց նույն հասցեով մենք հերքման տեքստն ենք ուղարկել, նրանք ստացել են և իրենց պատասխանն ենք ստացել։ Դրանից բացի այլ դատավարական փաստաթղթեր ևս ուղարկվել են այդ նույն հասցեով։
Ակնհայտ է, որ ՀԺ-ն, չունենալով որևէ պատասխան մեր հայցին, փորձում է ուղղակի ձգձգել, որովհետև եթե այսքան լրատվամիջոց տեղեկացված է այս դատական նիստի մասին և եկել է այս դատական նիստին, ակնհայտ է, որ ՀԺ-ն տեղեկացված էր դրա մասին։
Ակնհայտ մի փաստ գոյություն ունի, որ նրանք, իրենց անպատասխանատու, շինծու տեղեկատվությունը տարածելով, հավանաբար չէին գիտակցում, որ գալու է այն ժամանակը, երբ իրենք պետք է պատասխան տան իրենց կողմից տարածված տեղեկությունների համար։
Նրանք բնաանաբար չունեն պատասխան, որովհետև այդ տեղեկություններն իրականությանն ակնհայտորեն չեն համապատասխանում և որդեգրել են դատական նիստերը ձգձգելու տարբերակը»,-նշել է փաստաբանը։
Նիստի ժամանակ որոշում է կայացվել պատասխանող կողմին ծանուցումն ուղարկել էլեկտրոնային փոստի ճանապարհով։ Լուսինե Սահակյանը նկատեց, որ այս պարագայում նրանք այլևս հնարավորություն չեն ունենա պատճառաբանել, որ տեղեկացված չեն դատական նիստի մասին։
Հիշեցնենք, որ ԱԱԾ նախկին տնօրեն Արթուր Վանեցյանի ներկայացուցիչները հայցադիմում են ներկայացրել «Հայկական Ժամանակ» օրաթերթի դեմ` պահանջելով հերքել «Պատիվ ունե՞մ, թե՞ պատիվ չունեմ...» վերտառությամբ հոդվածում տեղ գտած զրպարտություն հանդիսացող տվյալները, հոդվածը հեռացնել և պարտավորեցնել հրապարակել հերքման տեքստը, փոխհատուցել պատճառված ոչ գույքային վնասը:
Վիճարկվող հոդվածում ԱԱԾ նախկին տնօրենի հասցեին մեղադրանքներ էր հնչեցվել՝ վարչապետ Փաշինյանի ընտանիքի դեմ վարկաբեկող նյութերի հրապարակումը կազմակերպելու համար։
«Տղամարդկային արժանապատվությունիցս ցածր է իջնել այդ մակարդակի: Ընտանիքն ինձ համար սրբություն է, իսկ այլոց վարկաբեկելու համար սեփական ընտանիքն օգտագործելու փորձերը` անընդունելի:
Հարկ եմ համարում ասել, որ նշված հրապարակման մեջ ինձ վերաբերող բոլոր դիտարկումներն ու ենթադրությունները ծայրից ծայր սուտ են, իսկ դրան հաջորդած շահարկումներն ու ֆեյքային հարձակումները՝ արդեն սովորական:
Այդ հրապարակման հեղինակն ու պատվիրատուն առաջին անգամ չէ, որ ինձ իր թաքուն վախերի հետ կապելով փորձում է վարկաբեկել, բայց այն, որ «պայքարը» կիջեցվեր այս մակարդակի, անպասելի էր անգամ ինձ համար:
Այս կեղծիքն անպատասխան չի մնալու, իսկ այդ «հրապարակմամբ» արդեն իսկ զբաղվում են իմ փաստաբանները»,- 2019 թ. դեկտեմբերի 12-ին հայտարարել էր. Ա.Վանեցյանը:
Ավելի ուշ հայտնի դարձավ, որ փաստաբանները հերքման պահանջով դիմել են թերթի խմբագրակազմին։ Աղբյուրը հիշեցնում է, որ հոդվածը եղել է անստորագիր, իսկ գլխավոր խմբագիրը շարունակում է մնալ վարչապետի կինը՝ Աննա Հակոբյանը։ Համենայն դեպս՝ այդպես է նշված կայքում։
Սահմանված ժամկետում լրատվամիջոցը չի հրապարակել հերքումը, ինչի պատճառով էլ փաստաբանական խումբը հայցադիմում է ներկայացրել դատարան։
Հարակից հրապարակումներ`
- Դատարանը վարույթ է ընդունել Արթուր Վանեցյանի հայցադիմումն ընդդեմ ՀԺ-ի
- Վանեցյանի ներկայացուցիչները քաղհայց կներկայացնեն ՀԺ-ի դեմ
Լրահոս
Տեսանյութեր
Եթե մտանք նոր սահման գծելու տրամաբանության մեջ, մենք մեր բոլոր սահմանները կկորցնենք. Փաշինյան