ՀՀ-ն առաջ տանելու համար քայլերից մեկը Նիկոլ Փաշինյանի հեռացումն է. Արա Վարդանյան
«Մենք պետք է հասկանանք, որ աշխարհի ցանկացած երկրում հեղափոխություն կամ հեղաշրջում իրականացնելու համար պետք է ակտիվացնել ընդհանուր զանգվածի մոտ տասը տոկոսը»,- այսօր լրագրողների հետ զրույցում ասաց «Հայաստան» համահայկական հիմնադրամի նախկին տնօրեն Արա Վարդանյանը՝ անդրադառնալով Բելառուսում նախօրեին անցկացված նախագահական ընտրություններին և դրանից հետո ծավալված բողոքի ցույցերին։
Նրա խոսքով, դեռևս պարզ չէ՝ կկարողանա՞ Բելառուսի բնակչության տասը տոկոսը հավաքվել և պահանջել Լուկաշենկոյի հրաժարականը։
Ինչ վերաբերում է ՀՀ վարչապետ Նիկոլ Փաշինյանի՝ Լուկաշենկոյին ուղղված շնորհավորանքին և դրա շուրջ առաջացած դժգոհություններին, ապա, ըստ Արա Վարդանյանի, դա շատ բնական է, քանի որ մարդիկ չեն կարողանում հասկանալ՝ ինչպես է հեղաշրջմամբ իշխանության եկած մարդը շնորհավորում Բելառուսի վերընտրված նախագահին։
«Սա իրոք Նիկոլ Փաշինյանի կողմից ռևերանս էր Ռուսաստանի հանդեպ, բայց Նիկոլ Փաշինյանը չի հասկանում, որ ռևերանսներով հարաբերություններն այլևս որևէ հնարավորություն չունեն լավանալու։ Այդ հարաբերությունները փչացրել է հենց Նիկոլ Փաշինյանը՝ իր տարբեր հայտարարություններով, քայլերով և նշանակումներով։ Ցավում եմ, որ նա դիմում է նման ցածր քայլերի, որ սիրաշահի ՌԴ-ին»,- շեշտեց բանախոսը։
«Համերաշխություն» կուսակցության նախագահ Սարգիս Ավետիսյանն էլ, անդրադառնալով ՀՀ ներքաղաքական խնդիրներին, մասնավորապես արտակարգ դրության ժամկետի երկարաձգմանը, նշեց՝ մեծ հաշվով դա քաղաքական զարգացումները ճնշելու համար է։
Նրա խոսքով, տարբեր ոլորտներում առկա դժգոհություններն ու դրանց հետևող ցույցերը լռեցնելու փորձ է արվում, ինչն ուղղակի հիմարություն է, և շատ կարճ ժամանակ հետո բոլորը հասկանալու են, որ օրինակ, Ամուլսարի խնդիրը նաև Երևանում ապրող մարդու խնդիրն է։
«Հետևաբար բոլոր փոքր-փոքր ոլորտային պիկետները ժամանակի ընթացքում միավորվելու են և դառնալու են մեծ բողոքի ցույց, ընդվզում, ինչն էլ ունենալու է իր քաղաքական տրամաբանությունն ու ավարտը։ Առկա բոլոր խնդիրները քաղաքական են, և քաղաքական լուծում են ստանալու։ Դա իշխանույունները շատ լավ են հասկանում, և արտակարգ դրությունը երկարացնում են, որ ոստիկանը հնարավորություն ունենա երիտասարդ աղջիկներին կամ տարեցներին քաշքշելու։ Իսկ եթե ոստիկանությունը նման իրավունք ու հնարավորություն չունենա, մարդն ինքը կորոշի՝ մասնակցե՞լ ցույցերին, թե՞՝ ոչ»,- նշեց բանախոսը։
Սարգիս Ավետիսյանի խոսքով, ակնհայտ է, որ երկիրը տնտեսական վատ դրության մեջ է հայտնվել, այդ պատճառով չի կարելի անընդհատ երկարաձգել արտակարգ դրության ռեժիմը։ Ըստ նրա, հեքիաթներ են խոսքերը, թե տնտեսական աճ կա երկրում.
«Գնացեք, տեսեք՝ ինչ է կատարվում աշխատանքային բյուրոներում, բոլորն աշխատանք են ման գալիս։ Եվ հենց հնարավորություն եղավ, այդ մարդիկ դուրս են գալու փողոց՝ իրենք բողոքն արտահայտելու։ Միայն ճանապարհով անցնելիս տեսնում ենք բազմաթիվ հիմնարկներ, որոնք չեն գործում և հարյուրավոր աշխատակիցներ տանը նստած են։ Սա նշանակում է, որ երկիրը ճիշտ չի կառավարվում։ Բոլորը հույսները դրել են, որ Նիկոլ Փաշինյանն ինչ-որ կախարդական փայտիկ ունի, բայց նա ոնց ման է գալիս՝ այդ փայտիկը չի գտնում»։
Սարգիս Ավետիսյանը նշեց՝ երկիրը ճիշտ կառավարող է պետք։ Նրա խոսքով, նախկիններ և ներկաներ չկան, կան հայեր... և պետք է երկիրը ճիշտ կառավարողին գտնել։ Բակախոսը պնդում է՝ չպետք է ընկնել լիրիկական զեղումների հետևից և նշել՝ գիտեք, այս մարդն այսինչ բանն է արել. հազարավոր մարդիկ այսօր տուժում են դրանից։
«Մարդիկ տներում մահանում են, դիմում են հիվանդանոց, առողջապահության «դոկտոր մահը» սպանում է այդ մարդկանց։ Այսինքն՝ մարդիկ էսօր վախենում են գնալ հիվանդանոց, վախենում են, որ այնտեղ կմեռնեն»,- եզրափակեց խոսքը բանախոսը։
Արա Վարդանյանն էլ նշեց, որ արտակարգ դրության ռեժիմը երկարաձգվում է ընդդիմադիր դաշտը սաստելու համար։ Նրա խոսքով, Նիկոլ Փաշինյանը քաջ գիտակցում է, որ ժողովրդի մեջ կա մեծ զանգված, որ ունի շատ լուրջ դժգոհություններ։
«Վերջին երկու ամիսների ընթացքում տեսնում ենք, որ իշխանական ողջ բուրգը փորձում է վարկաբեկել ընդդիմության բոլոր գլխավոր խաղացողներին։ Օրինակ, փորձում են կազմաքանդել ԲՀԿ-ն, նախագահ Քոչարյանի գործը դեռ քննվում է, և ֆեյքահայությունը ամեն դատական նիստի ժամանակ միանգամից սկսում է տարատեսակ ստեր տարածել։ Նախագահ Սարգսյանը կարճ հոլովակներ է հրապարակում, և նույն օրը ձերբակալում են Ռոբերտ Նազարյանին, և դա կապում են Սերժ Սարգսյանի հետ։ Ամեն կերպ փորձ է արվում սաստել ընդդիմադիր գործիչներին, բայց Նիկոլ Փաշինյանը պետք է հասկանա, որ քաղաքագիտական առումով մենք հասել ենք մի հանգրվանի, որ ժողովուրդը գիտի՝ ումից է պետք փախչել, բայց չգիտի՝ ում հետևից գնալ»,- նշեց Արա Վարդանյանը։
Բանախոսի խոսքով, ընդդիմությունը պետք է գաղափարի շուրջ համախմբվի, քանի որ հասարակությունը պետք է գնա ոչ թե անձի, այլ գաղափարի հետրից.
«Գաղափարը ոչ թե Նիկոլ Փաշինյանի հեռացումն է, այլ ՀՀ-ն առաջ տանելը։ Եվ դրա համար արվող քայլերից մեկը Նիկոլ Փաշինյանի հեռացումն է։ Մենք այսօր պատմական ամենածանր փուլում ենք, երբ ՌԴ-ի հետ մեր հարաբերությունները կարծես փլուզվում են։ Արցախի հետ կապված բանակցություններում մենք զիջումների ենք գնացել։ Եվ ներկայիս ընդդիմությունը, կամ ապագա իշխանությունը պետք է համախմբվի այս գաղափարի շուրջ... լուրջ քայլեր է պետք ձեռնարկել, որ կայուն հարաբերություններ հաստատվեն ՌԴ-ի և մյուս պետությունների հետ։ Նաև պետք է քայլեր արվեն, որպեսզի գոնե 2018 թվականի բանակցային գործընթացը հետ բերենք»։
Հարակից հրապարակումներ`
- Աննա Կոստանյանը՝ իշխանություններին. Եվ վերջապես լուծում տվե՛ք Ամուլսարի հարցին
- Արտակարգ դրությունը ևս մեկ ամսով կերկարաձգվի.
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց