Լիբանանից Արցախ բնակության եկող հայերը կապահովվեն աշխատանքով և բնակարանով. Արայիկ Հարությունյան
«Մեզնից յուրաքանչյուրը իր ծառայության մեջ պետք է անի առավելագույնը, որպեսզի հաջողությամբ լուծի նույնիսկ անլուծելի թվացող խնդիրները։ Դրա համար անհրաժեշտ կամքը, ներուժն ու վճռականությունը մենք ունենք»,- այսօր լրագրողների հետ հանդիպմանն ասաց Արցախի Հանրապետության նախագահ Արայիկ Հարությունյանը՝ անդրադառնալով իր պաշտոնավարման 100 օրերին։
Նախագահն իր ասուլիսը սկսեց Արցախի Հանրապետության օրվա առթիվ շնորհավորանքով։ Նա մաղթեց խաղաղ և արդյունավետ աշխատանք՝ ի բարօրություն հայրենիքի և հայ ժողովրդի։
Նրա խոսքով, իր պաշտոնավարման ընթացքում տարբեր ոլորտներում աշխատանքներ են տարվել։ Բայց, ըստ նախագահի, առաջնայինն ու գլխավորը պաշտպանության ոլորտն է։
«Պաշտպանության ոլորտում մենք որդեգրել ենք «ուժեղ սահման, ամուր թիկունք, պաշտպանված հայրենիք» սկզբունքը, որն ամրագրված է 2020-25 թթ. իմ ծրագրում։ Այս սկզբունքի կյանքի կոչման նպատակով անհրաժեշտ աշխատանքներ են կատարվում մեր երկրի պաշտպանվածության ամրապնդման, բանակի մարտունակության մակարդակի բարձացման, զինծառայողների ծառայողական և սոցիալական պայմանների շարունակական բարելավման ուղղությամբ։ Բանակը եղել և մնալու է մեր գլխավոր նպատակն ու խնդիրը։ Սեպտեմբերի մեկից պահեստազորի բոլոր սպաները, Արցախյան գոյամարտի մասնակից ազատամարտիկները և Հայրենական մեծ պատերազմի վետերանները կարող են անվճար օգտվել Արցախի և ՀՀ-ի բուժհաստատությունների ծառայություններից։
Հայկական ռազմարդյունաբերության ոլորտի մասնագետների կողմից կատարելագործված զինատեսակները գործնականում արդեն հաջողությամբ կիրառվում են զինված ուժերում։ ՊԲ սննդի մատակարարման գործում ավելացվել է տեղական արտադրության գյուղմթերքը։ Ակտիվ ընթանում են բնակարանաշինության աշխատանքները՝ ՊԲ պահեստազորի և ծառայության մեջ գտնվող սպաների բնակարանային ապահովության հարցը լուծելու համար։ Այդ խնդիրը մինչև 2023 թվականը կլուծվի։ Ուզում եմ ևս մեկ անգամ վերահաստատել, որ անվտանգության ապահովման և բանակի համար ֆինանսներ չեն տնտեսվի, իսկ խաղաղություն կպարտադրվի մեր բանակի հզորացմամբ։ Ժամանակակից զինտեխնիկայով բանակի համալրումը շարունակական է լինելու»,- նշեց նա։
Արայիկ Հարությունյանը շեշտեց, որ բոլոր ուժային կառույցների աշխատակիցները՝ Ոստիկանություն, ԱԱԾ, Փրկարար ծառայություն, պետք է տիրապետեն տարբեր տեսակի զինտեխնիկաների կիրառման հմտություններին, և առաջին անհրաժեշտության դեպքում համալրեն ՊԲ շարքերը։
Ինչ վերաբերում է ներքին անվտանգությանը, ապա Արցախի նախագահը նշեց, ոստիկանությունը և արտակարգ իրավիճակների վարչությունը իրականացնում են նաև մարտական ծառայություններ՝ Արցախի Հանրապետության սահմանը պաշտպանելու առումով։ Նրանք աշխատում են պաշտպանական բոլոր ուղղություններով.
«Սեպտեմբերի մեկից բարձրացվել են ոստիկանության ծառայողների աշխատավարձները։ Այն շատ ցածր էր, և այժմ շոշափելի բարձրացել է։ Այդ առումով ոստիկանի կարգավիճակը կարևոր է մեր ներքին անվտանգության հարցում։ Պարենային անվտանգության հարցը ևս այս պահին լուծվում է»։
Անդրադառնալով Արցախի արտաքին քաղաքականությանը՝ Արայիկ Հարությունյանը տեղեկացրեց, որ Արցախը վարում է բազմավեկտոր, հավասարակշռված և կառուցողական արտաքին քաղաքականություն, փոխադարձ հարգանքի հիման վրա շարունակում է հնարավոր բոլոր պետությունների հետ բարեկամական, փոխշահավետ և իրավահավասար քաղաքական ու տնտեսական հարաբերություններ հաստատել։
«Մեր ուշադրության կենտրոնում են մնում Արցախի Հանրապետության միջազգային ճանաչումն ու կենտրոնացված համագործակցության զարգացումը։ Նախապատրաստական աշխատանքներ են տարվում Արցախի Հանրապետության միջազգային համագործակցության աշխարհագրությունն ընդլայնելու ուղղությամբ։ Երկու հայկական պետությունների քաղաքական ղեկավարությունների միջև կանոնավոր կերպով անց են կացվում խորհրդակցություններ՝ ադրբեջանա-ղարաբաղյան հակամարտության խաղաղ կարգավորման գործընթացի վերաբերյալ։ Գոհունակությամբ կարող ենք արձանագրել, որ ադրբեջանա-ղարաբաղյան հակամարտության գոտում վերջնական խաղաղության հաստատման հարցում հայկական երկու պետությունների տեսլականները համընկնում են»,- շեշտեց Արցախի նախագահը։
Նա տեղեկացրեց նաև, որ Արցախ-Սփյուռք կապերը ևս ամրապնդվում են։ Դրա վառ ապացույցն է նախագահի հրամանագիրը, որով ստեղծվել է աշխատանքային խումբ՝ Բեյրութում տեղի ունեցած ողբերգության պատճառով Լիբանանի հայկական համայնքին ֆինանսական օգնություն ցուցաբերելու գործընթացը կազմակերպելու և համակարգելու նպատակով.
«Բեյրութ է հասել «Արցախի ժողովրդից Լիբանանին» հումանիտար օգնությունը։ Աջակցությունը պարենամթերքի տեսքով է։ Լիբանանահայ մեր հայրենակիցներին աջակցելու նպատակով արդեն 35 մլն դրամ է փոխանցվել։ Իսկ քաղաքացիների հանգանակած գումարների հատկացման վերաբերյալ լրացուցիչ որոշումներ դեռ կկայացնենք»։
Արայիկ Հարությունյանը նշեց նաև, որ ընթացքի մեջ է Արցախում բնակություն հաստատելու ցանկություն հայտնած մի շարք լիբանանահայ ընտանիքների տեղափոխումը։ Նրանք, ըստ նախագահի, կապահովվեն աշխատանքով և բնակարանով։ Նշվեց, որ արդեն մի քանի լիբանանահայ ընտանիք բնակվում է Արցախում։
«Արցախը կշարունակի նեցուկ լինել աշխարհի տարբեր երկրներում բնակվող մեր քույր-եղբայրներին»,- վստահեցրեց նա։
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ
