Ձեր վստահելի աղբյուրը

Երևանի ընդհանուր իրավասության դատարանի Ավանի և Նոր Նորք նստավայրում, դատավոր Վահե Միսակյանի նախագահությամբ, ՀՀ երրորդ նախագահ Սերժ Սարգսյանի և մյուսների գործով դատական նիստը հետաձգվեց, քանի որ նիստին Սերժ Սարգսյանը ներկա չէր։ 

Երրորդ նախագահի պաշտպան Ամրամ Մակինյանը դատարանին ներկայացրեց բժշկական փաստաթուղթ՝ ասելով, որ երեկ երեկոյան առողջական վիճակի վատացում է եղել Սերժ Սարգսյանի մոտ. «Ստուգվել է համապատասխան բժշկի կողմից, արձանագրվել է սուր շնչառական ֆոն»։

Դատավորի հարցի՝ բժշկական հաստատությունում չի գտնվո՞ւմ այս պահին, պաշտպանն ասաց, որ ոչ։

Գործով մեղադրող դատախազ Արսեն Մարտիրոսյանն ասաց, որ բժշկական փաստաթղթից հետևում է, որ կանչը գրանցվել է երեկ, ի թիվս այլ հատկանիշների նշված է որոշակի ջերմաստիճանի բարձրացում, բժշկական փաստաթղթի բովանդակությանը ծանոթանալուց չկային այնպիսի հատկանիշներ, որոնք օբյեկտիվորեն անձին զրկեին դատարկան նիստին ներկայանալու հնարավորությունից։ Դատախազի խոսքով, դատական նիստերն անվերջ կհետաձգվեն եթե նիստերից առաջ դատարան ներկայացնեն փաստաթղթեր, թե մի օր ամբաստանյալի ինքնազգացողությունն է վատացել, մի օր, իբր, պաշտպանյալի ինքնազգացողությունը։

Ամրամ Մակինյանն անդրադարձավ դատախազի խոսքում հաճախ հնչող՝ «իբր»-երին։

«Ինչ է նշանակում՝ իբր, իբր, իբր։ Դատախազին հիշեցնեմ, երբ որ շեշտադրումներ է անում՝ ամբաստանյալ Սարգսյան, հիշեն, որ խոսք է գնում Հանրապետության նախագահի մասին, հարգանք եմ պահանջում նախագահի մասին խոսելուց։
Երբ որ հարգելի դատախազն ուսումնառություն էր ստանում տարրական դպրոցում, Հանրապետության երրրոդ նախագահը ղեկավարում էր մի պատերազմ, որից կախված էր նաև ...»։

Դրանից  հետո վեճ սկսվեց պաշտպանի ու դատախազի միջև։ Դատավորը խնդրեց դադարեցնել բանավեճը, առաջարկեց ավելի առարկայական։

Դատավոր Վահե Միսակյան, ասաց, որ Սերժ Սարգսյանի բացակայությունն այսօր անհարգելի չի համարում. «Հաշվի առնելով բժշկական փաստաթղթում առկա տաեղկությունները, ախտորոշումը, չունենալով նաև հակառակի մասին տեղեկություն այսօրվա  դատական նիստին առողջական վիճակով ներկայանալու հնարավորության մասին, վերջինս բացակայությունն անհարգելի չեմ համարում։ Կարծում եմ՝ հաջորդ դատական նիտսին պարոն Սարգսյանի առողջացած կներկայանա դատարան, կփորձենք պարզաբանումներ ստանալ,  թե ինչ առողջական վիճակի վատթարացման մասին էր խոսքը»,- հայտարարեց դատավորը։

Դատական հաջորդ նիստը նշանակվեց հոկտեմբերի 22-ին։

Այս քրեական գործով ընդհանուր առմամբ 5 մեղադրալ կա։ Սերժ Սարգսյանից բացի մեղադրանքներ են առաջադրվել նաև գյուղատնտեսության նախկին նախարար Սերգո Կարապետյանին, նախկին փոխնախարար Սամվել Գալստյանին, վարչության պետ Գևորգ Հարությունյանին, գործարար Բարսեղ Բեգլարյանին։

Ըստ Սերժ Սարգսյանին առաջադրված մեղադրանքի՝ «նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում»։

«Սերժ Սարգսյանի մեղադրանքը կառուցված է մեկ ապացույցի, այն է մեկ անձի ցուցմունքների վրա, որոնք իրարամերժ են, հակասական, անարժանահավատ, անտրամաբանական, մի մասն էլ անթույլատրելի»,-նշում են Սերժ Սարգսյանի պաշտպանները։