Ձեր վստահելի աղբյուրը

«ԵՊՀ-ն առաջին կուրսի ուսանողների համար վարձը բարձրացրել է մինչև 160 հազար դրամով»,- խորհրդարանական հայտարարությունների ժամին ասաց ԱԺ «Լուսավոր Հայաստան» խմբակցության պատգամավոր Կարեն Սիմոնյանը։

Նրա խոսքով, վարձավճարները բարձրացվում են այն պարագայում, երբ ԵՊՀ-ում կան ֆակուլտետներ, որոնք թերբեռնված են։

Բացի այդ, ըստ պատգամավորի, ուսանողների մեծ մասն այսօր չի ստանում այն ծառայությունները, որոնց համար վճարում է, քանի որ դասերն անցնում են հեռավար տարբերակով։

«Չեն գնում դասի, չեն տրամադրվում լսարանները, իսկ ուսանողն ինքը պետք է ապահովի իր ինտերնետ կապն ու տեխնիկական միջոցները, ինչպես նաև կապը դասախոսի հետ։ Հետևաբար, ուսանողը պահանջում է, որ ուսման վարձերը որոշ չափով զեղչվեն։  Բայց այդ զեղչը չպետք է լինի այլ միջոցների կրճատման արդյունքում, օրինակ, դասախոսական կազմի ժամավճարների հաշվին։ Առանց այդ էլ պետական և մասնավոր բուհերի դասախոսները ստանում են շատ քիչ աշխատավարձ։ Ուստի ուսանողներին կարող է աջակցություն տրամադրել պետությունը։ Ինչպե՞ս, օրինակ հարկերի որոշակի զիջումների միջոցով։ Հավատացեք, անգամ չնչին տոկոսով զեղչը կարևոր է ուսանողի համար»,- ընդգծեց պատգամավորը։

Կարեն Սիմոնյանը հիշեցրեց, որ ժամանակին ընդդիմադիր գործիչներն ասում էին, թե որևէ սովորող ուսանող չպետք է դուրս մնա բուհից՝ վարձը չվճարելու պատճառով.

«Հույս ունեմ, որ պետությունն ու կրթության լիազոր մարմինը կգնան եզրահանգման և կկարողանան որոշակի քայլերի միջոցով կա՛մ զեղչերի հարցը, կա՛մ գոնե տարաժամկետ վճարման համակարգ ներդնել։ Օրինակ, վերջին կուրսի ուսանողներից ամբողջ կիսամյակի վարձը միանգամից են պահանջում։ Եվ, ԵՊՀ-ն, ի տարբերություն մյուս բուհերի, բարձրացրել է ուսման վարձավճարը։

Ես ուզում եմ հասկանալ՝ կորոնավիրուսի այս նեղ իրավիճակում արդյոք պե՞տք էր ուսման վարձն ավելացնել։ Ես հասկանում եմ, որ մեր բուհերն ամբողջությամբ կախված են ուսանողների վարձավճարներից, սակայն այս իրավիճակում փոփոխություն է պետք։ ԿԳՄՍ նախարարությանը կոչ եմ անում հարցն ամբողջովին ուսումնասիրել»,- եզրափակեց խոսքը Կարեն Սիմոնյանը։