Մատների արանքով էլ չէ՝ վաբշե, սաղ արաքներով էլ նայել են. Արթուր Դալլաքյան
«Ես ձեզ ասում եմ՝ 30 տարի շարունակ այս ոլորտին մատների արանքով էլ չէ՝ վաբշե, սաղ արաքներով էլ նայել են»,- այսօր խորհրդարանում հայտարարեց «Բարգավաճ Հայաստան» խմբակցության պատգամավոր Արթուր Դալլաքյանը՝ «Պետական սահմանի մասին» օրենքում լրացումներ կատարելու մասին իր համահեղինակած օրենքի նախագիծը ներկայացնելիս:
Վերջինս նախագծով առաջարկում է Քաղաքաշինության, տեխնիկական և հրդեհային անվտանգության տեսչական մարմնին սահմանի վրա տրանսպորտային միջոցների վերահսկողությա համար համապատասխան թույլտվություն տալ:
Պատգամավորը հայտնեց, որ պետական սահմանին վերահսկողություն իրականացնելու լիազորությունից անհիմն զրկված է տրանսպորտի բնագավառում վերահսկողություն իրականացնող տեսչական մարմինը, մինչդեռ նրա լիազորությունները լիարժեք և ամբողջ ծավալով իրականացնելու համար անհրաժեշտ է, որ սահմանին նույնպես իրականացնի ավտոտրանսպորտային օրենսդրության պահպանման նկատմամբ վերահսկողությունը:
Դրա համար, ըստ պատգամավորի, անհրաժեշտ է, որպեսզի տեսչության համար առանձնացվի տարածք և շինություն սահմանային անցակետերում:
Քաղաքաշինության, տեխնիկական և հրդեհային անվտանգության տեսչական մարմնի ղեկավար Գեղամ Շահբազյանը ընթերցեց նախագծի վերաբերյալ կառավարության բացասական եզրակացությունը, բայց որպես տեսչության ղեկավար, ընդունեց, որ լրացումն անհրաժեշտ է իրենց գործառույթը լիարժեք իրականացնելու համար: Վերջինս պնդեց, որ դրա համար ժամանակ և միջոցներ են պետք նոր աշխատակիցներ ներգրավելու համար:
«Ռեսուրսները կարելի է տեղաբաշխել, մեր այսօրվա տեսչությունը մարզերում պարապ-սարապ ման է գալիս: Մարզային տեսչությունը՝ նոր աշխատակիցնեով գործ չունի, պարապ են»,- հայտարարեց Դալլաքյանը և առաջարկեց արագ գտնել միջոցներ և ոլորտին լուրջ ուշադրություն դարձնել:
Նախագծով նախատեսվում է, որ սահմանային անցման կետերում վերահսկողության իրականացումը կնպաստի նաև ուղևորափոխադրումների և բեռնափոխադրումների առավել անվտանգ կազմակերպմանը և իրականացմանը, կբարձրացնի դրանց կազմակերպողների պատասխանատվությունը և փոխադրումների կարգի նկատմամբ ուշադրությունը:
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ