Հեղափոխական իշխանությունը պետք է ճգնավորի պես ապրի. Մարուքյան
«Ըստ էության, ինչ տեղի է ունենում քաղաքական ենթատեքստ ունի և քաղաքական նպատակներ է հետապնդում»,- խրոհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով Փաշինյան-Ծառուկյան «փոխհրաձգությանը»։
Սակայն, նա այդ բանավեճը չցանկացավ մեկնաբանել, քանի որ, ինչպես ինքը նշեց, չի ուզում մտնել երկու նախկին գործընկերների տարածք. «Երբ նրանք հուշագիր էին ստորագրում, ինձ չէին հարցրել, չէ՞։ Կամ որ բանավիճում են, ինձ չեն հարցնում, այդտեղ իմ անելիքը չկա։ Երբ ես դեբատի ժամանակ ասում էի, որ խորհրդարանը պարոն Ծառուկյանի տեղը չի, մասնակիցներից որևէ մեկն այդ նույն բանը չասաց։ Հետո իշխանությունը մտերիմ դարձավ Ծառուկյանի հետ, հարսանիք, կնունք, ծնունդ, հուշագիր..., ես չեմ ուզում մտերիմների հարաբերությունների մեջ մտնեմ, էլի։ Իրար հետ ուզել են մարդու իրավունքները պաշտպանել, Արցախյան հարցը լուծել։ Ինչ վերաբերում է մեզ, ապա մենք համագործակցում ենք ԲՀԿ-ի հետ այն հարցերում, որտեղ մեր օրակարգերը, մոտեցումները համընկնում են։ Բայց, կարծում եմ քաղաքական դեբատը պետք է բարձր մակարդակում պահել, մենք դեբատի մակարդակը փորձել ենք չիջեցնել, բայց երբ քեզ խփում են գոտկատեղից ներքև, դու էլ հենց գոտկատեղից ներքև պատասխան ես տալիս»։
Նա նշեց, որ իրենք, օրինակ, հարցնում են, թե ինչո՞ւ է վարչապեն իր ինքնաթիռը ներկում այն դեպքում, երբ մարդկանց ասում է մի տուփ սիգարետ քիչ ծխեք, կամ մի շիշ օղի քիչ խմեք, որ փողը տնտեսեք։
«Հետո, երբ հարցնում ենք՝ ինչ է արժեցել այդ ինքնաթիռ ներկելը, ասում են՝ պետական գաղտնիք է։ Բայց նման ծախսի՝ պետական գաղտնիք լինելը, նախկին իշխանությունների օրոք վարչապետն էլ է քննադատել։ Հիմա ինքնաթիռի ներկման արժեքը չի կարող ժողովրդից գաղտնի պահվել, այդտեղ պետական գաղտնիք չկա։ Իշխանությունը, որը ժողովրդին ժուժկալության կոչ է անում, պետք է ամենաժուժկալը լինի, հեղափոխական իշխանությունը պետք է ճգնավորի պես ապրի»,- շեշտեց նա։
Անդրադառնալով իշխանությունների թույլ տված սխալներին՝ Էդմոն Մարուքյանը նշեց, որ չի սխալվում նա, ով չի աշխատում, դա բնական է. «Սա միակ լեգիտիմ իշխանությունն է, որ իր սխալները չի ընդունում։ Ինչ սխալ արել են, չեն ընդունում։ Հիմա էլ ասում են՝ հա, արել ենք սխալներ, բայց չեն նշում, թե որոնք են դրանք։ Ընդհանուր մոտեցումները չեն փոխվում, իշխանությունը շարունակում է մնալ այն գծի մեջ, որ որևէ տեղում չի զիջում, անգամ եթե դա սխալ է։ Անգամ իմ վրա հարձակվելը չեն ընդունում, որ սխալ են արել։ Հարձակում է լինում, ասում են՝ սադրել են։ Կամ մարդու անձնական կյանքն են փորփրում։ Տիկին Սամսոնյանը հարց է տալիս, հետո թերթերով գրում են՝ թե բա քո նախկին ամուսինը...։ Հասկանո՞ւմ եք, ամեն ինչ, ինչ արվել է, ժողովրդավարական իշխանությանը հարիր չէ։ Եվ այս դեպքում, լեգիտիմ իշխանությունը կարող է կորցնել իր լեգիտիմությունը»։
Էդմոն Մարուքյանը հեգնանքով նշեց, որ մի քանի օրից ցրտերն ընկնելու համար ևս իշխանություններն ընդդիմությանն են մեղադրելու..., ընդդիմությունը մեղավոր է, որ ներդրումները չեն գալիս, կորոնավիրուսը տարածվում է, շուտով նաև տերևաթափ կլինի ընդդիմության մեղքով։
Հարակից հրապարակումներ`
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին