Այս պահին թիկունքում սպառազինության հետ կապված որևէ խնդիր չկա. Էնֆիաջյան
«Մենք պետք է համախմբված ու միահամուռ ուժերով պայքարենք՝ մեզ համար բաղձալի հաղթանակի պահը մոտեցնելու համար։ Բայց ուժերը միավորելու համար ոչ թե միայն կոչեր պետք է հնչեն, այլ գործողություններ պետք է լինեն. դրա վառ ապացույցը կլիներ ներքաղաքական համախմբվածությունը։ Այս համատեքստում պետք է ասել, որ Գագիկ Ծառուկյանն ազատության մեջ ավելի լավ պայքար կմղեր և մենք կունենայինք հաջողություն»,- այսօր խորհրդարանական ճեպազրույցի ընթացքում ասաց ԱԺ «Բարգավաճ Հայաստան» խմբակցության պատգամավոր Վահե Էնֆիաջյանը՝ անդրադառնալով Գագիկ Ծառուկյանի խափանման միջոց կալանքը փոխելու միջնորդության մերժմանը։
Նրա խոսքով, նման նախադեպ չէր եղել, և պարզից էլ պարզ է՝ մոտեցումները քաղաքական են եղել։
Հարց. Ֆրանսիայի ԱԳՆ-ն տեղեկացրել է, որ այսօր Ժնևում, իսկ երկուշաբթի օրը Մոսկվայում բանակցություններ տեղի կունենան։ Արդեն տեղյակ ենք, որ Ադրբեջանի ԱԳՆ-ն այսօր է Ժնև մեկնում, իսկ ՀՀ արտգործնախարարը՝ երկուշաթի։ Ձեր կարծիքով, մի սեղանի շուրջ նստելու հնարավորություն կա՞։
Վ. Էնֆիաջյան. Մենք շատ լավ գիտակցում ենք, որ ռազմական գործողություններում մեր բանակի ոգին շատ բարձր է, ռազմատեխնիկայի և սպառազինության խնդիր մենք չունենք, և կարող ենք պարտադրել գործողություններ։ Բայց ամենատարբեր սցենարների դեպքում էլ մենք շատ լավ գիտակցում ենք, որ ի վերջո խնդրի լուծումը պետք է լինի սեղանի շուրջ քննարկման արդյունքում։ Ինչպիսի՞ օրակարգով, ինչպիսի՞ բովանդակային քննարկում տեղի կունենա, զերծ կմնամ պատասխանել։ Արցախի ժողովուրդը պայքարել ու պայքարում է ազատության, պետականության ու ապրելու իրավունքի համար, և ի վերջո այս իրավունքերը պետք է հաստատվեն նաև միջազգային հանրության կողմից։ Արցախի Հանրապետությունն իր ինստիտուցիոնալ բոլոր ենթակառուցվածքներով որպես պետություն գոյություն ունի տարիներ շարունակ, ինչի մասին մենք տարբեր հարթակներում խոսել ենք։ Բանակցությունների գործընթացը կարող է նոր կետեր բերել, ինչ մասին այս պահին խոսելուց զերծ կմնամ։
Հարց. Արցախը դիմել է միջազգային հանրությանը՝ իր անկախությունը ճանաչման կոչով։ Եվ վարչապետն էլ ասել է, որ ճանաչումը հումանիտար աղետը կանխելու տարբերակներից մեկն է։ Այդ դեպում ինչո՞ւ ՀՀ խորհրդարանը օրակարգ չի բերում այս հարցը։
Վ. Էնֆիաջյան. Մեր քաղաքական ուժը այս և այլ հարցեր քննարկել է։ Եկեք հասկանանք մի կարևոր հանգամանք. ԱԺ-ում օրակարգ բերելու հարցը տեխնիկական կլինի, եթե քաղաքական որոշում լինի։ Շատ ավելի լուրջ հանգամանք կա այստեղ։ Դա մեր զինանոցում մեկ զենք է, որը կարող ենք գործի դնել, բայց հարցն այսօրեական չէ։ Ռազմական, պետական մակարդակով համագործակցությւան հուշագիր կնքելու, գործողություններ սկսելու նախադրյալներն այսօրեական կան։ Մեզ համար ամենակարևորը ոչ թե ՀՀ խորհրդարանի կողմից ճանաչումն է, այլ քաղաքակիրթ աշխարհի կողմից այս իրողությունն ընդունելն ու որպես փաստ արձանագրելն է։
Հարց. Ադրբեջանն ու Թուրքիան այս պատերազմում ինչո՞ւ դիմեցին վարձկանների օգնությանը, ի՞նչ խնդիր են այս ձևով լուծում։
Վ. Էնֆիաջյան. Մենք շատ լավ գիտենք Ադրբեջանի հոգեվարքագիծը՝ հատկապես շփման գծում։ Ադրբեջանի պետական ինստիտուցիոնալ գործառույթները շատ հարաբերական վիճակում են։ Եթե մի երկրի ռազմաքաղաքական որոշումներն ընդունում է մեկ այլ երկիր, այդ ինստիտուտներին չի կարելի բարձր դեր տալ։ Վարձկաններ, այո՛, եղել են, և հետագայում միջազգային հարթակներում էլ մենք այս խնդիրների մասին խոսելու ենք։
Հարց. Դուք ինքներդ Արցախ էիք այցելել։ Մեծաքանակ օգնություն է այնտեղ հասնում այս օրերին։ Կներկայացնե՞ք՝ ինչ էր այնտեղ կատարվում։
Վ. Էնֆիաջյան. Այո, մենք օրեր շարունակ եղել ենք Արցախում և տարբեր հանդիպումներ ենք ունեցել։ Վստահաբար ասում եմ՝ հումանիտար առումով լուրջ աշխատանքներ են տարվում։ Միակ պատգամավորը, որ այսօր գտնվում է խրամատում, ԲՀԿ-ական Հրանտ Մադաթյանն է։ Այս պահին թիկունքում սպառազինության հետ կապված որևէ խնդիր չկա։
Հարակից հրապարակումներ`
- Ծառուկյանի փաստաբան. «Մարտիրոսյան Մնացը վկա՝ հավատում եմ»
- Կրտսեր սերժանտը՝ Փաշինյանին. Ձեր հարցին պատասխանել չեմ կարող
- Հյուսիսային և հարավային ուղղություններում վերսկսվել են մարտական գործողությունները. Արցախի ՊԲ
- Գագիկ Ծառուկյանը կմնա կալանավորված
Լրահոս
Տեսանյութեր
Քաղտեխնոլոգ. Մոսկվայում Ալիևը հրաժարվեց վճարել խաղաղապահների՝ Արցախից դուրս գալու գինը