Արթուր Վանեցյան. Նիկոլ Փաշինյանը քրոնիկ ստախոս է, ստում է ցանկացած առիթով
«Որոշ ժամանակ աշխատելով ԱԱԾ տնօրենի պաշտոնում՝ սկսեցի նկատել, որ այն ինչ ցուցադրվում է, ինչի մասին խոսվում է, իրականում ամբողջը կեղծ է, իրենց լեզվով ասած, ֆեյք, խաբում են բոլորին ու ամենուրեք, խաբում, խաբում, խաբում։ Նիկոլ Փաշինյանը քրոնիկ ստախոս է»,- «Պրեսսինգ» հաղորդաշարում հայտարարեց «Հայրենիք» կուսակցության նախագահ Արթուր Վանեցյանը՝ պատասխանելով հաղորդաշարի հեղինակ Սաթիկ Սեյրանյանի այն հարցին, թե ինչու գործող իշխանությունների հետ համագործակցած Վանեցյանը՝ հեռացավ ԱԱԾ տնօրենի պաշտոնից։
Գեներալ-մայոր Վանեցյանն ընդգծեց, Նիկոլ Փաշինյանը խաբում է միշտ, ցանկացած առիթով, հետո սկսում է արդարանալ, բացատրել կամ էլ իր ստերը հիմնավորել։
«Առաջին մեկ տարվա ընթացքում հույս ունեի, որ կկարողանամ կանխել այդ վտանգավոր զարգացումները, ստի տարածումը, բայց ԱԱԾ աշխատակիցը, առավել ևս տնօրենը չէր կարող անել քաղաքական հայտարարություններ, անել այնպիսի հայտարարություններ, որոնք տարբերվում են երկրի ղեկավարի հայտարարություններից, և ես որոշեցի հրաժարական ներկայացնել ու «կանգ առ»-ի կոչ անել Նիկոլ Փաշինյանին։ Իմ «կանգ առ»-ի կոչը նրանց դուր չեկավ, փորձեցին ինձ կապել տարբեր պատմությունների հետ, սկսվեց մի խայտառակ վարկաբեկման արշավ իմ անձի նկատմամբ, ինձ մեղադրեցին ամենածանր հանցագործությունների կատարման մեջ։
Տեսնում եք, անցել է մեկ տարի, երեք ամիս ժամանակ, բայց որևէ մի հայտարարություն, մի մեղադրանք, որ հնչեցվել է իմ հասցեին, չի հատատվել։ Ամենամեծ խնդիրն այն է, որ նրանք չեն ուզում լսել ճշմարտություն, իրենց՝ հատկապես Նիկոլ Փաշինյանի ցանկացած հայտարարության դեմ՝ կապ չունի ճիշտ, թե սխալ հայտարարություն որակում են որպես անձնական վիրավորանք, և հրահանգ են տալիս իրենց մեծ ֆեյքային ֆաբրիկաներին մարդուն վարկաբեկել։ Իմ հրաժարականից հետո ես իմ երեխաներին փորձում էի բացատրել, որ ֆեյբուքից դուրս գան, որովհետև ամենակեղտոտ ստերը, հայհոյանքները գրում էին իմ հասցեին»,- ասաց Վանեցյանը։
Հարցին, կարծո՞ւմ եք Նիկոլ Փաշինյանն անձամբ է համակարգում այդ ֆեյքային արշավները, ԱԱԾ նախկին տնօրենը պատասխանեց. «Ոչ թե կարծում եմ, այլ գիտեմ, որ անձամբ ինքը իր հեռախոսի միջոցով ուղարկում է տարբեր խմբերի հանձնարարություններ, թե այսօր ֆեյսբուքում ինչ պետք է խոսեն, ինչ նյութ տարածեն, ում վարկաբեկեն, ինչ սուտ տարածեն։ Ու ցավոք սրտի, մեր հասարակության մի ստված հատված հավատում է այս կեղծ տեղեկություններին, այդ ֆեյսբուքում կեղծ տեղեկությունների տարածման հետևանքով եկանք ու կանգնեցինք այս ծանր վիճակի առաջ»։
Վանեցյանի տվյալներով, խոսքը վերաբերում է տասնյակ հազարավոր ֆեյք օգտահաշիվներին։
«Ֆեյսբուքով կառավարվում է երկիրը, դրա հետևանքով մենք եկանք ու կանգնեցինք այս խնդիրների առջև»,- ասաց նա։
Հիշեցնենք, որ 2019-ի սեպտեմբերին ԱԱԾ տնօրեն Արթուր Վանեցյանը բարձրաձայնեց իր հրաժարականի մասին՝ հայտարարելով.
«Պետականաշինությունն իր տրամաբանությունն ունի` որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։ Այն ընդհանուր ոչինչ չունի սպայի արժանապատվության հետ. սպայի ուսադիրն ու զարգացումների նման ընթացքն անհամատեղելի են։ Իմ հրաժարականը թող լինի «Կանգ ա՛ռ»-ի սթափեցնող քայլ, մնացած բոլոր տարբերակներում կհաղթանակի հայրենիքի հանդեպ պարտքը»։
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ