Ձեր վստահելի աղբյուրը

«Հայաստանի վարչապետը ժողովրդի թիկունքում ստորագրել է  կապիտուլյացիայի ստորացուցիչ պայմանագիր։ Սա փաստ է ու սա իրողություն է»,- «5-րդ ալիք» հեռուստաընկերության  «Հարցազրույց» հաղորդման ժամանակ ասել է ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը։

Նա նշում է, որ երկրում 45 օր պատերազմի մեջ է եղել, 35 օր շարունակ հասարակությանը ստել են, կեղծ տեղեկություններ են տվել, պարբերաբար շրջաններ հանձնելով՝ հայտարարել են հաղթել ենք, հաղթում ենք, ամբողջ պետական ապարատը կեղծ տեղեկատվությամբ պահել են հասարակությանը։

«Այդ ժամանակահատվածում, նրանք, ովքեր փորձում էին իրավիճակի մասին ճիշտ տեղեկություն տալ, նաև Արցախից, անմիջապես դառնում էին թիկունքը ջլատող, թուլացնող։ Կեղծիքի մեջ պահելով հասարակությանը՝ ծածուկ կերպով վերջին պահին ազգին, ժողովրդին կանգնեցրեց փաստի առջև։ Սա է իրողությունը։ Բայց պետք է գտնել ելքեր ստեղծված իրավիճակից դուրս գալու համար, սա մեր ժողովրդի համար անընդունելի է, չենք կարող համակերպվել այս իրավիճակի հետ»,- ասում է  Ի. Սաղաթելյանը։

ՀՅԴ-ական գործիչն ընդգծում է, որ Նիկոլ Փաշինյանի անհետևողական, ապաշնորհ, դավաճանական գործունեության արդյունքում երկիրը հանգեց պատերազմի. «Օրվա քաղաքական իշխանությունը պատրաստ չէր այդ պատերազմին, անկարող էր՝ պատերազմի ողջ ընթացքում չունենալով նորմալ դիվանագիտական հարաբերություններ, չկարողանալով կազմակերպել թիկունքը։ Պատերազմը հանաք բան չի, դմփ-դմփ-հու չէ։ Բայց ինքը ոչ միայն ոչինչ չարեց այս պատերազմը կանխելու համար, այլ ամեն ինչ արեց երկիրը հասցնելու պատերազմի»։

Նա ընդունում է, որ ընդդիմությունն ունի իր մեղքի բաժինը։ Ի. Սաղաթելյանն ասում է, որ այս մարդկանց ապաշնորհ քաղաքականության արդյունքում իրենք տեսնում էին վտանգ Արցախում։ 

«Այս իմաստով այդ ամեն ինչը գիտակցելով, իմանալով՝ թողեցինք, որ այս իշխանությունը 2,5 տարի մնա։ Մեր մեղքի բաժինն ունենք, որ չկարողացանք մեր հասարակությանը բացատրել, որ այս մարդիկ վտանգավոր են այս երկրի, պետության համար, այո, չկարողացանք այդ մարդկանց հեռացնել իշխանությունից»,- ասում է ՀՅԴ-ական գործիչը։

Նա նշում է, որ պատերազմի ընթացքում ընդդիմադիր կուսակցությունները բացառիկ կեցվածք են դրսևորել, ամեն ինչ մի կողմ են դրել ու կանգնել պետության, բանակի կողքին։

«Մենք չենք լռել, բայց հրապարակային չենք խոսել, ասել ենք իր ճակատին։ Ոչ միայն քննադատել ենք, նաև հստակ առաջարկներ ենք ներկայացրել, որովհետև սա Նիկոլ Փաշինյանի հոր բոստանը չէ, սա Հայաստանն է, ո՞նց կարելի էր այսպես վարվել այս երկրի, ժողովրդի հետ»,- ասում է Ի Սաղաթելյանը։

Նա նշում է, որ շատ բաց չեն խոսել,  որովհետև Ն. Փաշինյանը, նրա կողմնակիցները, ֆեյքերը ցանկացած առողջ քննադատության, ցանկացած հարց, երբ փորձել են բարձրացնել, հարձակվել են իրենց վրա։

«Այս օրերին էլ։ Դավաճանները տարել, երկիրը հանձնել են, այս օրերին էլ էլի մեզ են մեղադրում։ Ինքը պատերազմի 10-12 օր հետո արդեն դավաճանների մասին խոսեց։ Այսինքն՝ այս պատերազմի ողջ ժամանակահատվածում միշտ մտածել է իր իշխանության պահպանության համար։ Հաճախ արել է հայտարարություններ, որոնք արտաքին առումով վտանգավոր է եղել, մի շարք քայլեր է ձեռնարկել և ռազմաճակատի, և թիկունքի համար վտանգավոր են եղել, բայց եղել է ապահովություն վաղը, մյուս օրը դրանից կառչելու, իր իշխանությունը պահելու համար։ Այս ամբողջ ժամանակահատվածում իր համար գերխնդիր է եղել իր իշխանության պահպանումը»,- ասում է Իշխան Սաղաթելյանը։