Վահրամ քահանա Մելիքյանը՝ ի պատասխան Նիկոլ Փաշինյանի գրառման
Նիկոլ Փաշինյանը իր վերջին գրառումներից մեկում տեղեկացրեց, որ Անվտանգության խորհրդի նիստի ժամանակ Ամենայն Հայոց Կաթողիկոս Գարեգին Երկրորդը ևս տեղեկացվել է ստեղծված աղետալի վիճակի և պարտադրված պայմանների մասին: Panorama.am-ը դիմեց Մայր Աթոռի տեղեկատվական համակարգի տնօրեն տեր Վահրամ քահանա Մելիքյանին հարցերով՝ որքանո՞վ է սա համապատասխանում իրականությանը և, եթե համապատասխանում է, ի՞նչ է եղել Կաթողիկոսի արձագանքը և ի՞նչ քայլեր է ձեռնարկվել նրա կողմից։
«Այո, իբրև հրավիրյալ Ամենայն Հայոց Կաթողիկոսը մասնակցել է կառավարության կողմից կազմակերպված Անվտանգության Խորհրդի հատուկ նիստին։ Այս ընթացքին Նորին Սրբությունը նաև առանձին հանդիպումներ է ունեցել նախագահի և վարչապետի հետ։ Ինչ վերաբերում է հայրենիքում ստեղծված աղետալի իրավիճակի վերաբերյալ Ամենայն Հայոց Հայրապետի մտորումներին և թելադրություններին, դրանք ամփոփված են ինչպես ժողովրդին ուղղված նոյեմբերի 10-ի ուղերձում, այնպես էլ գերագույն Հոգևոր խորհրդի նոյեմբերի 16-ի հայտարարության մեջ»,- պատասխանեց Տեր Վահրամ քահանա Մելիքյանը։
Նոյեմբերի 10-ի ուղերձում Վեհափառ Հայրապետը մասնավորապես ասել էր.
«Ծանր բաժին է ընկել մեզ բոլորիս, բայց նաև պատասխանատվություն՝ ի շահ հայրենիքի գործելու սթափ քաջությամբ, հեռատես իմաստությամբ, անսակարկ վճռականությամբ։ Աղոթք է մեր սրտում հանուն համազգային մեր խոհեմության և միասնականության։ Դարավոր մեր պատմության դասերի քաջ գիտակցությամբ և ազգային միաբանության անհրաժեշտությամբ կոչ ենք անում պահպանել հանդարտությունը և չտրվել մեզ փոթորկող զգացումների անհարկի դրսևորումներին, զերծ մնալ բռնություններից և անկարգություններից։
Առկա ճգնաժամը պետք է իր կարգավորումը ստանա Հայաստանի և Արցախի ռազմաքաղաքական ուժերի միասնական ջանքերով։ ...
Կոչ ենք ուղղում նաև Հայաստանի և Արցախի իշխանություններին անհապաղ հիմնավոր և սպառիչ բացատրություններ ներկայացնելու մեր ժողովրդին ի հայրենիս, յԱրցախ և ի սփյուռս՝ կայացված որոշումների և հայրենի մեր երկրի ապագայի վրա դրանց ներազդեցության վերաբերյալ»։
Գերագույն Հոգևոր խորհրդի նոյեմբերի 16-ի հայտարարության մեջ մասնավորապես նշված է. «Անվիճարկելի ու կենսական է հրադադարի պահպանումը և տարածաշրջանում տևական ու հուսալի խաղաղության ապահովումը: Այնուամենայնիվ, հրադադարի վերաբերյալ նոյեմբեր 10-ի եռակողմ հայտարարությունը, դրանից բխող հետևանքները և առկա անորոշությունները, Արցախի ﬕ հատվածի կորստի փաստը հանկարծակիի բերեցին հանրությանը՝ հանգեցնելով արդար ընդվզման, ինչն իր հերթին հղի է ﬔր երկրի ներքաղաքական ապակայունացմամբ և սպառնում է կանգնեցնել հայրենիքը նոր վտանգների առջև։ ...
Անցնող այս ժամանակահատվածում կայացված որոշուﬓերի, հակամարտության այսօրինակ հանգուցալուծման և ազգային համերաշխության վերականգնման համար, ﬕﬕայն օրինականության նկատմամբ անվերապահ հարգանքով, պետք է պատասխանատվություն կրեն բոլոր պատկան մարմինների իրավասու պաշտոնյաները՝ չբացառելով նաև հրաժարականների հավանականություն»։
Հարակից հրապարակումներ`
Լրահոս
Տեսանյութեր
Արման Թաթոյանը միացավ Բագրատ Սրբազանի առաջնորդած քայլերթին
