Ձեր վստահելի աղբյուրը

Ազատամարտիկ Վոլոդյա Հովհաննիսյանը կարծում է, որ Նիկոլ Փաշինյանի այցը Սյունիք պոպուլիստական, ամբոխահաճ այց է, որով ինքը ցույց է տալիս, թե խաղաղություն է բերել Սյունիք։

«Նա, դավաճանաբար տալով մեր ազատագրված տարածքները, հայտարարեց, թե փրկել է 25 հազար զինվորներին՝ շրջափակման մեջ հայտնվելուց և սպանվելուց։ 6200 զոհված ու անհետ կորած տալով՝ նա իբր փրկել է մեր զինվորներին։ Նա ջախջախեց մեր բանակն ու թուրքին բերեց, հասցրեց Սյունիքի դարպասների մոտ։ Ամբողջ սահմանագիծը գծում է Ադրբեջանը, և մարտավարական բոլոր կարևոր դիրքերը վերցնում է Ադրբեջանը։ Սյունիքի բոլոր ջրային, անտառային, հողային, արոտավայրային և մշակվող հողատարածքների մեծ մասն այսօր հասանելի է ադրբեջանական զինուժին, և ենթակա չէ մեր կողմից մշակման»,- այսօր լրագրողների հետ հանդիպման ընթացքում ասաց ազատամարտիկը։

Նրա խոսքով, Սյունիք կատարած այցով Նիկոլ Փաշինյանը փորձում է «փրկել իր կաշին», թեև նրան որևէ մեկը չի դիմավորում Սյունիքում, ճանապարհները փակել են նրա առաջ, և տասը ավտոբուս ոստիկաններն են բացել այդ ճանապարհները։  
   
«Սյունեցիների հայտարարությունը, թե Նիկոլը 3 մլրդ է վերցրել Սյունիքը վաճառելու համար, ես չեմ կարող ասել՝ ճիշտ է, թե չէ, բայց վստահ կարող եմ ասել, որ նա կատարում է թուրք-ադրբեջանական տանդեմի հրամանները, որով պետք է թուրքերին տա հնարավորություն՝ Սյունիքում գերիշխանություն ունենալու։ Նա պետք է թուրքերին Սյունիքով Նախիջևանի հետ կապ հաստատելու հնարավորություն տա»,- կարծիք հայտնեց Վոլոդյա Հովհաննիսյանը։

Անդրադառնալով Գորիսի քաղաքապետ Առուշ Առուշանյանի ձերբակալությանը՝ ազատամարտիկը նշեց, որ դա Նիկոլ Փաշինյանի ձեռագիրն է, որով ընդդիմությանը զսպաշապիկ հագցնելու փորձ է արվում։

«Տեսեք, Սյունիքի երկու ջրամբարներ՝ Ծղուկի և Իշխանասարի, անցել են թշնամուն, դրանք ջրով էին ապահովում Սիսիանի և Գորիսի շրջանների մեծ մասը։ Ծղուկի լեռնաշղթայի ողջ արոտավայրերը մեծամասամբ ադրբեջանական զինված ուժերի վերահսկողության տակ են  լինելու։ Գորիս-Կապան ճանապարհի 21 կմ տարածքը վերահսկվում է Ադրբեջանի կողմից, որովհետև ճանապարհի եզրին, հայկական տարածքում թուրքերը դրել են դիրք, կարողանում են ամբողջ ճանապարհը վերահսկել։ Ինքնիշխանության բացարձակ կորուստ է, երբ ՀՀ տարածքում ՀՀ բնակչության տեղաշարժը պետք է վերահսկվի խաղաղապահ ուժերի կողմից, և դա պետք է լինի թուրքական ավտոմատների ներքո»,- նկատեց նա։

Վոլոդյա Հովհաննիսյանի կարծիքով, Նիկոլ Փաշինյանը բացարձակ սուտ է խոսում, երբ ասում է, թե Սյունիքից մեկ սմ հող անգամ թշնամուն չի անցնում։ Ըստ նրա, և՛ Կոռնիձորի հատվածում, և՛ Տեղ գյուղի հատվածում, և՛ Որոտանի հատվածում կան կորուստներ։

«Որոտանի հատվածում թուրքերը մտել են ՀՀ-ի տարածք, որը մերն է բոլոր քարտեզագրումներով։ Իսկ որտեղ էլ չեն մտել ՀՀ տարածք, կարևոր մարտավարական դիրքեր են վերցրել ու պոստեր են դրել։ Նրանք վերահսկում են ամբողջ Սյունիքի տարածքը։ Ի՞նչ տարբերություն թուրքը վերահսկո՞ւմ է մեր տարածքը, թե՞՝ մտել է այնտեղ»,- ասաց նա։

Վոլոդյա Հովհաննիսյանը հայտնեց, որ «դավաճանը» պետք է օր առաջ հեռանա. նա շարունակում է մնալ՝ քաղաքական շիզոֆրենիա ունեցողների մեղքով։

«Փաշինյանն ունի դավաճանական քաղաքականություն, բայց, ցավոք սրտի, պետք է խոստովանենք, որ հայ ժողովրդի մի ստվար հատված այսօր ծափահարում է նրան։ Ինքն էլ, ոգևորվելով այդ ծափերից, շարունակում է իր գործունեությունը»,- նշեց նա։

Անդրադառալով դեկտեմբերի 19-ին տեղի ունեցած սգո երթին՝ ազատամարտիկն ասաց, որ Փաշինյանին սատարում էր մարդ, որը հագած էր այնպիսի շապիկ, ինչպիսին հագնում են «ԻԳԻԼ»-ի բարձր հրամանատարության ներկայացուցիչները։ Այդ մարդն, ըստ բանախոսի, ադրբեջանական ակցենտով էր ռուսերեն խոսում։   

«Դա սգո երթ չէր, այլ սգո շոու էր, որն ընթացավ առանց ՀՀ հոգևոր առաջնորդների, չկար բանակի ոչ մի ներկայացուցիչ»,- նկատեց Վոլոդյա Հովհաննիսյանը։