Ձեր վստահելի աղբյուրը

«Իմ քայլը» խմբակցության պատգամավոր Համազասպ Դանիելյանը խմբակցությունում այսօր կազմակերպված քննարկումներից հետո լրագրողներին հայտնեց, որ մշակել են և փետրվարին շրջանառության մեջ կդնեն Ընտրական օրենսգրքում փոփոխություններ և լրացումներ կատարելու նախագիծը:

Պատգամավորը տեղեկացրեց, որ խորհրդակցության ժամանակ դիտարկվել է նաև Սահմանադրության՝ ԱԺ ընտրությունների դրույթների փոփոխության հնարավորությունը:

Ըստ Դանիելյանի, երբ «Իմ քայլը» նախատեսել էր Ընտրական օրենսգրքի փոփոխությունները՝ որոշվել էր, որ դրան կանդրադառնան սահմանադրական փոփոխություններից հետո, քանի որ ընտրակարգում կան դրույթներ, որոնք կարգավորվում են Սահմանադրությամբ:

«Հաշվի առնելով այն փաստը, որ սահմանադրական փոփոխությունները դեռ տեղի չեն ունեցել, բայց ընտրական օրենսգրքի փոփոխությունների փաթեթը մեծ հաշվով կարելի է ասել, որ պատրաստ է, քննարկում էինք, թե արդյոք կարող ենք փոփոխություններ իրականացնել Սահմանադրության այն հոդվածներում, որոնց վերանայումը ԱԺ լիազորություններին մեջ է»,- հայտնեց խորհրդարանական մեծամասնության ներկայացուցիչը:

Նա հաստատեց, որ քննարկվել է նաև ԱԺ ինքնալուծարման հարցը, սակայն հիմնական անդրադարձը  եղել է այն խնդրին, որ արտահերթ ընտրութունների համար քարոզարշավի անցկացմանը հատկացված ժամանակը բավականին կարճ է և այն հնարավոր է փոխել միայն սահմանադրական փոփոխությամբ:

Համազասպ Դանիելյանը նկատեց, որ Սահմանադրության այդ դրույթների փոփոխությունների իրականացումը միայն «Իմ քայլը»-ի որոշելիքը չէ, քանի որ դրա համար պահանջվում է 88 ձայն, որը վերջինս չունի և ընդդիմության հետ քննարկումների կարիք կա:

Նրա խոսքով, այսօրվա նիստում նախնական քննարկումներ էին ընթանում և դեռևս մշակված տարբերակ չկա ընդդիմադիր խմբակցություններին, կամ անկախ պատգամավորների քննարկմանը ներկայացնելու համար: