Ձեր վստահելի աղբյուրը

«Հայ ժողովուրդը չի պարտվել, հայ զինվորը չի պարտվել։ Համատեղ ուժերով հեռացնելու ենք այս իշխանությանը, կառուցելու ենք մեր երազած հայրենիքը»,- Ազատության հրապարակում Հայրենիքի փրկության շարժման հանրահավաքին ասաց շարժման համակարգող, ՀՅԴ ԳՄ անդամ Իշխան Սաղաթելյանը։

Նրա խոսքին հաջորդեց «Առանց Նիկոլ Հայաստան», «Առանց Նիկոլ Հայաստան» վանկարկումները։

Ի. Սաղաթելյանը նշեց, որ հայ ժողովուրդն իր պատմության մեջ երբեք այսպիսի ապիկար, տկար, սրիկա, ստախոս, անսրբություն իշխանություն չի ունեցել։

«Մենք բոլորս միասին պետք է հասկանանք, թե ինչ ճանապարհով և որքան արագ պետք է հեռացնենք այս իշխանություններին։

Մենք ձեզ  երբեք չենք տանելու արկածախնդրության, միասին ծրագրավորված, համատեղ հետևողական պայքարի արդյունքում հեռացնելու ենք այս չարիքի կառավարությանը։ Իսկ սա իրականության կդառնա, եթե այս դավաճան կառավարության հեռացման համաժողովրդական պահանջը դարձնենք համաժողովրդական պայքար»,- ասաց ընդդիմադիր գործիչը։

Ի. Սաղաթելյանը հայտարարեց, որ կարևոր նախաձեռնությամբ են հանդես գալիս. «Առաջիկայում գումարելու ենք համահայկական ներկայացուցչական մեծ ֆորում։ Այս պահից այդ ֆորումի նախապատրաստական աշխատանքների մեկնարկը տրվում է։ Ձեր բոլորի կարծիքները, գաղափարները մեզ համար կարևոր են։ Այդ ֆորումով սկիզբ է դրվելու Հայաստանի վերելքի ծրագրին։ Համահայկական ֆորումում մեկտեղվելու են ռեսուրսներ, գաղափարներ, ծրագրեր, առաջարկներ, ձևակերպվելու է  համահայական նոր օրակարգ՝ ազգային վերածննդի ծրագիր։ Սա մեզ համար շատ կարևոր է։

Մեր բոլորի երազանքը հզոր Հայաստան ունենալն է՝ առաջատար գիտությամբ, զարգացած տնտեսությամբ, ժամանակակից բանակով։ Դրան հասնելու համար կա մեկ գլխավոր խոչընդոտ՝ Նիկոլ Փաշինյան»,- ասաց նա։