Վճռաբեկ դատարանի նախագահը քաղաքական պաշտոնյաների հետ մի քանի ժամով փակվում է իր աշխատասենյակում. Թովմասյան
«Մենք շատ ենք խոսում դատական համակարգի անկախության, դրա վրա քաղաքական ազդեցություններից զերծ մնալու անհրաժեշտության մասին։ Դուք ինչպե՞ս եք պատկերացնում կոնկրետ քաղաքական ազդեցություններից դատարանների հեռու մնալը»,- այսօր խորհրդարանում, դիմելով Վճռաբեկ դատարանի դատավորի թեկնածու Արմեն Հայկյանցին, հարց հնչեցրեց անկախ պատգամավոր Թագուհի Թովմասյանը։
Ի պատասխան՝ Արմեն Հայկյանցը նշեց, որ դատավորի կատեգորիան պետք է լինի անկախ, անաչառ և օրենքին ենթակա։
«Ես պատկերացնում եմ, որ դատավորը պետք է զերծ լինի ցանկացած կանխակալությունից, իսկ դա սուբյեկտիվ գործոն է։ Այն պայմանավորված է բազմաթիվ հանգամանքներով։ Բայց ես կարծում եմ, որ դատավորի անկախությունը պետք է պայմանավորված լինի նաև օբյեկտիվ գործոնով՝ դատավորի անձից վեր գտնվող հանգամանքներով՝ այդ թվում օրեսդրական երաշխիքները։ Դատավորի անկախությունը կախված չէ միայն իրենից, դա այն արժեքն է, որը հանդիսանում է պետական իշխանության բոլոր ճյուղերի հոգածության առարկան»,- ասաց նա։
Ըստ նրա, դատարանը կարող է արդյունավետ արդարադատական ծառայություն մատուցել միայն այնքանով, որքանով գտնվում է իշխանության 3 ճյուղերի փոխհավասարակշռման տիրույթում։
«Եթե մենք շահագրգիռ ենք, որ պետության մեջ մատուցվեն բարձր արդյունավետությամբ ծառայություններ, ապա մենք պետք է ոչ միայն պահանջենք դատարանից, այլ նաև օգնենք նրան»,- ասաց նա։
Արձագանքելով՝ Թագուհի Թովմասյանն ասաց, որ ուզում է նաև մի թեմայի շուրջ քննարկում ծավալել. «Ոչ վաղ անցյալում մենք այստեղ ընտրեցինք Վճռաբեկ դատարանի նախագահ Լիլիթ Թադևոսյանին, և նա էլ այդ ամբիոնից վստահեցրեց, որ որևէ ազդեցությունից զերծ է մնալու։ Հիմա ինձ լուրեր են հասնում, որ նա քաղաքական պաշտոնյաների հետ մի քանի ժամով փակվում է իր աշխատասենյակում, և քննարկումներ ծավալում։ Այդ դեպքում ինչպե՞ս է նա զերծ մնում քաղաքական ազդեցությունից։ Դուք ո՞նց եք անելու, որ Արդարադատության նախարարը, օրինակ, չգա Ձեր աշխատասենյակ և հրամաններ չտա»։
Պատասխանելով պատգամավորի հարցին՝ Արմեն Հայկյանցն ասաց, որ չի կարող վերաբերմունք արտահայտել, թե ինչպես են վարվում պաշտոնատար անձինք՝ այդ թվում և արդարադատության ոլորտում։
«Ես խոսում եմ ընդհանուր երևույթի մասին, դատավորների անկախության համար ռիսկային են ներհամակարգային կապերը։ Իմ դեպքում այն հարցը կա, որ ես երբեք չեմ եղել դատավոր, նոր եմ հավակնում լինել, չունեմ որևէ կապ»,- ասաց Արմեն Հայկյանցը։
Հարակից հրապարակումներ`
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին