«Զորքի տգետ ղեկավարման պատճառով բազմաթիվ զինվորներ են զոհվել և գերեվարվել, մինչդեռ՝ քավության նոխազ է Իշխան Վահանյանը»
«ՓաստԻնֆո»-ն գրում է.
«Պատերազմի ընթացքում հրամանատարի կողմից մարտադաշտն ինքնակամ լքելու և հրամանը չկատարելու գործով կալանավորված Իշխան Վահանյանն օրերս ազատ է արձակվել՝ Վերաքննիչ քրեական դատարանի որոշմամբ։
Իշխան Վահանյանի պաշտպան Արման Թամրազյանը «Փաստինֆո»-ի հետ զրույցում ասաց, որ դեռևս որոշումը չի ստացել՝ հասկանալու, թե ինչ է արձանագրել դատարանը, սակայն ընդգծեց, որ առաջին ատյանի դատարանն ակնհայտ անհիմն որոշում էր կայացրել, ինչը քննարկման ենթակա չէ։ Նշենք, որ Առաջին ատյանի դատարանը կալանավորման հիմքերից հաստատված էր համարել գործի քննությանը խոչընդոտելու ռիսկը, ինչը փաստաբանի գնահատմամբ՝ ակնհայտ անհիմն է։ Փաստաբանը նաև չբացառեց, որ Վերաքննիչ դատարանն անդրադարձած լինի հիմնավոր կասկածին, քանի որ ներկայացված նյութերն այն իրականում չէին հաստատել։
Թամրազյանը հայտնեց, որ Իշխան Վահանյանն առաջադրված մեղադրանքը չի ընդունել, ցուցմունքներ տվել է, սակայն այս պահին ձեռնպահ մնաց ցուցմունքների վերաբերյալ տեղեկություններ հայտնելուց։ Ինչ վերաբերում է նրա դեմ ցուցմունքներին, ապա փաստաբանը հայտնեց, որ դրանցում որոշակի տեղեկություններ կան, բայց այդ տեղեկությունները չեն հաստատում հիմնավոր կասկածը, որոշակի առումով շինծու են և հակասական։
Անդրադառնալով պատերազմական գործողությունների ընթացքում վայրը լքելու հանգամանքին՝ փաստաբանը տեղեկացրեց, որ Վահանյանը վիրավորում էր ստացել, այդ կապակցությամբ՝ որպես վիրավոր հեռացել է, քանի որ չէր կարող որևէ գործողություն կատարել, մնալու դեպքում էլ որևէ բան չէր կարող փոխել, հետևաբար՝ տրամաբանական էր, որ նա պետք է հեռանար, ինչն օրենքով արգելված չէ, նրան այդ արարքը չէր կարող մեղսագրվել։
«Ցուցմունքները նաև հիմք ընդունելով՝ կարծում եմ, որ Իշխան Վահանյանը քավության նոխազ է, քանի որ ըստ առկա ցուցմունքների՝ նորակոչիկների գումարտակը տեղակայվել է Հադրութի շրջանի սարի վրա և ստանձնել այդ սարի պաշտպանությունը, երբ գումարտակի մոտ 60 տոկոսը ոչնչացված է եղել և գումարտակի զինծառայողները, ըստ առկա ցուցմունքների, հոգեբանորեն դրան պատրաստ չեն եղել։ Ըստ առկա ցուցմունքների՝ նրանք Ջաբրայիլից արդեն մարտադաշտը թողել, նահանջել և չէին կատարել հրամանները՝ դիրքը պահելու վերաբերյալ»,- նշեց փաստաբանը՝ պատմելով, որ այդ հոգեվիճակում գտնվող ստորաբաժանումը տեղակայվել է նշված դիրքում, ինչը հակառակորդը շրջապատել է, իսկ երբ ցանկացել են նահանջել, Հադրութ քաղաքը և մոտակա գյուղերը ադրբեջանական զորքերն արդեն գրաված են եղել։
Նրա խոսքով՝ այդ ստորաբաժանումը որևէ կերպ տեղեկացված չի եղել, որ իր թիկունքն արդեն գրավված է և փակված է։
«Զորքի այդ տգետ ղեկավարման, կառավարման բացակայության պատճառով՝ բազմաթիվ զինվորներ են զոհվել և գերեվարվել, հիմա ուղղակի մեղավոր են փնտրում, որ ցածր օղակից ինչ-որ մեկի վիզը փաթաթեն, նա կդառնա զինվորների զոհվելու և գերեվարման մեղավոր, իսկ այն, ով իրականում պետք է մեղադրվի՝ չգիտեմ ինչ կլինի»,- նշեց փաստաբանը՝ ընդգծելով, որ հրամանատարությունն այդ տարածքի զորքի կառավարումն ակնհայտ սխալ է իրականացրել կամ առհասարակ չի իրականացրել, բախտի քմահաճույքին ուղղակի սարի վրա տեղակայված են եղել՝ կամ կկոտորվեն, կամ չեն կոտորվի, իսկ երբ հակառակորդը շրջափակել է, Հադրութն արդեն գրավված են եղել և նահանջի ճանապարհ էլ չեն ունեցել։
«Երկու ստորաբաժանում փախուստի դիմած՝ երկու տարբեր հրամանատարների հետ այդ ձորերում, անտառներում փորձել են դուրս գալ, այդտեղ էլ են մարտի բռնվել հակառակորդի հետ։ Այսինքն՝ անվտանգ ճանապարհ, բաց ճանապարհ չի եղել, որով կարող էին այդ երեխեքը գալ, հասնել։ Գնացել են հայկական գյուղեր, որոնք արդեն Ադրբեջանի կողմից գրավված են եղել, ստիպված մնացել են այդտեղ, զանգել են օգնություն են խնդրել, հրամանատարությունն իրենց տեղեկացրել է, որ այդ գյուղերն արդեն Ադրբեջանի հսկողության տակ են, իրենց ոչ ոք չի կարող օգնել, սա է ամբողջ խնդիրը »,- նշեց Թամրազյանը»։
Ավելին՝ սկզբնաղբյուր կայքում։
Լրահոս
Տեսանյութեր
Արման Թաթոյանը միացավ Բագրատ Սրբազանի առաջնորդած քայլերթին
