Ամերիաբանկը որդեգրել է թվայնացման էկոհոմակարգային մոդելը. Արտյոմ Շամցյան

Տնտեսություն 18:15 05/06/2021 Հայաստան

Ամերիաբանկը որդեգրել է թվայնացման էկոհոմակարգային մոդելը. Արտյոմ Շամցյան

Այսօր «Renderforest» կազմակերպության նախաձեռնությամբ տեղի ունեցավ «Reinvent» մեկօրյա միջոցառումը, որի ժամանակ զեկույցով հանդես եկան ձեռնարկատիրության, տեղեկատվական տեխնոլոգիաների, թվային մարքեթինգի և դիզայնի ոլորտների 40 առաջատար փորձագետներ: Միջոցառմանը ներկա էին 800-ից ավելի մասնակից։

Ամերիաբանկից «Թվային ճարտարապետությունը` որպես փոխակերպման խթան» խորագրով զեկույցով հանդես եկավ բանկի ինովացիաների և թվայնացման գծով տնօրեն Արտյոմ Շամցյանը:

Վերջինս ներկայացրեց թվայնացման առանցքն ու հիմնական տարրերը, դրա դերը կազմակերպության ներսում՝ որպես փոփոխությունների կատալիզատոր:

Արտյոմ Շամցյանը նկատեց, որ այս տեխնոլոգիական գործիքը թույլ է տալիս անընդհատ փորձարկել նորը և ապահովել տվյալների հասանելիությունը:

Բանախոսը ներկայացրեց, թե ինչպե՞ս է թվային ճարտարապետությունը Հայաստանի առաջատար բանկերից մեկում՝ Ամերիաբանկում օգնում ապահովել թվային վերափոխմանը:

Պատախանելով լրագրողների հարցերին Շամցյանը նկատեց, որ միջոցառման անվանումը՝ Reinvent-ը լիովին համապատասխանում է Ամերիաբանկում ընթացող գործընթացներին և կազմակերպության մարդկային ռեսուրսների կառավարման ստորաբաժանումը աշխատակիցներին համապատասխան կարողություններով ապահովելու հետևողական միջոցառումներ է իրականացնում:

Նրա խոսքով՝ որպեսզի բանկերն ամբողջովին անցնեն թվային ճարտարապետության, պետք է համապատասխան ամբողջական ծրագրային ապահովում լինի, ինչն էլ կնպաստի, որ բանկային բոլոր ծառայությունները համակարգային ձևով թվայնացված համակարգում գործեն:

Ամերիաբանկի ինովացիաների և թվայնացման գծով տնօրենը հայտնեց, որ իրենց բանկը որդեգրել է թվայնացման էկոհամակարգային՝ ամբողջական անցման գործընթաց:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: