Ձեր վստահելի աղբյուրը

Վերաքննիչ քրեական դատարանը` նախագահությամբ դատավոր Նարինե Հովակիմյանի, քննում է սահմանադրական կարգի ենթադրյալ տապալման գործի կարճման վերաբերյալ ներկայացված պաշտպանների և դատախազների բողոքները։

Նշենք, որ Երևան քաղաքի ընդհանուր իրավասության դատարանը, նախագահությամբ Աննա Դանիբեկյանի, ապրիլի 6-ին, հիմք ընդունելով ՍԴ՝ Քր․ Օր․-ի 300․1 հոդվածը հակասահմանադրական ճանաչելու որոշումը, արդարացրել էր ՀՀ երկրորդ նախագահ Ռոբերտ Քոչարյանին, նախկին փոխվարչապետ Արմեն Գևորգյանին, պաշտպանության նախկին նախարար Սեյրան Օհանյանին և ԶՈՒ ԳՇ նախկին պետ Յուրի Խաչատուրովին՝ դադարեցնելով նրանց նկատմամբ սույն հոդվածով քրեական հետապնդումը՝ հանցագործության դեպքի բացակայության հիմքով։

Ռոբերտ Քոչարյանի պաշտպանները միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։ Դատախազությունն իր հերթին բողոք է ներկայացրել Երևանի ընդհանուր իրավասության դատարանի որոշման դեմ։ Վերաքննիչ բողոք էին ներկայացրել նաև երկու տուժողի ներկայացուցիչները։

«Արդար դատաքննության իրավունքը ՄԻԵԴ կողմից մանրամասն հիմնավորում ստացած իր ձևակերպումներով լիարժեքորեն վերաբերում է նաև տուժողին, և ընթացակարգերը պետք է համապատասխանեն այն պահանջներին, որոնք անհրաժեշտ են տուժողի արդար դատաքննության իրավունքը գործնականում, ռեալ և ոչ միայն թղթի վրա պաշտպանելու համար»,- իր բողոքում մասնավորապես նշեց դատախազ Գևորգ Բաղդասարյանը։

Նրա կարծիքով, այս գործով որոշումը կայացնելիս, որը բողոքարկվում է դատախազների կողմից, Քրեական դատավարության օրենսգրքի որոշ նորմեր ուղղակիորեն հակասության մեջ են մտնում վերոնշյալ իրավունքի հետ։

Ռոբերտ Քոչարյանի պաշտպան Հայկ Ալումյանն, անդրադառնալով դատախազների կողմից ՍԴ որոշումը քննադատելուն, նկատեց՝ դա անթույլատրելի է։

«Գտնում եմ, որ դա անթույլատրելի է, քանի որ ՍԴ որոշումը վերջնական է, կայացված է բարձրագույն մարմնի կողմից, ցանկացած մարդ, անհատ կարող է կարծիք հայտնել դրա մասին, բայց ՀՀ անունից հանդես եկող ոչ մեկ իրավունք չունի հատկապես պաշտոնապես քննադատել այդ որոշումը, հակառակ դեպքում ստացվում է, որ Հայաստանի Հանրապետությունը քննադատում է Հայաստանի Հանրապետության անունից հանդես եկող դատարանին»,- ասաց Ալումյանը։

Անդրադառնալով այն հանգամանքին, որ դատախազն իր միջնորդության հիմնավորումներում հիշատակում է Եվրոպական կոնվենցիայի 6-րդ հոդվածը, որը վերաբերում է արդար դատաքննությանը, ապա Ալումյանն ընդգծեց, որ այդ հոդվածը չի վերաբերում դատախազներին։

«Կոնվենցիան կոչվում է Մարդու իրավունքների եվրոպական կոնվենցիա»,- հիշեցրեց Ալումյանը։

Ավելին, նա նկատեց, գուցե այդտեղ նստածների համար նորություն կլինի, բայց կոնվենցիայի 6-րդ հոդվածը չի վերաբերում տուժողներին, ասածը հիմնավորելու համար մեջբերեց.

«Յուրաքանչյուր ոք, երբ որոշվում են նրա քաղաքացիական իրավունքներն ու պարտականությունները կամ նրան ներկայացված ցանկացած քրեական մեղադրանքի առնչությամբ, ունի օրենքի հիման վրա ստեղծված անկախ ու անաչառ դատարանի կողմից ողջամիտ ժամկետում արդարացի և հրապարակային դատաքննության իրավունք»։ 

Ալումյանի խոսքով, իր ասածը կհաստատեին, եթե դահլիճում նստած լինեին Վահե Գրիգորյանը, որ հիմա ՍԴ անդամ է, ինչպես նաև Տիգրան Եգորյանը, որ սահմանադրական կարգի ենթադրյալ տապալման գործով տուժողներից մեկի փաստաբանն էր։

Մինչ Ալումյանը ելույթ էր ունենում, տուժողի ներկայացուցիչ Սեդա Սաֆարյանն անընդհատ տեղից միջամտում էր նրա խոսքին, չնայած դատավորի՝ լռելու հորդորներին, Սաֆարյանը չլռեց։ Արդյունքում նկատողություն ստացավ։

«Տիկին Սաֆարյան, Ձեզ նկատողություն է հայտարարվում»,- ասաց նախագահող դատավոր Նարինե Հովակիմյանը։

«Նկատողություն հայտարարեք, թող ինչ ուզում են անեն»,- արձագանքեց Սաֆարյանը։

«Հայտարարել եմ, արձանագրվեց դա»,- նշեց դատավորը։

Քանի որ մեղադրող կողմը միջնորդությունը գրավոր չտրամադրեց պաշտպանական կողմին, պաշտպանները դատարանից խնդրեցին արձանագրությունը, որպեսզի ողջ ծավալով ծանոթանան ու արդյունավետ կերպով ներկայացնեն իրենց խոսքը։