Ձեր վստահելի աղբյուրը

Իրավաբան Ռոբերտ Հայրապետյանը գրում է. «Հենց նոր, ապօրինի կերպով ձերբակալեցին Գորիսի համայնքապետ Առուշ Առուշանյանին»։

Առուշանյանի ձերբակալման մասին   ֆեյսբուքի իր էջում հայտնել  է  նաև Գորիսի համայնքապետի տեղակալ Իրինա Յոլյանը։

Իսկ ահա «Փաստինֆո»-ի տեղեկությամբ ՝ Գորիսի համայնքապետ Առուռ Առուշանյանին այս պահին բերման են ենթարկում ՀՔԾ։

Աղբյուրը հիշեցնում է, որ նրան մեկուսացնելու ուղղությամբ իշխանությունները սկսել են խորհրդարանական արտահերթ ընտրություններից անմիջապես հետո՝ ի կատարումն Նիկոլ Փաշինյանի նախընտրական խոստումի առ այն, որ պատժելու է իրեն ընդդիմացող համայնքապետերին։

«Նրան բերման ենթարկելու որոշում է կայացվել այն պարագայում, երբ Առուշ Առուշանյանը վաղ առավոտյան գտնվել է Երևանում, հարցազրույցներ տվել ու չի խուսափել ներկայանալ նախաքննական մարմնին։ Ասել է թե՝ հրավերի դեպքում նա անձամբ կներկայանար նախաքննական մարմնին։

Հետաքրքիր զուգադիպությամբ նրան բերման են ենթարկում ժամը 18-ին, երբ Երևանի ընդհանուր իրավասության դատարանի վարույթում՝ Կարեն Ֆարխոյանի նախագահությամբ, պետք է սկսվեր Գորիս համայնքի Քարահունջ բնակավայրի վարչական ղեկավար Լուսինե Ավետյանի խափանման միջոցի գործով նիստը։

Նկատենք, որ նա արդեն երրորդ օրն է չունի պաշտպան՝ զրկվելով արդյունավետ պաշտպանության իրավունքից։ Քննությանը մոտ կանգնած աղբյուրների փոխանցմամբ՝ իրավապահները գործարք են առաջարկել Ավետյանին, համաձայն որի՝ ցուցմունք կտա Գորիսի համայնքապետ Առուշ Առուշանյանի դեմ, ինչի դիմաց ազատ կարձակվի։

Կասկածելի հանգամանքներում Լ.Ավետյանի պաշտպանությունն ստանձնելու համար փաստաբան գտնել չի հաջողվել, ուստիև առավոտյան նշանակված դատական նիստը, որի ժամանակ նախատեսվում էր քննարկել նրա ձերբակալության դեմ բողոքն ու որպես խափանման միջոց կալանավորումն ընտրելու մասին միջնորդությունը, հետաձգվել է։

Ի սկզբանե Լուսինե Ավետյանի պաշտպանությունն իրականացնում էր փաստաբան Րաֆֆի Ասլանյանը, որն էլ վիճարկել էր Լ.Ավետյանին ձերբակալելու իրավաչափության հարցը, սակայն այսօր «Փաստինֆո»-ի հարցին ի պատասխան նա հայտնել է, որ դադարեցրել է պաշտպանությունը՝ զերծ մնալով որևէ հավելյալ մեկնաբանությունից։ Տեղեկություններ կային մասնագիտական որակներով աչքի ընկնող մի քանի այլ փաստաբանների հնարավոր ներգրավման մասին, սակայն վերջիններս ևս «Փաստինֆո»-ի հետ զրույցում նշել են, որ համաձայնություն ձեռք չի բերվել։ Ի վերջո, փորձ է արվել հանրային փաստաբան ներգրավել, սակայն առավոտյան չի հաջողվել դա ապահովել»։

Նիստը շարունակվելու է այսօր՝ ժամը 18-ին ու դեռ պարզ չէ՝ փաստաբան կմասնակցի, թե ոչ։

«Փաստինֆո»-ի աղբյուրների փոխանցմամբ՝ նախաքննական մարմնին հաջողվել է «գործարք»-ի գնալ և արգելանքի տակ պահելու սպառնալիքների միջոցով կիսատ-պռատ ցուցմունքներ ձեռք բերել Գորիսի համայնքապետի դեմ, ընդ որում՝ նման սպառնալիքներով նախազգուշացվել են մի շարք բնակիչներ, որոնցից ոմանք հարցաքննվել են որպես վկաներ, իսկ որոշների հետ էլ աշխատել են հետաքննության մարմինները։

Հիշեցնենք, որ այսօր ավելի վաղ Առուշ Առուշանյանը, պատասխանելով այն հացին, թե ի՞նչ վտանգ է ներկայացնում իշխանության համար, «ասում են՝ շուտով Սյունիքում  շինարարություն է նախատեսված միջանցքի հետ կապված,  ձեզ չեզոքացնում են, որպեսզի չխոչընդոտեք այդ աշխատանքներին», Ա. Առուշանյանն ասել էր, որ ինքն էլ է հակված այդ տարբերակին։

«Ես հակված եմ այդ տարբերակին, քանի որ գիտեն, որ մենք խոչընդոտելու ենք այդ միջանցքի կառուցմանը, չենք թողելու նման բան: Խնդիրը դրանում է՝ մեզ ձերբակալեն ու այդ հարցը հեշտ լուծեն»,- ասաց Գորիսի քաղաքապետը:

Նա նշել էր, որ չի վախենում դատվելուց, միայն թե հանգիստ թողնեն իր աշխատակիցներին, քաղաքացիներին:

«Միևնույնն է՝ իմ սկզբունքները չեն փոխվելու: Պատրաստ եմ դատվել, բայց ոչ այն հոդվածով, որ ուզում են, քանի որ նման որևէ քայլ չի եղել: Իրենց մոտ լավ է ստացվում մարդկանց դեմ սարքելը. բերեն, այստեղ զենք դնեն ու ասեն քոնն է, դատեն»,- ասել էր  Ա. Առուշանյանը:

Նա նաև հայտարարել էր՝ «Բոլոր մեր քաղաքացիներին հետևյալ խոսքն են ասում՝ գրեք Առուշի վրա, կամ էլ չէ ձեզ կդատեն»։