Ձեր վստահելի աղբյուրը

«Իմ մոտ տպավորություն է, որ ոչ թե հիմա Սյունիքի մարզպետն այս քաղաքական թիմի ներկայացուցիչն է, այլ՝ ուրիշ, որովհետև եթե հիշողությունս ինձ չի դավաճանում, ներկայիս մարզպետի որդին է հետախուզման մեջ և չի ներկայանում իրավապահներին, բայց մեծամասնության մեր գործընկերների հետևողականությունը և բծախնդրությունն այդ հարցում չենք տեսնում»,- հայտարարեց «Հայաստան» խմբակցության պատգամավոր Արամ Վարդևանյանն՝ արձագանքելով Տնտեսական հարցերի մշտական հանձնաժողովի նախագահի թեկնածու Վահե Հակոբյանին՝ Սյունիքում վախի մթնոլորտ ստեղծելու մեջ ՔՊ-ական պատգամավորների հնչեցրած կարծիքներին:

Նա նաև Վահե Հակոբյանին խնդրեց ներկայացնել իր մարզպետ եղած ժամանակ Սյունիքում իրականացրած տնտեսական ծրագրերը:

Համաձայնելով Վարդևանյանի գնահատականների հետ՝ Հակոբյանը դիմեց ՔՊ-ի պատգամավորներին. «Դուք խոսում եք կոռուպցիոն ռիսկերից և ես հիշեցի, որ այս հուլիս ամսվա ընթացքում մեկ աղբյուրից գնման սկզբունքով Սյունիքում երեք ընկերությունների բաշխվել է 6 մլրդ 800 դրամ: Սա ի՞նչ է, այլ ընկերություններ չկային, ինչո՞ւ մրցույթ չի հայտարարվել»:

Պատգամավորը հավելեց, որ  կարող է թվարկել նաև այդ ընկերությունների անունները, բայց դեռ դրա անհրաժեշտությունը չի տեսնում:

Հաստատելով, որ գործող մարզպետի որդին այսօր հետախուզման մեջ է ծանր հանցանք կատարելու համար, Հակոբյանը հայտնեց՝ իր տեղեկություններով այն մարդը, որի վրա կրակել է մարզպետի որդին հիմա գտնվում է կոմայի մեջ:

«Հայաստան» խմբակցության պատգամավորը նշեց, որ իր մարզպետ եղած ժամանակ երեք տարում Կապանում կառուցել են օդանավակայան, որը միակն է հետանկախ Հայաստանում և որի համար ծախսվել է 9 մլրդ դրամ՝ դրան գումարվել է նաև ինքնաթիռը:

«Օդանավակայանն արդեն պատրաստ է շահագործման, որը ձեր պատճառով դարձել է սահմանին հարակից և այսօր որևէ մեկը իր վրա պատասխանատվություն չի վերցնում, որ այդ ինքնաթիռը Երևանից Կապան և հակառակ ուղղությամբ կթռնի և ուղևորներ կտեղափոխի: Ինչո՞ւ այդ մասին չեք խոսում, դա էլ էինք մեր հետ տանելու, թե Այվազովսկու նման կախելու էինք պատերին»,- հայտարարեց Տնտեսական հարցերի մշտական հանձնաժողովի նախագահի ընդդիմադիր թեկնածուն: