Ձեր վստահելի աղբյուրը

ՀՀ նախկին փոխվարչապետ Արմեն Գևորգյանի նոր պաշտպան Ալեքսանդր Կոչուբաևը լքեց դատական նիստերի դահլիճը։  

Այսօր նիստի ժամանակ պաշտպանն անհամաձայնություն է հայտնել դատարանի գործողությունների հետ՝ նշելով, որ այդպես էլ չի ստացել քննվող գործի ամբողջական նյութերը։ Դատարանը պաշտպանական կողմին տրամադրել է նյութերի միայն 75 հատորը և դրանց ծանոթանալու համար տվել մեկ շաբաթ ժամանակ։

«Եթե պաշտպանը գտնում է, որ որևէ նյութ դատարանը պաշտպանին չի տրամադրել, ապա դատարանը պարզաբանում է, որ ցանկացած աշխատանքային օր պաշտպանը կարող է ներկայանալ դատարան, ծանոթանալ գործի նյութերին, ձեռք բերել դրանք»,-ի պատասխան հայտարարեց  դատավար Աննա Դանիբեկյանը։

Անդրադառնալով դատական նիստի օրերը փոխելու առաջարկին, Դանիբեկյանն ասաց՝ պարտադիր չէ, որ միևնույն նիստին Արմեն Գևորգյանի երկու պաշտպաններն էլ միաժամանկ ներկա լինեն։

«Հարգելի դատարան, եթե Արմեն Գևորգյանը ցանկանար մեկ պաշտպանով հանդես գալ, կունենար մեկ պաշտպան։ Բայց եթե անձը ցանկանում է երկու պաշտպանով հանդես գալ, հարգելի դատարան, Դուք պարտավոր եք ապահովել այդ հնարավարությունը։ Ես և Լուսինե Սահակյանը տարբեր սուբյեկտներ ենք այս դատավարության մեջ, ովքեր ունեն իրենց լիազորությունները»,-ասաց Կոչուբաևը՝ ընդգծելով, որ ինքը չի կարող ձևական մտնել դահլիճ ու ձևական մասնակցել դատական նիստերին, քանի որ Արմեն Գևորգյանի առջև ունի ստանձնած պարտականություններ։

Նա խնդրեց իրեն տրամադրել դատական բնույթի ողջ նյութերը, դատական նիստի արձանագրությունները։

«Շնորհակալ եմ։ Ցտեսություն»,-ասաց նա ու դուրս եկավ նիստերի դահլիճից։

Մեղադրող դատախազ Գևորգ Բաղդասարյանը տեղի ունեցածն իրավունքի չարաշահում որակեց ու նշեց, պաշտպանների գործողությունները համաձայնեցված են ու իրականացվում են ոչ դատավարական մակարդակում։

«Իրավունքի չարաշահումն այլ կերպ չի լինում, իրավունքի չարաշահումը հենց սա է։ Պաշտպանները՝ տվյալ դեպքում Արմեն Գևորգյանի պաշտպանները չարաշահում են իրենց դատավարական իրավունքները, և մենք կարծում ենք, որ դրանք պետք է ունենան համապատասխան դատավարական հետևանքներ»,-ասաց դատախազ Բաղդասարյանը՝ նշելով, որ նման վարքագիծը կարող է հանգեցնել իրավունքների վատ պաշտպանության։

Նա միջնորդեց  դատական սանկցիա կիրառել Կոչուբաևի նկատմամբ։

Ի պատասխան դատախազի՝ Արմեն Գևորգյանը նկատեց, ճի՞շտ է հասկացել, որ այս դատարանում իր իրավունքները կարող են ավելի վատ պաշտպանվել։

«Դա ի՞նչ է նշանակում, սպառնալի՞ք է։ Ոորևէ մեկը չի կարող ինձ մեղադրել, որ ես կամ իմ պաշտպաններն օրենք ենք խախտում»,-ասաց Գևորգյանն ու նկատեց, որ իրենք օգտագործում են օրենքով սահմանված ընթացակարգերը։

Նա նշեց, եթե տեսնի իր իրավունքներն ավելի շատ են խախտվում, ապա իր իրավունքները պաշտպանել է միջազգային ատյաններում։

«Ես չեմ հասկանում, ի՞նչ է նշանակում, երբ ասում եք, գործի վերաբերելի մասերը տվել եք, ես էլ ասում եմ՝ չեք տվել։ Ո՞վ է որոշում, վերաբերելի՞  է, թե՞ ոչ։ Եկեք արձանագրենք, որ իմ իրավունքները փայլուն չեն պահպանվել, պաշտպանվել են, իսկ եթե ասում եք վաթարանալու է, ապա ասեք՝ ի՞նչ ձևով, որպեսզի ես էլ որոշեմ հետագա ռազմավարությունը»,-ասաց Գևորգյանը։
Ռոբերտ Քոչարյանի պաշտպան Հայկ Ալումյանն էլ նշեց, ակնհայտ է, որ դատավորի տրամադրած ժամանակը գործի նյութերին ծանոթանալու համար բավարար չէ, ամբողջությամբ չեն տրամադրվել նաև գործի նյութերը, չեն հատկացվել նիստերի արձանագրությունները։

«Չկա՞ կոմպրոմիսային տարբերակ, ինչո՞ւ է պետք դատավարությունը մտցնել այսպիսի փակուղի։ Պարոն Բաղդասարյանն ու նրա գործընկերներն էլ պետության փաստաբաններն են, պարոն Բաղդասարյանը կհանդուրժի՞, որ մի դատախազ դատարան մտնի առանց գործի նյութերին ծանոթանալու։ Ես հորդորում եմ, խնդրում եմ գտնել մի կոմպրոմիսային տարբերակ, որ պաշտպանները ոչ իրենց մասնագիտության առաջ սխալ լինեն, ոչ էլ Ձեր առաջ։ Մի տարբերակ գտեք, խնդրում եմ։ Այս դատավարությունն այսպես չի կարող շարունակվել»,-ասաց Ալումյանը։

Ռոբերտ Քոչարյանի պաշտպաններից Հովհաննես Խուդոյանն էլ ընդգծեց, Հայաստանում հնարավոր չէ գտնել մի փաստաբան, որը կմասնակցի դատավարությանը դատավոր Դանիբեկյանի առաջադրած պայմաններով։

«Իրեն Հարգող փաստաբանը չի կարող նիստին մասնակցել առանց գործի նյութերին ծանոթանալու»,-ասաց նա։

Դատավոր Դանիբեկյանը Ալեքսանդր Կոչուբաևի նկատմամբ կիրառեց դատական սանկցիա՝ նկատողություն, սպառնաց՝ նման վարքագիծը շարունակելու դեպքւոմ ավելի խիստ սանկցիա կլինի։

Նիստը հետաձգվեց, հաջորդ նիստը նշանակվեց նոյեմբերի 2-ին ժամը 13։00-ին։

Գործի մեղադրական եզրակացության համառոտ բովանդակության համաձայն, Ռոբերտ Քոչարյանին մեղադրանք է առաջադրվել այն բանի համար, որ նա 1998թ․ ապրիլի 9-ից մինչև 2008 թվականի ապրիլի 9-ը զբաղեցնելով ՀՀ Նախագահի պաշտոնը, իր պաշտոնեական դիրքն օգտագործելով «Թի Էս Էս Սի Արմենիա» ՍՊ ընկերության միակ մասնակից և տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։

Արմեն Գևորգյանին մեղադրանք է առաջադրվել այն բանի համար, որ նա, հանդիսանալով պետական մարմնում մշտապես կազմակերպչական-տնօրինչական գործառույթներ իրականացնող պաշտոնատար անձ, «Թի Էս Էս Սի Արմենիա» ՍՊ ընկերության միակ մասնակից ու տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վճարելու գործարքին չխոչընդոտելու համար, 2008թ․ ապրիլին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 309․000․000 ՀՀ դրամին համարժեք 1․000․000 ԱՄՆ դոլար կաշառք, ինչպես նաև նույն ժամանակ թաքցնելով ու խեղաթյուրելով նշված գումարի իրական բնույթն ու ծագումը՝ օրինականացրել է առանձնապես խոշոր չափերով հանցավոր ճանապարհով ստացված եկամուտները։