Ձեր վստահելի աղբյուրը

Կառավարության այսօրվա նիստում չզեկուցվող 37 հարցի թվում ընդունվեց Կապանի ««Սյունիք» օդանավակայան» ՍՊ ընկերության կրած վնասների մարման նպատակով ընկերությանը 49,5 մլն դրամ հատկացնելու որոշումը։

Որոշման հիմնավորման մեջ ասվում է, որ Քաղաքացիական ավիացիայի կոմիտեն «Նովէյր» ավիաընկերությունից ստացել է Երևան-Կապան-Երևան կանոնավոր չվերթեր իրականացնելու հայտ, որի մեկնարկը նախատեսվում է 2022 թվականի հունվարի 20-ից՝ շաբաթական երկու անգամ։

Նշվում է, որ ժամանակավորապես դադարեցված է «Սյունիք» օդանավակայանի ֆինանսավորումը, որի հետևանքով կարող է վտանգվել նրա հետագա շահագործումը, իսկ ընդհանուր պարտավորությունների գումարը 2021 թվականի համար կազմում է 49 մլն 508 հազար դրամ:

««Սյունիք» օդանավակայան» ՍՊԸ-ի ֆինանսական պարտավորությունները 2021 թվականի համար ներկա պահին ունեն հետևյալ տեսքը.

– օգոստոս ամիս՝ 2,250,000 դրամի չափով պարտք, որն իր մեջ ներառում է եկամտային հարկի, հաշվապահական ծառայության և ռադիոհաճախականության վճարի մասով ծախսեր,

– սեպտեմբեր ամիս՝ 9,364,218 դրամի չափով պարտք, որն իր մեջ ներառում է ընդհանուր շահագործման ծախսեր, աշխատավարձ և հարկեր,

– հոկտեմբեր ամիս՝ 9,147,856 դրամի չափով պարտք, որն իր մեջ ներառում է ընդհանուր շահագործման ծախսեր, աշխատավարձ և հարկեր:

Օդանավակայանի նախատեսվող ծախսերի հանրագումարը 2021 թվականի նոյեմբեր-դեկտեմբեր ամիսների համար կկազմի 18,970,657 դրամ, իսկ աշխատակիցների չօգտագործված արձակուրդի վճար և արձակման նպաստի գումարը կկազմի 9,775,991 դրամ։

Ընդհանուր պարտավորությունների գումարը 2021 թվականի համար կկազմի 49,508,722 դրամ»,- նշված է կառավարության որոշման մեջ։